මෙරට තරුණ තරුණියන්ට ගෝලීය රැකියා වෙළඳපොලේ තොරතුරු තාක්ෂණ රැකියා අවස්ථා ලබාදීම අරමුණු කරගනිමින් පිහිටුවන ඩීපී සිලිකන් වැලී අයිටී ඔෆීස් පළමු මධ්‍යස්ථානය අද (10) විවෘත කිරීමට නියමිතව තිබේ.
ඒ, තිස්සමහාරාම උද්ධකන්දර රජමහා විහාරස්ථානයේදී ය.
ඩීපී එඩියුකේෂන් නිර්මාතෘ සහ සමසභාපති ධම්මික පෙරේරා මහතාගේ ප්‍රධානත්වයෙන් මෙම මධ්‍යස්ථානය අද දිනයේදී විවෘත කෙරෙනු ඇති අතර උද්ධකන්දර රජමහා විහාරයේ පිහිටි ඩීපී එඩියුකේෂන් අයිටී කැම්පස් ආයතනයේ පරිගණක භාෂා පාඨමාලාව හදාරා රැකියා සුදුසුකම් සම්පූර්ණ කළ තරුණ තරුණියන් පිරිසකට මෙහි රැකියා අවස්ථා විවර වේ.
ඩීපී එඩියුකේෂන් අයිටී කැම්පස් ආයතන පිහිටුවීම ආරම්භ කෙරුණේ 2023 පෙබරවාරි මාසයේදී ය. ඒ අනුව මාස 11ක් තුළ එම අයිටී කැම්පස් හරහා අධ්‍යාපනය ලබන්නන් වෙනුවෙන් පළමු රැකියා මධ්‍යස්ථානය විවෘත කිරීම විශේෂත්වයකි.
දිවයිනේ සෑම ප්‍රාදේශීය ලේකම් කොට්ඨාසයකටම එක බැගින් ඩීපී එඩියුකේෂන් අයිටී කැම්පස් ආයතන 331ක් පිහිටුවීමට සැලසුම් කර ඇති අතර දැනටමත් එයින් 100 කට අධික සංඛ්‍යාවක් විවෘත කර තිබේ. එම අයිටී කැම්පස්වලින් පරිගණක භාෂා පාඨමාලා හදාරණ තරුණ තරුණියන්ට තම ගම් ප්‍රදේශයේදීම තොරතුරු තාක්ෂණ රැකියාවක නිරත වීමට අවස්ථාව සැලසීම ඩීපී සිලිකන් වැලී ඔෆීස් බිහිකිරීමේ අරමුණ වී ඇත.
මෙය ධම්මික සහ ප්‍රිසිලා පෙරේරා පදනමේ තවත් සමාජ සත්කාරයකි.
RN
