දක්ෂ, එඩිතර මහාධිකරණ විනිසුරුවරයකු වශයෙන් ප්‍රසිද්ධියට පත් මානික්කවාසගම් ඉලංචේලියන් මහතා මේ මාසයේදී විශ්‍රාම යාමට නියමිතව සිටින බව වාර්තා වේ.
විත්‍යා ඝාතන නඩුව ඇතුළු ආන්දෝලනාත්මක නඩු රැසකදී විශිෂ්ඨ තීන්දු ලබාදුන් විනිසුරුවරයකු වන ඉලංචේලියන් මහතාට 2025 ජනවාරි 20 වනදාට වයස අවුරුදු 60 සම්පූර්ණ වන බව සඳහන්. මහාධිකරණ විනිසුරුවරුන් වයස අවුරුදු 60දී විශ්‍රාම ගතයුතු අතර අභියාචනාධිකරණ විනිසුරුවරුන්ට 63 දක්වා සේවය කිරීමට අවස්ථාව ලැබේ.
මීළඟට අභියාචනාධිකරණ විනිසුරුවරයකු වශයෙන් පත්වීම සඳහා සුදුසුකම් සපුරා සිටින ඒ මහතා රාජකාරියෙහි යෙදී සිටින අවසන් දිනය වනු ඇත්තේ ලබන සිකුරාදා (17) දිනයයි. ඒ අනුව ඒ මහතාව අභියාචනාධිකරණ විනිසුරුවරයකු වශයෙන් උසස්කිරීම එදින අවසන් වීමට ප්‍රථම සිදුකළ යුතුව ඇත.
එහෙත් ජනාධිපති අනුර කුමාර දිසානායක මහතා මේ වනවිට චීනයෙහි නිල සංචාරයක නිරත වී සිටින අතර එම සංචාරය අවසන් වීමට නියමිතව ඇත්තේ ද 17 වනදා ය. ඉලංචේලියන් මහතාව අභියාචනාධිකරණ විනිසුරුවරයකු වශයෙන් පත්කිරීමට නම් ජනාධිපතිවරයා විසින් ඒ සඳහා නිර්දේශයක් ආණ්ඩුක්‍රම ව්‍යවස්ථා සභාවට යැවිය යුතු අතර එම සභාව රැස්වී එම නිර්දේශය අනුමත කළ යුතුය. මේ සියල්ල සඳහා ඉතිරි වී ඇත්තේ පැය 72 ක් පමණි.
මේ තත්වය තුළ මානික්කවාසගම් ඉලංචේලියන් මහතාගේ සේවය ඉදිරියටත් ලබාගැනීමේ අවස්ථාව රටට අහිමිවේද යන ප්‍රශ්නය මතුව තිබේ.
