කැබිනට් අමාත්යාංශ 08ක් සඳහා නව ලේකම්වරු පත්කර තිබේ.
ජනාධිපති රනිල් වික්රමසිංහ මහතා විසින් 2023 ජනවාරි 01 වනදා සිට ක්රියාත්මක වනපරිදි එම පත්කිරීම් සිදුකර ඇත.
මේ අතර අධිකරණ, බන්ධනාගාර කටයුතු හා ආණ්ඩුක්රම ව්යවස්ථා ප්රතිසංස්කරණ අමාත්යාංශය, වාරිමාර්ග සහ අධ්යාපන යන අමාත්යාංශ 03හි ලේකම්වරුන්ගේ ධූර කාලය තවත් වසරකින් දීර්ඝ කර තිබේ.
ඒ අනුව, ප්රවාහන හා මහාමාර්ග අමාත්යාංශයේ නව ලේකම් ලෙස එම්.එම්.පී.කේ. මායාදුන්නේ මහතා පත්කර ඇත.
ඒ මහතා මීට පෙර රාජ්ය පරිපාලන ස්වදේශ කටයුතු, පළාත් සභා හා පළාත් පාලන අමාත්යාංශයේ ලේකම්වරයා ලෙස කටයුතු කළේය.
කාන්තා, ළමා කටයුතු හා සමාජ සවිබල ගැන්වීමේ අමාත්යාංශයේ ලේකම් ලෙස කටයුතු කළ එච්.කේ.ඩී.ඩබ්ලිව්. එම්.එන්.බී. හපුහින්න මහතා රාජ්ය පරිපාලන, ස්වදේශ කටයුතු පළාත් සභා හා පළාත් පාලන අමාත්යාංශයේ ලේකම්වරයා ලෙස පත්කර ඇත.
යාපනය දිස්ත්රික් ලේකම්වරයා ලෙස කටයුතු කළ කේ. මහේසන් මහතා ක්රීඩා හා යෞවන කටයුතු අමාත්යාංශයේ ලේකම්වරයා ලෙසත්, කම්කරු හා විදේශ රැකියා අමාත්යාංශයේ අතිරේක ලේකම් වශයෙන් කටයුතු කළ එම්. යමුනා පෙරේරා මහත්මිය කාන්තා, ළමා කටයුතු හා සමාජ සවිබලගැන්වීමේ අමාත්යාංශයේ ලේකම් ලෙසත්, රාජ්ය පරිපාලන, ස්වදේශ කටයුතු, පළාත් සභා හා පළාත් පාලන අමාත්යාංශයේ අතිරේක ලේකම්වරයා ලෙස කටයුතු කළ එම්.එම්. නයිමුදීන් මහතා ආයෝජන ප්රවර්ධන අමාත්යාංශයේ ලේකම්වරයා ලෙසත්, පුද්ගලයන් ලියාපදිංචි කිරීමේ දෙපාර්තමේන්තුවේ කොමසාරිස් ජනරාල්වරයා ලෙස කටයුතු කළ පී.පී. ගුණතිලක මහතා මහජන ආරක්ෂක අමාත්යාංශයේ ලේකම්වරයා ලෙසත් ජනාධිපතිවරයා විසින් පත්කර තිබේ.
ජනාධිපති ජ්යෙෂ්ඨ අතිරේක ලේකම් ලෙස කටයුතු කළ ඒ.එම්.පී.එම්.බී. අතපත්තු මහතා වෙළෙඳ, වාණිජ හා ආහාර සුරක්ෂිතතා අමාත්යාංශයේ ලේකම්වරයා ලෙසත්, කෘෂිකර්ම අමාත්යාංශයේ අතිරේක ලේකම්වරයා ලෙස කටයුතු කළ ආර්.එම්.ඩබ්ලිව්.එස්. සමරදිවාකර මහතා සංචාරක හා ඉඩම් අමාත්යාංශයේ ලේකම්වරයා ලෙසත් පත්කර ඇත.
එමෙන්ම අධිකරණ, බන්ධනාගාර කටයුතු හා ආණ්ඩුක්රම ව්යවස්ථා ප්රතිසංස්කරණ අමාත්යාංශයේ ලේකම් වසන්තා පෙරේරා මහත්මිය සහ වාරිමාර්ග අමාත්යාංශයේ ලේකම් යූ.ඩී.සී. ජයලාල්, අධ්යාපන අමාත්යාංශයේ ලේකම් එම්.එන්. රණසිංහ යන අය නැවත වසරක කාලයක් සඳහා එම ධුරයන්ට පත්කර ඇත.
රෂිකා හෙන්නායක
