තමන් එක්සත් ජාතික පක්ෂයට හෝ සමගි ජන බලවේගයට එක්වූ බවට විවිධ මාධ්‍ය ඔස්සේ පැතිර යන පුවත් සම්පූර්ණයෙන්ම අසත්‍යය බව හිටපු ජනාධිපතිනී චන්ද්‍රිකා බණ්ඩාරනායක කුමාරතුංග මහත්මිය පවසයි.
ශ්‍රී ලංකා නිදහස් පක්ෂය අත්හැරදමා තමන් වෙනත් කිසිදු දේශපාලන පක්ෂයකට එකතු නොවන බවයි ඒ මහත්මිය නිවේදනයක් නිකුත් කරමින් අවධාරණය කරන්නේ.
RN
හිටපු ජනාධිපති මෛත්‍රීපාල සිරිසේන මහතා විසින් අද (30) කැඳවා ඇති එක්සත් ජනතා නිදහස් සන්ධානයේ විධායක සභා රැස්වීම පිළිබඳව අමාත්‍ය මහින්ද අමරවීර මහතා ලිපියක් යොමුකර තිබේ.
එම ලිපියෙන් අමරවීර මහතා පෙන්වා දී ඇත්තේ තවමත් එජනිස මහලේකම්වරයා වශයෙන් කටයුතු කරන්නේ තමන් බවත් ඒ අනුව එම විධායක සභා රැස්වීම කැඳවීමට මෛත්‍රීපාල සිරිසේන මහතාට කිසිදු බලයක් නොමැති බවත් ය.
ඒ අනුව වහාම එම විධායක සභා රැස්වීමට අවලංගු කරන ලෙසත් එසේ නොකළහොත් නීතිමය පියවර ගන්නා බවත් අමරවීර මහතා සිය ලිපියෙන් හිටපු ජනාධිපතිවරයාට දැනුම් දී ඇත.
RN
ශ්‍රී ලංකා නිදහස් පක්ෂයෙන් ආණ්ඩුවට එක්ව සිටින කණ්ඩායම සහ පක්ෂයේ සභාපති හිටපු ජනාධිපති මෛත්‍රීපාල සිරිසේන මහතා සමඟ සිටින කණ්ඩායම අතර මේ වන විට මතුව තිබෙන උණුසුම්කාරී තත්ත්වය තවදුරටත් පහව ගොස් නැහැ.
ආණ්ඩුවට එක්ව සිටින කණ්ඩායමේ ශ්‍රීලනිප සාමාජිකත්වය ඔවුන්ගේ විනය පරීක්ෂණ අවසන්වන තුරු අත්හිටුවා ඇති බවට පසුගිය මධ්‍යම කාරක සභාවේදී තීරණය කිරීමෙන් අනතුරුව දෙපාර්ශවයේ මත ගැටුම දැන් කරළියට පැමිණ තිබෙනවා.
අද දිනයේදීත් ශ්‍රීලනිප මහ ලේකම් පාර්ලිමේන්තු මන්ත්‍රී දයාසිරි ජයසේකර මහතා මාධ්‍ය හමුවේ මේ සම්බන්ධයෙන් අදහස් දක්වා සිටියා.
ආණ්ඩුවට එක්ව සිටින පිරිස මෙන් දෙපිට කාට්ටු වැඩ තමන් නොකරන බවයි ජයසේකර මහතා කියාසිටියේ.
පක්ෂයක් ලෙස පැහැදිලි තීන්දුවක් ගෙන තිබියදී රෑට රෑට ආණ්ඩුවේ ප්‍රබලයින් සමඟ සාකච්ජා කිරීමට තරම් දෙපිට කාට්ටු තත්ත්වයකට පත්ව නැති බව හෙතෙම සඳහන් කළා.
මේ අතර ශ්‍රී ලංකා නිදහස් පක්ෂය පවුලක බූදලයක් නොවන බවත් එය මහජනතාවගේ පක්ෂයක් බවත් ඔහු වැඩිදුරටත් පැවසුවා.
ASK
එක්සත් ජනතා නිදහස් සන්ධානයේ නව මහලේකම්වරයා වශයෙන් තිලංග සුමතිපාල මහතාව පත්කිරීම තමන් පිළිනොගන්නා බව එම සන්ධානයේ හවුල්කාර පක්ෂ 5ක් පවසයි.
