මැතිවරණ කොමිෂන් සභාව මුදල් අමාත්‍යංශයට දැනුම් දී ඇත්තේ පළාත් පාලන ඡන්ද විමසීමට අදාළ කාර්යයන් සඳහා රුපියල් මිලියන 770ක මුදලක් පෙබරවාරි මාසය තුළ ලබාදෙන ලෙසයි. මෙය මුදල් අමාත්‍යංශ ලේකම්වරයාට ලිඛිතව අදාළ ඉල්ලීම කර ඇත්තේ මැතිවරණ කොමිෂන් සභාවේ සභාපති නීතීඥ නිමල් ජී පුංචිහේවා මහතා විසින් බව වාර්තා වේ.
මාර්තු මස 09 වනදා පැවැත්වීමට නියමිත පළාත් පාලන ඡන්ද විමසීම සඳහා අවශ්‍ය මූලික වියදම් සඳහා පෙබරවාරි මාසය තුළ මිලියන 770ක මුදලක් අවශ්‍ය බවට ඇස්තමේන්තු කර ඇති අතර, අදාළ මුදල එකවර හෝ වාරික වශයෙන් ලබාදීමට පියවර ගන්නා ලෙස මැතිවරණ කොමිෂන් සභාව මුදල් අමාත්‍යංශ ලේකම්වරයාගෙන් ඉල්ලීමක් කර ඇත.
මැතිවරණ කොමිෂන් සභාව වෙත මීට පෙර මැතිවරණ වියදම් වෙනුවෙන් අමාත්‍යංශය විසින් නිකුත් කල මුදල රුපියල් මිලියන 37කට ආසන්නය. මැතිවරණ කොමිෂන් සභාව සඳහන් කළේ පළාත් පාලන ඡන්ද විමසීම පැවැත්වෙන දිනය දක්වා කාලය තුළ රුපියල් බිලියන 04ක පමණ මුදලක් වැයවනු ඇතැයි අපේක්ෂා කරන බවයි.
රෂිකා හෙන්නායක
