Author: Nishman Ranasinghe

නිශ්මං රණසිංහ අප්‍රේල් 26, කොළඹ LNW:

තායිලන්තයේ පැවත්වෙන ආසියානු කාන්තා බේස්බෝල් සූරතාවලියට සුදුසුකම් ලැබීමේ තරගාවලියේදී එක් ජයග්‍රහණයක් පමණක් ලද ශ්‍රී ලංකාව සුපිරි වටයෙන් පිටතට වීසි වුණා.මෙම තරගාවලියේදී පළවැනි ජාත්‍යන්තර ජයග්‍රහණය ලබා ගනිමින් ශ්‍රී ලංකා ක්‍රීඩිකාවන් ලකුණු 13 – 0 ක් ලෙස ඉරාන කාන්තා කණ්ඩායම පරාජය කරනු ලැබුවා.තරගාවලියේ සිය පළමු තරගය වූ ඉන්දියාවට එරෙහි තරගයේදී ලකුණු 14 – 4 ක් ලෙස පරාජයට පත් වීම ඇතැම් විට පළමු තරගයට මුහුණ දීමේ කුලෑටිකම විසින් ඇති කළ තත්ත්වයක් විය හැකියි.

ඉන්දියාව සමඟ කරට කර තරගයක් දෙමින් ලකුණු 1-2 ක් ලෙස පරාජය ලැබූ පකිස්තානයට එරෙහිව ශ්‍රී ලංකාව පරාජය වූයේ ලකුණු 10 – 5 ක් ලෙසයි.එහිදී ඉන්දියානු තරගයට වඩා වර්ධනයක් පෙන්වමින් ශ්‍රී ලංකා ක්‍රීඩිකාවන් ක්‍රියා කළා.තරගාවලියේ මූලික තරගවලින් පසුව සුපිරි වටයට ශ්‍රී ලංකාව සිටි ඒ කාණ්ඩයෙන් ඉන්දියාව සහ පකිස්තානය සුදුසුකම් ලබා සිටින අතර බි කාණ්ඩයෙන් ඉන්දුනීසියාව සහ තායිලන්තය සුදුසුකම් ලබා සිටිනවා.

එහෙත් ශ්‍රී ලංකාව ශ්‍රේණිගත කිරීම් සඳහා වන තරග සඳහා මුහුණ දීමට නියමිත අතර අප්‍රේල් 27 වන දා ඔවුන් මැලේසියාව සමඟ තරග වැදීමට නියමිතව සිටිනවා.

http://www.sportwaynews.com/

නිශ්මං රණසිංහ අප්‍රේල් 26, කොළඹ LNW:

ඉන්දුනීසියාවේ පැවත්වෙන ආසියානු හොකී සම්මේලන තරගාවලියේ ශ්‍රේණිගත කිරීම් සඳහා වන තරග සඳහා ඉදිරිපත් වූ ශ්‍රී ලංකා පිරිමි කණ්ඩායමට තරගයේ අවසාන භාගයේ දි හොංකොං කණ්ඩායම ලබා ගත් ගෝලය නිසා අද තායිලන්තය සමඟ තරගාවලියේ හත්වන හෝ අටවන තැන වෙනුවෙන් සටන් කරන්නට සිඳුවෙනවා.ශ්‍රී ලංකාව හොංකෙං තරගය ජය ගත්තේනම් අද ඔවුන්ට තරග කරන්නට සිදුවන්නේ උසබෙකිස්තානය සමඟයි.ඒ 5 හෝ 6 වන ස්ථානය ලබා ගැනීම සඳහායි.

ශ්‍රී ලංකාව ලෝක ශ්‍රේණිගත කිරීම්වල 41 වන තැන සිටින අතර හොංකොං සිටින්නේ 50 වන තැනයි.ඒත් තරග අත්දැකීම් ලබා ගැනීමේදී හොංකොං වැනි රටකට ඇති ක්‍රීඩා කිරීමේ අවස්ථා ශ්‍රී ලංකාවට ලබා ගැනීමට වත්කමක් නැහැ.එසේ නොවීම ද ශ්‍රී ලංකා හොකී කණ්ඩායම පහත වැටීමට බලපාන බව කිව යුතුයි.

කෙසේ වුවත් තරගයේ පළමු අර්ධය නිමා වන විට ශ්‍රී ලංකාව ගෝල 3 – 3 ක් ලෙස සම තැනක සිටියා.තරගයේ පළමු තාක්ෂණ විවේකය එළැඹෙන මොහොත වන විට ශ්‍රී ලංකාව 2-1 ක් ලෙස ඉදිරියට එන්නට ද සමත්ව තිබුණා.ශ්‍රී ලංකාව වෙනුවෙන් පළමු අර්ධය නිමා වන විට ධම්මික රණසිංහ (6 වන විනාඩිය),උදයශාන් ප්‍රනාන්දු (14 වන විනාඩිය) සහ සුරේෂ් රත්නායක (18 වන විනාඩිය) ගෝල ලබා ගනිමින් ලකුණු පූවරුව 3-1 ක් ලෙස සකස් කර ගන්නටද සමත් වුණා.එහෙත් පළමු අර්ධය නිමා වන්නට මත්තෙන් ක්‍රියාත්මක වූ හොංකොං ක්‍රීඩකයින් පළමු අර්ධය නිමාවන මොහොත වන විට 3-3 ක් ලෙස ලකණු තත්ත්වය සම කර ගන්නට සමත් වුණා.