ඒකාබද්ධ නිවේදනයක් නිකුත් කරමින් එම පක්ෂ පෙන්වා දෙන්නේ එජනිස මහලේකම්වරයා ඉවත්කර වෙනත් අයෙකු පත්කරන්නේ නම් එම සන්ධානයෙහි ව්‍යවස්ථාව අනුව එහි විධායක සභාව හෝ හවුල්කාර පක්ෂ දැනුවත් කළයුතුව ඇතත් එවැන්නක් සිදු නොවූ බවයි.
මහජන එක්සත් පෙරමුණ, ඊළාම් ජනතා ප්‍රජාතන්ත්‍රවාදී පක්ෂය, ජාතික කොංග්‍රසය, ශ්‍රී ලංකා මහජන පක්ෂය සහ දේශ විමුක්ති ජනතා පක්ෂය විසින් නිකුත් කරන ලද එම නිවේදනය පහතින් දැක්වේ.
RN
ශ්‍රී ලංකා නිදහස් පක්ෂයේ සාමාජිකත්වය අත්හිටවූ සියලු දෙනාටම නව ලංකා නිදහස් පක්ෂයත් සමග එක්වන්නැයි ආරාධනා කරන බව එම පක්ෂයේ නායක පාර්ලිමේන්තු මන්ත්‍රී කුමාර වෙල්ගම මහතා පවසයි.
ප්‍රශ්නය – දැන් ඔබතුමාටත් දුක හිතෙනවාද ශ්‍රී ලංකා නිදහස් පක්ෂයට වෙලා තියෙන දේ ගැන ?
“ශ්‍රී ලංකා නිදහස් පක්ෂයේ ඇත්තටම හරි පාලනයක් නැහැ නෙ. මේ වගේ අයව අයින් කරන්න ගියොත් අපට කවදාවත් ශ්‍රී ලංකා නිදහස් පක්ෂය ගොඩගන්න බෑ. චන්ද්‍රිකා නෝනලාව බාරගන්න, මහින්ද අමරවීරලාව බාරගන්න ඕනෙ පක්ෂයක් කැමතියි. නමුත් ඒකෙන් ශ්‍රී ලංකා නිදහස් පක්ෂයට මොකද වෙන්නෙ ?”
ප්‍රශ්නය – දැන් මේ නීතියට පිටින් ගියපු නිසා තනතුරු අයින් කළා කියලා තමයි මහලේකම්තුමා කියන්නෙ …
“ඔක්කොම එක්කහු වෙලා පොදුජන පෙරමුණෙන් ගිවිසුම් අත්සන් කරලා තරග කළා නම් ඇමතිකමක් ගත්තාට මොකද වෙන්නෙ ? එහෙම දේවල් කරන්න බෑ … අන්තිමට වෙන දේ මම කියන්නද ? චන්ද්‍රිකා බණ්ඩාරනායක මැතිණිය වැඩි කල් යන්න කලින් ඔය පක්ෂයේ නායකයා හැටියට ඉඳගන්නවා”
ප්‍රශ්නය – සාමාජිකත්වය අත්හිටවූ කට්ටිය ඔබතුමාලාගේ පක්ෂයට ළං කරන්න වෑයමක් තියෙනවාද ?
“අපේ පක්ෂයට එනවා නම් දෑතින් ගන්නේ. දෙපැත්තට උම්මා දෙකක් ගන්නෙ. මම නම් ආරාධනා කරනවා ඒ සියලු දෙනාම එක්කහු වෙන්න අපිත් එක්ක. නැත්නම් අපි ඕගොල්ලන් එක්ක එක්කහු වෙන්නම්. එක්කහු වෙලා අපි හොඳ ප්‍රබල වමක් හදමු. ලබන ජනාධිපති මැතිවරණයට අපි මුහුණ දෙමු”
කුමාර වෙල්ගම මහතා මේ බව පැවසුවේ ඊයේ (23) කොළඹදී මාධ්‍ය වෙත අදහස් දක්වමිනි.
RN
මධ්‍යම කාරක සභාවේ තීරණවලට එරෙහිව ගිය ඇතැමුන් දැන් විවිධ දේ සඳහන් කරමින් පසුවුවද පක්ෂයක් ලෙස තවදුරටත් ශක්තිමත් බව ශ්‍රී ලංකා නිදහස් පක්ෂයේ මහ ලේකම් පාර්ලිමේන්තු මන්ත්‍රී දයාසිරි ජයසේකර මහතා අද (23) කොළඹදී පැවති මාධ්‍ය හමුවකදී පැවසුවේය.
