Tag: Lanka News Web

ඉන්දීය අග්‍රාමාත්‍ය නරේන්ද්‍ර මෝඩි මහතා මෙම මස අගදී ශ්‍රී ලංකාවේ සංචාරයක නිරතවීමට නියමිත බව වාර්තා වේ. මෝඩි අගමැතිවරයා ඇතුළු පිරිස රැගත් ගුවන් යානය කටුනායක ගුවන් තොටුපල වෙත පැමිණීම වෙනුවට යාපනය, පලාලි ගුවන් තොටුපල වෙත ගොඩබැස්වීම පිළිබඳව සලකා බලමින් සිටින බවයි වාර්තා වන්නේ.

ආනයනික කිරිපිටි මිල යළිත් ඉහළ දැමීමට සිදුවන බව කිරිපිටි ආනයන සමාගම් පවසනවා. මිල ඉහළ දැමීමට අදාල ඉල්ලීම පසුගිය 07 වැනිදා පාරිභෝගික ආරක්ෂණ අමාත්‍ය ලසන්ත අලගියවන්න මහතා වෙත යොමුකර ඇති බවද එම සමාගම් සඳහන් කරනවා.

ඇමරිකා එක්සත් ජනපදයේ දේශපාලන කටයුතු පිළිබඳ වැඩබලන ලේකම් වික්ටෝරියා නූලන්ඩ් මහත්මිය ඉදිරි දින කිහිපය තුළ ශ්‍රී ලංකාවට පැමිණීමට නියමිත බව වාර්තා වේ. ඇමරිකානු රාජ්‍ය දෙපාර්තමේන්තුව මේ බව නිවේදනය කර තිබෙනවා.

ඉන්දියාවෙන් ඇමරිකානු ඩොලර් බිලියනයක ණය මුදලක් ලබා ගැනීම සඳහා එකඟ වූ කොන්දේසි මොනවාදැයි ශ්‍රී ලංකා රජය හෝ ඉන්දියාව හෝ මේ දක්වා ප්‍රකාශයට පත්කර නොමැති බව සමගි ජන බලවේගය ප්‍රකාශ කරනවා. එම පක්ෂයේ පාර්ලිමේන්තු මන්ත්‍රී මුජිබර් රහුමාන් මහතා අද කොළඹදී පැවති මාධ්‍ය හමුවකදී ප්‍රකාශ කළේ මුදල් අමාත්‍යවරයා විසින්, ඉන්දියාවට එකඟ වූ කොන්දේසි සම්බන්ධයෙන් ජනතාව දැනුවත් කළයුතු බවයි.

ඇමරිකානු ඩොලරයට සාපේක්ෂව ශ්‍රී ලංකා රුපියල ඉතා සීග්‍රයෙන් අවප්‍රමාණය වීම සඳහා බලපෑ හේතු පිළිබඳව හිටපු අමාත්‍ය උදය ගම්මන්පිල මහතා පැහැදිලි කරනවා.