දෙවන අර්ධයේ දී දෙපිළේම ආරක්ෂක අංශයන් දැඩිව තරගයේ යෙදුණ අතර ඒ හොංකොං ආරක්ෂාව බිඳ ගෝලයක් ලබා ගන්නට හැකි වුණේ ධම්මික රණසිංහ පමණයි.ඒ අනුව ධම්මික මේ තරගයේදි ශ්‍රී ලංකාව ලද ගෝල 4 න් දෙකකම හිමිකාරීත්වය ලබා ගැනීමට සමත් වුණා.
TSANG Kin Kan, ALI Farman, IU Felix Chi Him, AU Pak Ko Parco, HO Ching (C) හොංකොං කණ්ඩායම වෙනුවෙන් ගෝල රැස් කිරීමට සමත් වුණා.දියුණු තරගයක් ලබා දීමට සමත් වුවත්,තමන්ට වඩා ලෝක ශ්‍රේණිගත කිරීම්වල අංක නවයක් පසුපසින් සිටින හොංකොං කණ්ඩායම ඉදිරියේ අවසානයෙ පරාජය වී නැවතීමට ශ්‍රී ලංකා කණ්ඩායමට සිඳු වුණා.

අද ශ්‍රී ලංකාව තරග වදින තායිලන්ත කණ්ඩායම ද සිටින්නේ ශ්‍රී ලංකාවට බොහෝ පසුපස ශ්‍රේණියකයි.ඔවුන් 66 වන ස්ථානයේ පසුවෙනවා.ප්‍රථම වටයේදී දෙපිළ මුණ ගැසුණ මොහොතේ තායිලන්තය තරගය 1-1 ක් ලෙස තරගය ජය පරාජයෙන් තොරව නිමා කර ගැනීම නිසා මේ තරගයේදී තමන්ගේ තත්ත්වය ආරක්ෂා කර ගැනීම වෙනුවෙන් ශ්‍රී ලංකාවට විශාල සටනක් දිය යුතුව තිබෙනවා.ශ්‍රී ලංකාව මේ තරගාවලියේ දී ලද කණගාටුදායකම පරාජය අත් කර ගත්තේ සහභාගි වූ පළමු තරගයේදී යි.එහිදී ලෝක ශ්‍රේණිගත කිරීම්වල 82 වන තැන පසුවන කසකස්තානය ඉදිරියේ 3-2 ක් ලෙස පරාජයට පත් වුණා.

මේ පරාජිත ඉරණමට ක්‍රීඩකයන් මුහුණ දීම සම්බන්ධයෙන් නොයෙක් දුක් අදෝනාවන් පසෙකලා වගකීම පරිපාලනය විසින් පවරා ගත යුතු වෙනවා.ක්‍රිඩා සමාජ මේ සඳහා ආර්ථිකමය වැඩ පිළිවෙලක් සකස් කර එය ක්‍රියාත්මක කිරීමට හැකි පරිපාලනයක් ගෙන ආ යුතු වෙනවා.එසේ නොවන තාක් වන්නේ තරගාවලියක් ආසන්නයේ සුළු කාලයක් කණ්ඩායමක් තෝරා එය ශ්‍රී ලංකා කණ්ඩායම හැටියට ඉදිරිපත් කර ජාත්‍යන්තර තරග ලිටියේ ශ්‍රී ලංකාවට ඇති කීර්තිය දවසින් දවස හිඳෙන්නට හැරීමයි.ක්‍රීඩා අමාත්‍යංශයද මේ සම්බන්ධයෙන් අවධානය යොමු කළ යුුතු අතර සමස්ත රජය තමන්ගේ දේශපාලන පිනවීම් සඳහා ක්‍රීඩා අමාත්‍යංශයට සහ ක්‍රීඩාවට තනතුරු ප්‍රදානය කිරීම හැරෙන්නට දැක්මක් සහිතව ක්‍රියාත්මක වන බවක් පෙනෙන්නට නැති අතර සොයන බවක් ද දකින්නට නැහැ.

එසේ වන්නේනම් මැලේසියාවට එරෙහි රගර් තරගයේදී ක්‍රීඩා අමාත්‍යවරයාට එය ආණ්ඩුවේ තේමා පාඨය පෙරට දමා අඳහාගත නොහැකි ජයක් ලැබූ අන්දමෙන් සිය සමාජ මාධ්‍යවල සටහන් තබන්නට දෙන්නේ නැහැ.එසේම දේශපාලනිකව රටට හානිකර සිඳුවීමට පරදේසක්කාර ක්‍රීඩකයන් යෙදවීමට එරෙහිව මැලේසියාව විසින් ආනයනය කළ ක්‍රීඩකයන්ට 100% ක් දේශිය වූ ලාංකේය ක්‍රිඩකයන් දුන් පිළිතුර ද උත්කර්ශයට නඟන්නට තිබුණා.ඒත් ක්‍රීඩා අමාත්‍යවරයා වචනවලට අමතරව පරණ නාරාවල තුළම අසරණ කර ඇති තත්ත්වයක් ආණ්ඩුවේ ක්‍රීඩාව හැසිරීම තනතුරු ප්‍රදානයට ගන්නා තීරණ තුළ දකින්නට තිබෙනවා.

හොකී පිරිමි කණ්ඩායම යම් ආකාරයක සාධනීය මටටමකින් ක්‍රිඩා කළත්,ලෝකය ඔවුන්ව එකතැන නතරව සිටියදී පසුකර යමින් තිබෙන බව දැක ගන්නට හැකියි.මේ තත්ත්වය රටක් හැටියට අවබෝධ කර ගැනීම සහ සාකච්ඡාවට ගැනීම වැදගත් වන බව මේ තරගාවලියේ ප්‍රතිපල පැහැදිළි කරනවා.ආසියානු ආධිපත්‍යෙය් තිබුණ රගර් යුරෝපය විසින් අ්ත්පත් කර ගැනීමේ තත්ත්වයට බලපාන ආර්ථික සහ තාක්ෂණික පරිසරයේ සිට ක්‍රීඩාව වෙනස් වුණ ශිල්පීය ක්‍රමවේද වෙනුවෙන් සිය සම්ප්‍රදායන් අත හරිමින් ඉන්දියාව වැනි රටවල් පිවිසෙන්නට උත්සාහ දරමින් සිටිනවා පෙනෙනවා.ඔවුන් ඇත්තටම ලෝකයේ ක්‍රිකට් රජුන් නොව හොකී රජුන් ලෙස දිනා ගත් කීර්තිය අදටත් අද්විතීය මට්ටමක තිබෙනවා.ඒ ඉතිහාසය අත්පත් කර ගැනීම වෙනුවෙන් ඉන්දියාව සිය ව්‍යහුය වෙනස් කරමින්,වැය කරන කාලය සහ ශ්‍රමය තරමට නොවුණත්,ශ්‍රී ලංකා කණ්ඩායම්වලට මීට වඩා ජාත්‍යන්තර තරග අත්දැකීම් ලබා දිය හැකි ආර්ථික පරිසරයක් හොකී පරිපාලනය තුළ ඇති විය යුතුයි.

