කොළඹ LNW:අපේ බලාපොරොත්තුව සියලුදෙනා එකට එකතු කරගෙන රටේ ජනතාවට යහපතක් කිරීම බව එක්සත් ජාතික පක්ෂයේ නව මහ ලේකම් තලතා අතුකෝරළ මහත්මිය අද (10) නව තනතුරේ වැඩ භාරගනිමින් පැවසුවාය.
ඒ අනුව සමඟි ජන බලවේගයේ සියලු දෙනාට එක්සත් ජාතික පක්ෂය හා එක්වන ලෙස තමන් ආරාධනා කරන අතර මෙම පාර්ශව දෙක එකතු කිරීමටද තමන් මැදිහත්වන බව අතුකෝරළ මහත්මිය සඳහන් කළාය.
තමන් මෙම තීරණයට ආවේ අද ඊයේ නොවන අතර සමඟි ජන බලවේගය හා එක්ව දින 45ක් යනවිට තමන් රනිල් වික්‍රමසිංහ මහතා හමු වී මෙම එකතුවීමට අවශ්‍ය එකඟතාව ලබාගත් බවයි ඇය පැවසුවේ.
එම තත්ත්වය මත තමන්ට නොයෙකුත් දේවල්වලට මුහුණ දීමට සිදුවූ බවද ඇය ප්‍රකාශ කළාය.
”සමඟි ජනබලව්ගය කියන්නේ අමුතු පක්ෂයක් නෙවෙයි එකේ ඉන්නේ එක්සත් ජාතික පක්ෂයේ හිටපු අය. එක්සත් ජාතික පක්ෂයේ නියෝජ්‍ය නායකයා ලෙස හිටපු සජිත් ප්‍රේමදාස මහත්තයා ඒ පක්ෂය හදල තියෙන්නේ. ඔවුන්ට අපි විවෘත ආරාධනයක් කරනවා. රනිල් වික්‍රමසිංහ මහත්තය තහංචි දාලා නැහැ. එහෙම නම් මාව ගන්නෙත් නෑනේ. මම විශ්වාස කරනවා එතුමා නොහිටින්න අපි තාමත් පෝලිම්වල. එතුමා නොහිටින්න අද මේ රට වෙනස් තැනක. මේ ආණ්ඩුවේ දින 100තුළ තාමත් ක්‍රියාත්මක වෙනේ රනිල් වික්‍රමසිංහ හදපු භාණ්ඩාගාරය. ඒ නිසා රටට යහපතක් කරන්න එකතු වෙන්න කියල මම ආරාධනා කරනවා.” යනුවෙන් අතුකෝරළ මහත්මිය පැවසුවාය.
ආශිකා බ්‍රාහ්මණ