ඉහළින් සිටින පාර්ලිමේන්තු මන්ත්‍රීවරු කිහිපදෙනෙකු පක්ෂයෙන් ගියද පක්ෂය බිඳ වැට්ටවිය නොහැකි බවයි මන්ත්‍රීවරයා සඳහන් කළේ.
තවදුරටත් පොදුජනතාවගේ පක්ෂයක් ලෙස ඉදිරියටත් ක්‍රියාත්මක වන බව හෙතෙම වැඩිදුරටත් කියාසිටියේය.
ASK
ශ්‍රී ලංකා නිදහස් පක්ෂයේ මධ්‍යම කාරක සභාවේ මතයට එරෙහිව යමින් ආණ්ඩුවට එක්වූ චන්ද්‍රිකා කුමාරතුංග මහත්මිය,නිමල් සිරිපාලද සිල්වා මහතා ඇතුළු පිරිසේ ශ්‍රීලනිප සාමාජිකත්වය තාවකාලිකව අත්හිටුවීමට තීරණය කර තිබෙන බව පක්ෂයේ මහලේකම් පාර්ලිමේන්තු මන්ත්‍රී දයාසිරි ජයසේකර මහතා පැවසුවේය.
ඒ, අද (21) පස්වරුවේ ශ්‍රීලනිප මූලස්ථානයේ පැවති මධ්‍යම කාරක සභා රැස්වීමෙන් අනතුරුව මාධ්‍ය වෙත අදහස් දක්වමිනි.
එමෙන්ම එක්සත් ජනතා නිදහස් සන්ධානයේ මහලේකම් ධූරයද මහින්ද අමරවීර මහතාගෙන් ඉවත්කර තිලංග සුමතිපාල මහතාට ලබාදී ඇති අතර පක්ෂයේ ප්‍රතිසංවිධාන කටයුතු අරඹමින් තවත් තනතුරු රැසකට නව පත්වීම් සිදුකර තිබෙන බවයි දයාසිරි ජයසේකර මහතා කියා සිටියේ.
ASK
එක්සත් ජනතා නිදහස් සන්ධානයේ මහා ලේකම් ධූරය තිලංග සුමතිපාල මහතාට ලබා දීමට කටයුතු කර ඇති බව වාර්තා වෙයි.
මේ වනවිට ශ්‍රී ලංකා නිදහස් පක්ෂයේ මුලස්ථානයේ පැවැත්වෙන ශ්‍රීලනිප මධ්‍යම කාරක සභා රැස්වීමේදී යි එම තීරණය ගෙන ඇත්තේ.
එම ධූරයේ කටයුතු කරන ලද්දේ මහින්ද අමරවීර මහතා වන අතර ඔහු පක්ෂයේ එකඟතාවකින් තොරව ආණ්ඩුවේ අමාත්‍ය ධූරයක කටයුතු කරන හෙයින් ඔහු ඇතුළු ආණ්ඩුව සමඟ එක්ව සිටින ශ්‍රීලනිප මන්ත්‍රීවරුන්ට පක්ෂ අභ්‍යන්තරයෙන් විරෝධය එල්ල වී තිබේ.
ASK
බුද්ධ දේශනාව අනුව ණය නැතිවීමේ සැපය ගැන කියමින් ජනාධිපතිවරයා අයවැය කතාව ආරම්භ කළද වෙනදාටත් වඩා ආණ්ඩුව මෙවර වියදම් වැඩි කර තිබෙන බව පිවිතුරු හෙළ උරුමයේ නායක පාර්ලිමේන්තු මන්ත්‍රී උදය ගම්මන්පිල මහතා පැවසුවේය.
ඒ, අද (15) කොළඹදී පැවති මාධ්‍ය හමුවකදීය.
2023 වසරේදී රාජ්‍ය ආදායම රුපියල් බිලියන 3456ක් ලෙස ඇස්තමේන්තු ගතකරන විට රාජ්‍ය වියදම රුපියල් බිලියන 7879ක් ලෙස දක්වා ඇති හෙයින් මෙහිදී බරපතල ලෙස ණය ගැනීමට සැලැස්මක් නොතිබුණා නම් ඒ ගැන පුදුම විය යුතු වන බවයි මන්ත්‍රීවරයා සඳහන් කළේ.