http://www.sportwaynews.com/

නිශ්මං රණසිංහ අප්‍රේල් 25, කොළඹ LNW:

රිටේ තේරිමේ පරිසාධනය ආසියාවේ උඩටම උස්සා, ලංකාවේ රිටේ ජය පොළවේ ගැසූ මොහොතක්

ගෙවුණු අවුරුදු 18 න් පහළ ආසියාතික මලල ක්‍රීඩා සූරතාවලියේදී ජය ගත් ක්‍රීඩකයන් ගැන මෙන්ම තරගාවලියට සහභාගි වී තරගයට සහභාගි වීමට නොහැකි වූ ක්‍රීඩකයින් ගැන ද කතා බහ කරන අතරේ අප අවධානය යොමු කළේ තරගාවලියට සහභාගි වූවේනම් පදක්කමකට යා හැකිව තිබූ එහෙත් තෝරා නොගත් ක්‍රීඩකයින් සිටිනවාද යන්නයි.
තෝරා නොගැනීම් ගැන විවිධ හේතු තිබිය හැකියි.එයට ප්‍රධාන වශයෙන් කණ්ඩායම සීමාවීමට ක්‍රීඩා අමාත්‍යංශයෙන් ලබා දෙන ප්‍රතිපාදනවල අඩුවද හේතුවක් වෙනවා.එසේම ඒ සහභාගි වූ අතැම් ක්‍රීඩක ක්‍රිඩිකාවන් වෙනුවෙන් බර පැන දැරීමත් මලල ක්‍රීඩා සංගමය විසින් කළ බවත් අප දන්නවා.එසේම මලල ක්‍රීඩා සංගමය විසින් දෙනු ලැබූ පරිසාධන මට්ටම ඉක්මවා නොයාමද නොතේරෙන්නට හේතු වන බවත් අප දන්නවා.
මේ සියල්ල පිළි ගනිමින් මෙවර ආසියානු මට්ටමෙන් අවුරුදු 18 න් පහළ රන් පදක්කමක් එම තෝරා ගැනීම සිඳු කළ පරිසාධන මට්ටමෙන් මෙපිට අගයකට හිමි වී තිබෙන බව අවුරුදු 18 න් පහළ ආසියාතික මලල ක්‍රීඩා සූරතාවලියේ ප්‍රතිපල ලේඛණයන් නිරීක්ෂණයේදී දැක ගන්නට ලැබෙනවා.මිටර් 4.50 ක උසක් බාලක රිටි පැනීමේ පරිසාධන මට්ටම ලෙස දක්වා තිබුණ අතර ඒ නිසා එම තරගය ජය ගත් බෝපිටිය ලොයෙලා විදුහලේ සෙනෝද් ඩිලන්ද ට වාර්තා කිරීමට හැකියාව ලැබුණේ මීටර් 4.30 ක් පමණක් වීම නිසා එම ඉසව්වට සහභාගි වන්නට නොහැකි වෙනවා.එහෙත් මෙම ආසියානු යොවුන් තරගාවලියේදී පිරිමි රිටි පැනීමේ ඉසව්වේ රන්,රිදී සහ ලෝකඩ යන පදක්කම් ත්‍රිත්වයම හිමිව ඇත්තේ මීටර් 4.20 ක උසට බව ප්‍රතිපල ලේඛණය පැහැදිළි කරනවා.

මෙම තිදෙනාගෙන් දෙදෙනෙක්ම දැක් වූ මීටර් 4.20 ක දක්ෂතාවය ඔවුන්ගේ හොඳම දක්ශතාවයද වෙනවා.රිදී පදක්කම ලැබූ කටාර් ක්‍රීඩකයා පමණක් සිය උපරිම දක්ෂතාවය ලෙස මීටර් 4.75 ක් වාර්තා කරනවා.එසේනම් ශ්‍රී ලංකාවේ රිටි පැනීම සඳහා තේරීම මීටර් 4.50 ක් වූයේ ඇයි යන්න විමසා බැලිය යුතුය.
රිටි පැනීම ඉසව්ව ශ්‍රී ලංකාවේ මලල ක්‍රීඩාව තුළ ජාත්‍යන්තර අවස්ථා අඩුවෙන් ලැබෙන ඉසව්වක් වන අතර ඒ සම්බන්ධයෙන් හොඳ අතට මෙන්ම නරක අතට ද අත්දැකීම් ඇත.ක්‍රීඩා නියෝජ්‍ය අමාත්‍යවරයා මලල ක්‍රීඩා සභාපතිව සිටියදී මේ රිටි පැනිමේ ඉසව්ව සඳහා දකුණු ආසියාතික ක්‍රීඩා උළෙල නියෝජනය කළේය.එහිදී ඉෂාර සඳරුවන් රන් පදක්කම දිනා ගැනීමට සමත් විය.එසේම එම අවධියේ ලද තවත් ජාත්‍යන්තර තරග අවස්ථාවකදී ද,ඉෂාර ජයග්‍රහණයන් අතරට පැමිණි බවද අපට මතකය.

