පරිසරය පිරිසිදු කිරීම යනු ක්ලීන් ශ්‍රී ලංකා වැඩසටහනේ එක් පැතිකඩක් පමණක් බව ජාතික ජන බලවේගයේ පාර්ලිමේන්තු මන්ත්‍රීනී නිලන්ති කොට්ටහච්චි මහත්මිය පවසයි.
“ක්ලීන් ශ්‍රී ලංකා ව්‍යාපෘතිය 2025 වර්ෂයට අපි හඳුන්වා දෙන දැවැන්ත ව්‍යාපෘති තුනෙන් පළමුවැන්න. පරිසරය පිරිසිදු කරනවා කියන එක මේ ව්‍යාපෘතියේ එක පැතිකඩක් විතරයි. මේකෙ සමාජයීය පිරිසිදු කිරීමේ කටයුත්ත සහ මිනිස්සුන්ගේ ආකල්ප පිරිසිදු කිරීමේ කටයුත්ත කියන ඒවාත් අපි සලකලා බලනවා. එක ටොෆී කොලයක් බැහැර කරද්දී පවා පරිසරය කියන්නේ මගේ ජීවිතය, මගේ ශරීරයේ කොටසක් කියන තැනට හිතන්න පුළුවන් තැනකට අපි මේක වෙනස් කරගනිමු කියන එක තමයි අද අපේ එකම ප්‍රාර්ථනාව”
නිලන්ති කොට්ටහච්චි මහත්මිය මේ බව පැවසුවේ ක්ලීන් ශ්‍රී ලංකා වැඩසටහන යටතේ වාද්දූව මොල්ලිගොඩ වෙරළ තීරයේ පිරිසිදු කිරීම් සිදුකරන අවස්ථාවට ඊයේ (ජනවාරි 11) එක්වෙමිනි.