දැනටමත් රුපියල් ට්‍රිලියන 25ක් වන සමස්ත රාජ්‍ය ණය තවත් 20%කින් 2023 වසරේදී ඉහළ යාමට නියමිත බව හෙතෙම කියාසිටියේය.
මෙලෙස ආණ්ඩුව රට ණය උගුලක හසුකරවීමේ ඇබ්බැහිය සුවකිරීම සඳහා මත්ද්‍රව්‍ය වලට ඇබ්බැහි වූවන් කන්දකාඩු යැවීමට පෙර ආණ්ඩුව කන්දකාඩු යවා පුනරුත්ථාපනය කළ යුතුව ඇති බව ගම්මන්පිල මන්ත්‍රීවරයා අවධාරණය කළේ.
ASK
ජනාධිපති මාධ්‍ය ඒකකය සතුව තිබුණු රුපියල් කෝටි ගණනක් වටිනා භාණ්ඩ අස්ථානගත වීමට තමන්ගේ කිසිදු සම්බන්ධයක් නොමැති බව හිටපු ජනාධිපති මෛත්‍රීපාල සිරිසේන මහතා පවසයි.
“ජනාධිපති ලේකම් කාර්යාලයේ මම ඉන්න කාලෙත් ඉන් පසුවත් ඇතිවෙච්ච විගණන වාර්තා සම්බන්ධයෙන් විගණකාධිපති දෙපාර්තමේන්තුවේ වාර්තාවක් අනුව කෝටි තුනහමාරක බඩු භාණ්ඩ අස්ථානගත වෙලා තියෙනවායි කියලා ප්‍රවෘත්තියක් මම දැක්කා. ඒකත් මට චෝදනාවක් විදියට තමයි දාලා තිබුණෙ. පෑනක් පැන්සලක්වත් ජනාධිපතිවරයාට භාරදීලා නෑ, ඒවා භාරව නිලධාරීන් ඉන්නවා. ප්‍රවෘත්තියේ සඳහන් කරලා තියෙනවා අනුරාධපුරයේ ජනාධිපති මන්දිරයේත් කතරගම ජනාධිපති මන්දිරයේත් රූපවාහිනී අතුරුදන් වෙලා තියෙනවායි කියලා. මාධ්‍ය අංශයේ තමා විශාල වශයෙන් බඩු අතුරුදන් වෙලා තිබෙනවා කියලා කියන්නෙ. මාධ්‍ය අංශයේ විතරක් නෙවෙයි අනික් හැම අංශයකමත් අංශ භාර නිලධාරීන් ඉන්නවා. මම දන්න විදියට මාධ්‍ය අංශයේ හිටපු අධ්‍යක්ෂ ජනරාල්වරයා මේ භාණ්ඩ ලේඛනය 2019 ගෝඨාභය රාජපක්ෂ මහතාගේ කාර්ය මණ්ඩලයට බාරදුන්නා.
යම්කිසි බඩු භාණ්ඩ හිඟයක් තියෙනවා නම් ඒ පිළිබඳ පරීක්ෂණයක් පැවැත්විය යුතුයි. මම විගණකාධිපතිතුමාට කතා කරන්න ඉන්නෙ මේ වාර්තාව මට සම්පූර්ණයෙන්ම දෙන්න කියලා. ජනාධිපතිවරයෙක් විදියට සර්කිට් බංගලාවක කබල් රූපවාහිනියක් හෝ මාධ්‍ය ඒකකයේ භාණ්ඩ රැගෙන යන්න තරම් පහතට වැටිච්ච කෙනෙක් නෙවෙයි මම. මම කවදාවත් වංචාවක් දූෂණයක් කරපු නැති කෙනෙක්. ඒ සම්බන්ධයෙන් පරීක්ෂණයක් කරන්න කියලා මම රජයෙන් ඉල්ලීමක් කරනවා. ඒ සඳහා මගේ සහයෝගය සම්පූර්ණයෙන්ම තිබෙනවා”
මෛත්‍රීපාල සිරිසේන මහතා මේ බව පැවසුවේ ඊයේ (27) දිනයේදී මාධ්‍ය වෙත අදහස් දක්වමිනි.
RN