ඉන් අනතුරුව යළිත් මේ ඉසව්ව දෙස යහපත් බැල්මක් බලධාරීන් විසින් යොමු නොකළ බව ඇත්තකි.එක දිගට ජාතික වාර්තාව බිඳ දමමින් සචිනි පෙරේරා දස්කම් දක්වදිදිත් ඇයට කිසිඳු ජාත්‍යන්තර තරග අවස්ථාවක් නොලැබි අතර එහි ප්‍රතිපලයක් ලෙස ඇය විදේශ රටක දරුවෙකු බලා ගන්නට යොමු වූවාය.ඒ ලංකාවේ ජාතික වාර්තාව එක දිගට බිඳ දැමීම සම්බන්ධයෙන් ඇයට උරුම වූ වෘත්තීය ය.
ඉනික්බිති දමා තිබු පරිසාධන මට්ටම ඉක්මවමින් යොවුන් තරගාවලියට ඉදිරිපත් වීමට තුෂේන් සිල්වා සමත් විය.එහෙත් ඔහුට තරගයට රිට රැගෙන යාමටවත් ඉඩක් නොලැබි අතර එහෙත් ඔහු එම තරගාවලිය රිදී පදක්කමක් ගෙන නිම කරන්න සමත් විය.රිට පැනීම නොසළකා හරින අතර සැළකුම් ලැබෙන අවස්ථාවන් හී පෙරළා රටට ද ගෞරවය හිමිවන තත්ත්වයක් ඉතිහාසයේ ඇත.එසේනම් ඒ ඉතිහාස සාධක මත ආසියාවේ වෙනත් රටවල්වලට වඩා වැඩි පරිසාධන මට්ටමක් මේ ඉසව්ව සඳහා නම් කළේ ඇයි ද යන්න සොයා බැලිය යුතුය.

පැවති තත්ත්වයන්ට අනුව එම ඉසව්ව සඳහා සෙනෝද් ඩිලන්ද වාර්තා කළ මීටර් 4.30 පරිසාධනය ඉක්මවා යාමක් නොවුණ බව අපි පිළිගන්නෙමු.එහෙත් තරගාවලියේ සෙසු රටවල් නියෝජනය කරමින් පැමිණ පදක්කම් ලැබූ ක්‍රීඩකයන් 4.30 ක දක්ෂකමක් නොදක්වා එම තරගාවලිය නියෝජනයට පැමිණ තිබෙන බව පැහැදිළිය.එසේනම් විමසා බැලිය යුතු වන්නේ පරිසාධන මට්ටම 4.50 ක් කරන්නට හේතු වූ සාධක කවරේද යන්නය.එයට හේතු විමසීම වැදගත්ය.එහෙත් විමසනු ඇද්ද යැයි අපි නොදනිමු.

සාමාන්‍ය පරිදි තරගාවලියක් නිමාවේ දර්ශනය වන හොඳ සහ නරකවලට අමතරව දර්ශනය නොවන මෙවැනි කරුණුද අවධානයෙන් පිරික්සා බැලීම වැදගත්ය.එය රටේ ක්‍රීඩාවේ පැවත්ම සඳහා වන යහපත් ප්‍රමිතියකට හේතුවන බව අපි විශ්වාස කරන්නෙමු.මේ දක්වා පැරා ඔලිම්පික් උළෙලවල දක්ෂයන්ට අදාළ ත්‍යාග පිරිනැමීම දෙස ඇසක් ඇරවත් නොබලා සිටින රටේ ක්‍රීඩා පරිපාලනයට රටේ ක්‍රීඩකයෙකුට දක්ෂතා සහිතව තිබියදී රට නියෝජනය කරන්නටවත් අවස්ථාවක් නොලැබී යාම දැනෙයිද කියා අපි විමසිල්ලෙන් සිටිමු.තරගාවලියේ පසු විපරමකට අදාළව අමාත්‍යංශය කතා කළ යුතු බව අප බොහෝ කල් සිට කියන්නෙමු.
එසේ නොවන නිසාම ක්‍රිඩා නියෝජ්‍ය අමාත්‍යවරයා ක්‍රීඩකයෙකුව සිටියදී ද ගැටළුවලට මුහුණ දුන් බව ද අපි දනිමු.වැරදි පැවත්ම ලෙස රැඳෙන ක්‍රමය නවත්වන්නට දැන්වත් ක්‍රියා මාර්ගයක් ගනු ඇද්ද?අඩුම තරමේ කරුණු විමසීමක් කර එසේ පරිසාධන මට්ටම ආසියාවේ වෙනත් රටවලට ඉහළින් තැබීමට අධ්‍යයනයේදී පෙනෙන්නට ඇති රිටට දක්වන කුඩම්මාගේ සැළකිල්ල හේතු විණිද යන්න නිරාකරණය කර ගත යුතු නැද්ද?

http://www.sportwaynews.com/

නිශ්මං රණසිංහ අප්‍රේල් 25, කොළඹ LNW:

ගෙවුණු නින්ග්බෝ බැංකු ආසියානු බැඩ්මින්ටන් සූරතාවලියේ දී ශ්‍රී ලංකාවේ ජාතික සූරයා වන විරේන් නෙත්තසිංහ මේ මොහොත වන ලෝක ශ්‍රේණිගත කිරීම්වල පස්වන තැන සිටින චීනයේ ලී ෂී ෆෙන්ග් ට එරෙහිව පරාජය ලැබුවත් ඉතා විශිෂ්ට තරගයක් ලබා දෙන්නට සමත් විය.ලෝකයේ විශිෂ්ඨම බැඩිමින්ටන් ජාතිය ලෙස පිළිගැනෙන චීන ජාතිකයෙකු වන ලී ට එරෙහිව චීන ක්‍රීඩා ලෝලීන්ගේ උද්යෝගීමත් කිරීම් මැද අවුරුදු 21 ක තරුණ ක්‍රීඩකයෙක් හැටියට විරේන් පෑ දස්කම ඉතා ඉහළින් පැවතිණ.

දරා ගැනීම,මානසික ඒකාග්‍රතාවය මෙන්ම ප්‍රතික්‍රීයක වේගය අතින් ඔහු දැක් වූ හැකියාව සමඟ ලී ට විරේන් අභිබවා යාමට සිඳු වූයේ ලකුණු 21 – 19 සහ 21 -19 ක් ලෙස ය.ඉකුත් කාලයේ වැඩි දේශිය ක්‍රීඩක පිරිසකට ජාත්‍යන්තර අත්දැකීම ලබා දීම සඳහා පෞද්ගලිකව සිය ධනය පවා වැය කරමින් වත්මන් බැඩිමින්ටන් සභාපති රොහාන් ද සිල්වා විසින් ගත් උත්සාහයේ අනගිතම ප්‍රතිපලය වන විරේන්,මේ තරගයේදී සමස්ත ලාංකේය බැඩිමින්ටන් ක්‍රීඩාව කෙරෙහිම ලෝක බැඩිමින්ටන් ප්‍රජාවගේ අවධානය යොමු කරවන්න සමත් විය.

මේ සමඟ ඇත්තේ විරේන් ගේ විශිෂ්ඨ දක්ෂතාවලින් ඔපවත් වුණ එම තරගයයි.

http://www.sportwaynews.com/

නිශ්මං රණසිංහ අප්‍රේල් 25, කොළඹ LNW:

මේ දිනවල ශ්‍රී ලංකා කාන්තා බේස්බෝල් කණ්ඩායම සිටින්නේ තායිලන්තයේය.ඔවුන් ආසියානු කුසලාන සුරතාවලියට සුදුසුකම් ලබා ගැනීමට එහිදී සටන් වදිමින් ඇත.ශ්‍රී ලංකාව මූලික තරගයට මුහුණ දෙන කාණ්ඩයට ඉරානය,ඉන්දියාව සහ පකිස්තානය ඇතුළත්ය.මේ වන විට ශ්‍රී ලංකාව ඉන්දියාව වෙතින් 14 – 0 ක පරාජයක් ලබා සහ ඉරානය වෙතින් 13 – 0 ක ජයක් ලබා පකිස්තානය මුණ ගැසීමට සූදානම්ව සිටියි.
එහෙත් මේ තරගාවලිය සම්බන්ධයෙන් ශ්‍රී ලංකාවේ බේස්බෝල් ක්‍රීඩාවට මෙන්ම ශ්‍රී ලංකාවේ ගුවන් තොටුපළ කාර්ය මණ්ඩලයට මෙන්ම සෞඛය අංශවලට ද මහත් ගෞරවණීය තත්ත්වයක් ඇති වෙන සිඳුවීමක් සිඳුව,එය සමාජගත නොවී සැඟවී තිබේ.එය එහෙත් පකිස්තානු කණ්ඩායම බලධාරියා විසින් හෙළි කර ඇත.

සයිඩ් පකාර් අලි එහි සුවිශේෂී පිදුම පුද කර සිටින්නේ ශ්‍රී ලංකාවේ බේස්බෝල් සංගමයේ මෑතක් වන තුරුම ප්‍රධාන විධායකයා ලෙස ඉහළ සේවයක් සිදු කළ තීක්ෂණ ගම්මන්පිලටය.මේ වන විට එහි ක්‍රියාකාරීත්වය සම්බන්ධයෙන් වන ඇතැම් නිලධාරීන්ගේ ප්‍රශ්නකාරී සහ සැක මුසු හැසිරීම් අරභයා ඔහු එම තනතුරෙන් ඉවත්ව සිටින අතර ඒවා ඉහළ මට්ටමෙන් අවධානය යොමු නොවන කාරණා බවට පත් වී තිබේ.
ආගමන විගමන නීති උල්ලංඝණය කළ ද,එය ප්‍රතිවිරුද්ධ දේශපාලකයාට අවමන් කිරීමට පමණක් යොදා ගන්නා අමාත්‍යවරයෙකු යටතේ,ආශිර්වාදය ලබන අයෙකු මෙහි ප්‍රධානියා ලෙස කටයුතු කරන බැවින්,මෙවැනි ඉල්ලා අස්වීම් නිසා සිඳුවන ගැටළු පිළිබඳව අවධානය යොමු වනු ඇතැයි සිතිය නොහැකිය.දැන් එම වැරදිකාර පරිපාලනයේම සිටි ප්‍රධාන විධායකයා පසුව බේස්බෝල් ක්‍රීඩාවටද සම්බන්ධව සිට දැන් අමාත්‍යවරයාගේ ජාතික ක්‍රීඩා සභාවේ සභාපතිව සිටින බැවින් ගැටළුව තව දුරටත් සැඟව දේශපාලන ආශිර්වාදය හිමි වීමට ඇති ඉඩ ද සුවිශාලය.

ලංකාවේ විදේශිකයන් සම්බන්ධයෙන් ආගමන විගමන නීති උල්ලංඝණය කරමින් කටයුතු කිරීමේ චෝදනාවට වගකිව යුතු අය බේස්බෝල්වලට සම්බන්ධව සිටියත් මේ කාරණය පකිස්තානයේ ප්‍රශංසාවට ශ්‍රී ලංකාව ඉහළින්ම ලක් කළ හිටපු බේස්බෝල් ක්‍රීඩකයෙකු සහ පරිපාලනයේ ඉහළ වගකීමක් දරා අසාධාරණයට එරෙහිව ඉවත් වූ අයෙකු පිළිබඳවය.පකිස්තානය ඔහුට ගරු කරන්නේ ඔහුගේ ක්‍රීඩාවෙන් ලබා ගත් දැන හැඳුණුම්කම්වලටය.

නමීන් තීක්ෂණ ගම්මන්පිල වූ ඔහුට සයිඩ්ගේ ඇමතුමක් ලැබෙන්නේ කටුනායක ගුවන් තොටුපළේ සිට ය.ඒ කරච්චි සිට තායිලන්තය බලා යමින් සිටියදී ය.ඔවුන්ගේ අතරමැදි නැවතුම් මධ්‍යස්ථානය වූයේ කටුනායකය.
කටුනායකට බට පකිස්තාන බේස්බෝල් කණ්ඩායමේ සාමාජිකාවක වන ගුල් ෆෙරෝෂා ට යම් හෘදයාබාධයක ලක්ෂණ මතු වන්නට ගන්නේය. ෆෙරෝෂා ට ශ්‍රී ලංකාවේ ක්‍රිකට් ක්‍රීඩිකාවන්නම් දන්නේය.ඒ ඇය බේස්බෝල් කණ්ඩායමේ පමණක් නොව පකිස්තානු ජාතික ක්‍රිකට් කණ්ඩායමේ ද ක්‍රිඩිකාවක බැවින්ය.ඒ නිසා පකිස්තානු කණ්ඩායම් ප්‍රධානියා මේ අසීරු අවස්ථාවේ තමන්ගේ ලාංකේය බේස්බෝල් හිතවතාට ඇමතුමක් ගත්තේය.
ඒ අනුව ගුවන් තොටුපළ කාර්ය මණ්ඩලය සමඟද සම්බන්ධ වෙමින් කලාපීය බේස්බෝල් හිතවතා වෙනුවෙන් සියළු වැඩ පසෙකලා තීක්ෂණ ෆෙරෝෂා රැඟෙන ගිය මීගමුව රෝහල වෙත ගියේය.මිගමුව රෝහල් කාර්ය මණ්ඩලය ද හැකි උපරිම ඉක්මණින් සිය ආගන්තුක විදේශිය ක්‍රීඩිකාව වෙනුවෙන් ප්‍රතිකාර සහ පරීක්ෂණ සිඳු කරන්නට යුහුසුලුව ඉදිරිපත් විය.දිවා භෝජනය ආදිය තීක්ෂණ අතින් සිය හිතවතාට ලැබිණ.ඒ සියල්ලට වඩා නාදුනන රටක සහෝදරයෙකු මෙන් තමන් අසළින් රැදී සිටීම කුසට වඩා ඔහුගේ හිත නිවන්නට ඇත.

මේ සියල්ල අතරේ තායිලන්තය බලා යන ගුවන් ගමන වෙනුවෙන් ගුවන් තොටුපළේ සූදානම කවරේද යන්න මෙන්ම මීගමුව රෝහලේ සිටිය රෝගියා සම්බන්ධ වැඩ කටයුතු කවරේද යන්නත් තීක්ෂණට දැණුම් දෙන්නත්,තීක්ෂණගෙන් දැන ගන්නටත් ගුවන් තොටුපළ කාර්ය මණ්ඩලය කාරුණික විය.මිත්‍රශිලී විය.
අවසානයේ පමාවක් නොමැතිව ෆෙරෝෂා තායිලන්තය බලා පියාසර කළේය.ඒ පිළිබඳව සයිඩ් ෆකාර් අලිගේ ෆේස්බුක් සටහන අපේ ගැස ගැටීමෙන් ඉනික්බිතිව අප අපහසුවෙන් තීක්ෂණව සම්බන්ධ කර ගෙන එම තොරතුරු විමසා බැලුවේය.ඒ අප සතුව ඇති බේස්බෝල් ගැන අදහස දැන ගන්නට නොව මේ සිඳුවීම ගැන අදහස දැන ගන්නටය.අවසානයේ බොහෝ අපහසුවෙන් අපි තික්ෂණගෙන් ඔහු සහ පකිස්තානු පරිපාලකයා සහ ෆෙරෝෂා සිටින ඡායාරූපද ඉල්ලා ගත්තෙමු.මේ සටහන තීක්ෂණට,ලංකාවේ ගුවන් තොටුපළ සේවයට මෙන්ම මීගමුව රෝහලේ මැදිහත්වීම්වලින් රටට අත් කර දුන් කීර්තිය වෙනුවෙන් ගේරවය සහ ස්තූතිය දක්වන්නටය.

http://www.sportwaynews.com/

නිශ්මං රණසිංහ අප්‍රේල් 25, කොළඹ LNW:

ඉන්දුනීසියාවේ පැවත්වෙන ආසියානු හොකී සම්මේලන තරගාවලියේ කාන්තා සහ පිරිමි අංශයෙන් තරග වදින ශ්‍රී ලංකා කණ්ඩායම් දෙකම අද ශ්‍රේණිගත කිරීමේ තරගවලට ඉදිරිපත්වීමට නියමිතය.කාන්තා කණ්ඩායමට තරගාවලියේ හයවන හෝ පස්වන ස්ථානය සහතික කර ගැනිම සඳහා උද්බෙකිස්තානය සමඟ තරග කිරිමට නැවත සිඳු වී ඇත.මීට පෙර හමුවීම 2-2 ක් ලෙස ජය පරායෙන් තොරව අවසන් කර ගත් ශ්‍රී ලංකා කණ්ඩායම යළිත් ඉන්දුනිසියාවට එරෙහිව පැවති තරගයද 2-2 ක් ලෙස නිමා කර තරගාවලියේ හය මෝ පස්වන ස්ථානය තමන් සතු කර ගැනීමට අද දිනයේ තරග වැදීමට නියමිතය.

ශ්‍රී ලංකා පිරිමි කණ්ඩායම අද තරග බිමට පිවිසෙන්නේ හොංකොං කණ්ඩායමට එරෙහිවය.ඒ තරගාවලියේ 5,6,7 හෝ 8 වන ස්ථානය තීරණය වන තරගයක් සඳහාය.මේ දක්වා ඉන්දුනීසියාව පමණක් පරාජය කර සිටින ශ්‍රී ලංකාව සමඟ ඔවුන් තරග වදින ස්ථාන අත් කර ගැනීම වෙනුවෙන් තරග කරන අනිත් කණ්ඩායම දෙක වන්නේ තායිලන්තය සහ උස්බෙකිස්තානය ය.

නිශ්මං රණසිංහ අප්‍රේල් 25, කොළඹ LNW:

අබුඩාබි හී පැවත්වෙන ශ්‍රී ලංකා ඒ,ඇෆ්ගනිස්තාන ඒ සහ අයර්ලන්ත ඒ කණ්ඩායම් අතර තුන්කොන් තරගාවලියේ අවසාන තරගයට ශ්‍රී ලංකාව සහ අයර්ලන්තය පෙනී සිටින්නට නියමිතයි.අද පැවත්වෙන මෙම තරගයේදී මේ දක්වා අපරාජිතව සිටීම නිසාම මෙන්ම දක්වා ඇති දක්ෂතා අනුව ද ශ්‍රී ලංකාව කුසලානයට ආසන්නයෙන් සිටින බව කිව හැකියි.

විශේෂයෙන්ම අවසාන තරගය දක්වා පැවති තරගාවලියේ දත්ත සළකා බැලීමේදි ශ්‍රී ලංකා පන්දු යවන්නන් මේ තරගයේ ප්‍රතිවාදීන්ට එරෙහිව වැඩියෙන්ම බලපෑම් කළ පිරිස වී සිටිනවා.මේ දක්වා දක්වා ඇති දක්ෂතා පිළිබඳව අවධානය කරද්දි වැඩිම කඩුලුලාභින් අතර ඉදරියෙන්ම සිටින පන්දු යවන්නන් තිදෙනාම ලාංකිකයන් විම කැපී පෙනෙනවා.ඒ අතරින් තරග 4ක් ක්‍රීඩා කර ඇති තරිඳු රත්නායක කඩුලු 9 ක් බිඳ දමා වැඩිම කඩුලුලාභින් අතර පෙරමුණ ගෙන සිටිනවා.තරග 3 බැඟින් ක්‍රීඩා කළ දුෂාන් හේමන්ත සහ ඩිල්ෂාන් මධුශංක සම දෙවන තැන පසුවෙනවා.

පිතිකරණයේදි වඩාත් කැපී පෙණුන පිතිකරුවන් අතර පරාජිත ඇෆ්ගනිස්තාන කණ්ඩායම වෙනුවෙන් තරගාවලියේ ලකුණු 264 ක එකතුවක් තිබෙන නායක ඩාර්විස් රසූල් පළමු තැන සිටින්නේ තරග 4 ක් සඳහා ක්‍රිඩා කිරීමෙන් අනතුරුවයි.ඊ ළඟට පෙළ ගැසී සිටින දෙවන සහ තෙවන පිතිකරුවන් වන්නේ පිළිවෙලීන් නායක සධීර සමරවික්‍රම සහ ලහිරු උදාරයි.ඔවුන් දෙදෙනාම ක්‍රිඩා කර තිබෙන්නේ තරග තුන බැඟින් පමණයි.

එහෙත් අවසාන තරගය වෙනම අලුත් තරගයක් නිසා අද තරග මොහොතේ කණ්ඩායමක් හැටියට දක්වන සාර්ථකත්වය මෙන්ම පෞද්ගලික දක්ෂතා කණ්ඩායම වෙනුවෙන් කෙතරම් දුරට වැදගත් වේ ද යන ගැටළුව ද සහිතයි.ඒ නිසා අද දවස ශ්‍රී ලංකා කණ්ඩායම මේ තරගාවලියේ මූලික තරගවලදී දක්වන ලද දක්ෂතා කෙතරමි දුරට සුරක්ෂිත කර ගන්නේද යන්න සූරයන් වීමේ අභිප්‍රායට බලපානු ලබනවා.මෙහිදී වඩාත්ම සිහි තබා ගත යුතු කාරණය වන්නේ අයර්ලන්තය දෙවරක්ම මේ තරගාවලිය තුළ ශ්‍රී ලංකාවට පරාජය වී තිබෙන නිසා ඔවුන්ට මේ තරගයේ දී ආරක්ෂා කර ගන්නට දෙයක් නැති බව තේරුම් ගැනීමයි.ශ්‍රී ලංකාවට මේ දක්වා අඛණ්ඩව පවත්වාගෙන ආ ජයග්‍රහණ අවසාන තරගයේදි ද ආරක්ෂා කර ගන්නට සිඳු වි තිබෙනවා.මේ නිසා අයර්ලන්තයට ජයග්‍රහණය සොයා ආවොත් ආවා ගියොත් ගියා මාදිලියේ තරග සැළසුමකට පැමිණිය හැකි වුව ද ශ්‍රී ලංකාවට ඇත්තේ වඩා ආරක්ෂාකාරීව ජයග්‍රහණය සුරක්ෂිත කර ගැනීමේ සටනක්.ඒ පීඩනය සහ රදවා ගත යුතු මානසිකත්වය සම්බන්ධයෙන් ශ්‍රී ලංකා කණ්ඩායමට ඇති පුළුල් උවමනාව තුළ සාමාන්‍ය මට්ටමට එය කළමණාකරනය කර ගැනීම වැදගත් වනු ඇත.

http://www.sportwaynews.com/

නිශ්මං රණසිංහ අප්‍රේල් 25, කොළඹ LNW:

කෝල්ට්ස්,සීසීසි සහ එස්එස්සි ක්‍රීඩාංගණ පාදක කරගෙන ක්‍රියාත්මක එක්දින තරගාවලියකට මුහුණ දීමට බංගලාදේශ අවුරුදු 19 න් පහළ කණ්ඩායම ශ්‍රී ලංකාවට පැමිණ සිටිනවා.අප්‍රේල් 24 වන දින කෝල්ට්ස් පිටියේදී පැවත්වෙන පෙර පුහණු එක්දින තරගයකින් පසුව ශ්‍රී ලංකා සහ බංගලාදේශ අවුරුදු 19 න් පහළ කණ්ඩායම් අතර තවත් එක්දින තරග හයක් පැවත්වීමට කටයුුතු සූදානම් කර තිබෙනවා.

මේ ඡායාරූපයේ දැක්වෙන්නේ බංගලාදේශ කණ්ඩායම ශ්‍රී ලංකාවට පැමිණි අවස්ථාව වන අතර තරගාවලිය නියෝජනය කරන ශ්‍රී ලංකා කණ්ඩායමද,දෙපිළේ නායකයන් දෙදෙනා සූරතා කුසලානයද සමඟ සිටින ඡායාරූප මීට ඇතුළත් වෙනවා.
තරග පැවත්වෙන දින සහ ස්ථාන
අප්‍රේල් 24 වන පෙර පුහුණු තරගය Colts
අප්‍රේල් 26 වන දින පළමු යොවුන් එක්දින තරගය CCC
අප්‍රේල් 28 වන දින දෙවන යොවුන් එක්දින තරගය CCC
අප්‍රේල් 30 වන දින තෙවන යොවුන් එක්දින තරගය CCC
මැයි 4 වන දින සිව්වන යොවුන් එක්දින තරගය CCC
මැයි 5 වන දින පස්වන යොවුන් එක්දින තරගය SSC
මැයි 6 වන යොවුන් එක්දින තරගය Colts

http://www.sportwaynews.com/

නිශ්මං රණසිංහ අප්‍රේල් 24, කොළඹ LNW:

රාජපක්ෂ සමයේ අලුත් අවුරුදු සමයට ජාතික මට්ටමේ බොහෝ ක්‍රීඩක ක්‍රීඩිකාවන් පුහුණු වෙන ටොරිංටන් ක්‍රීඩා පිටිය ඔවුන්ගේ අවුරුදු ඉසව් පවත්වා ක්‍රිඩාවට නුසුදුසු තත්ත්වයට පත් කිරීම සම්ප්‍රදායක්ව පැවතිණ.නව රජය යටතේ එවැනි දෙයක් සිඳු නොවන බවට ටොරිංටන් පිටියේ විශාල කතා බස් ඇති විණ.
දැන් ඒ කාලෙ ඉවරයි

මාලිමා හිතවතෙක් මහා ශබ්දෙට කියන්නෙ පැරණි රජවරු ජාතික වටිනාකම් තියෙන තැන්,ඒවායේ වටිනාකම් නොසළකා තමන්ගේ සහ තම හිතවතුන්ගේ සේවකයන්ගේ සතුට වෙනුවෙන් විනාශ කිරීම නවතා ඇති බවට තදින් විශ්වාස කරමින්ය.

අවුරුද්දට අගමැතිගෙයි ජනාධිපතිගෙයි ගෙදර කිරි උතුරනවා පෙන්නන වැඩ සටහන් මේ ආණ්ඩුවෙ නැහැනෙ.එහෙමනම් මේ වැඩ කොහොමත් නැහැ.
මාලිමානුවා පවසන්නේ උදාහරණය.
ඒත් මේ ඒ කතාවල ශබ්ද සියල්ල නිශ්ශබ්ද කරමින් ටොරිංටන් පිටිය ජනාධිපති ලේකම් කාර්යාලයේ මෙහෙයවීමෙන් අවුරුදු සිරියට සැරසෙයි.එහි මීටර් 100 ධාවනයට යොදා ගත් ඉඩ ලංකාවේ පළමු පුරවැසියා විසින් වෙන් කර ඒ ඉඩ පුහුණුවීම් සඳහා යොදා ගත් අයට පසු බසින්නට වි ඇත.ටොරිංටන් අනුර කුමාර ජනාධිපති උතුමාණන්ගේ කාර්යාලීය වින්දනය පිණිස කැප කරන්නට,එයින් පිටියට වන හානිය ඉවසා සිටින්නට ක්‍රීඩකයන්ට සිඳු වී ඇත.රජ අණට එහා වෙන දෙයක් නැත.

ජනමාධ්‍යෙව්දීන් හමු වූ අවස්ථාවේ මේ ලියන මා විසින්ම අමාත්‍යවරයා දැනුවත් කරන ලද පළමු කාරණය වූයේ රටේ සියළු ක්‍රීඩා පිටිවල වගකීම යම් ආකාරයකින් ක්‍රීඩා අමාත්‍යංශය සතු කර ගැනීමට වැඩ පිළිවෙලක් සකසන ලෙසය.විශේෂයෙන් පළාත් පාලන ආයතන මෙන්ම අධ්‍යාපන අමාත්‍යංශයට අයත් ක්‍රීඩා පිටිවල තත්ත්වයද සංගීත සංදර්ශන නිසා,අයාලේ යන සතුන් නිසා අපවිත්‍ර වන,අබලන් වන අවස්ථා කොතෙකුත් අප දාක ඇත.මේ තත්ත්වය වෙනස් කිරීම සඳහා වැඩ පිළිවෙලක් සකසා ක්‍රීඩාවට සුදුසු මට්ටමට ක්‍රීඩා පිටිය සකස් කර තබා ගන්නා ලෙස ද මම එහිදී අවධාරණය කළෙමි.

ඒත් දැන් ඒ ඇමතිවරයාටම අයිති ඔහු යටතේ පවතින ටොරිංටන් ක්‍රීඩා සංකීරණ පිටිය ජනාධිපති ලේකම් කාර්යාලය විසින් ගෙන හානි කර අන්දමින් යම් යම් දේ කරමින් ඇත.ඉතිං රජ්ජුරුවන්ට විරුද්ධ වන්නේ කෙසේද?ඇතැම් ඉහළට අවශ්‍යය ක්‍රීඩාවන් ඉහළට ඕනි පුද්ගලයන්ගේ අණ මත ක්‍රියාත්මක කරනු ක්‍රීඩා අමාත්‍යවරයාට කළ හැකි දෙයක් නැත.එවැනි ඉහළින් පාත්වන චරිත තමන්ගේ පේද්ගලික කාර්ය මණ්ඩලයට යොදා ගන්නවා හැරෙන්නට තනි තීරණයකට පිවිසි විරුද්ධ වන්න ක්‍රමයක්ද නැත.
එවැනි තත්ත්වයක ජනාධිපති කාර්යාලයට ටොරිංටන් ඕනි කිව්වම ප්‍රතිපත්ති ගැන කියන්න පුළුවන්ද? අඩුම ගණනෙ ඔය හෑරුවට වඩා වියදමක් යොදලා වැඩේ ඉවර වුණාට පස්සෙ රජ කාර්ය මණ්ඩලය රැඟූ සේ ම පය ගසා සිටි පිටිය පෙර තිබුණ තත්ත්වයට පත් කර දෙන්නවත් අවධානය යොමු කළ යුතුය.

http://www.sportwaynews.com/