නිශ්මං රණසිංහ ජනවාරි 23, කොළඹ LNW:
ශ්‍රී ලංකාව, ඉන්දියාව, මැලේසියාව, සිංගප්පූරුව, ඉරානය, හොංකොං–චීනය, මැකාවෝ–චීනය, පකිස්ථානය යන රටවල් 11ක ආසියානු ක්‍රීඩක ක්‍රීඩිකාවන්ගේ සහභාගීත්වය ද ඇතුව ශ්‍රී ලංකා ස්කොෂ් සංගමය මගින් සංවිධානය කරනු ලබන 2026 කනිෂ්ඨ විවෘත ස්කොෂ් ශූරතාවලිය, ආසියානු කනිෂ්ඨ සුපර් සීරිස් තරගාවලියක් ලෙස ජනවාරි මස 28 වන දින සිට පෙබරවාරි මස 01 දක්වා රත්මලාන ශ්‍රී ලංකා ගුවන් හමුදා ස්කොෂ් සංකීර්ණයේදී පැවැත්වීමට කටයුතු සූදානම් කර ඇත.
ඒ අනුව මෙම ශූරතාවලිය සඳහා වයස අවුරුදු 11 න් පහළ සිට 19 න් පහළ දක්වා විවිධ වයස් කාණ්ඩ නියෝජනය කරමින් ක්‍රීඩක ක්‍රීඩිකාවන් 150 කට අධික සංඛ්‍යාවක් ලියාපදිංචි වී ඇති අතර විදේශ ක්‍රීඩක ක්‍රීඩකයින් 55 දෙනෙකු ද ඇතුළත් වේ
කනිෂ්ඨ ක්‍රීඩකයින්ගේ ක්‍රීඩා ප්‍රවර්ධනයට වැදගත් අවස්ථාවක් වන මෙම ශූරතාවලියට සහභාගී වන ක්‍රීඩක ක්‍රීඩිකාවන් හට ජාතික ස්කොෂ් ක්‍රීඩා ක්ෂේත්‍රයේ සහ ආසියානු ස්කොෂ් සම්මේලන නිල ශ්‍රේණිගත කිරීම් සඳහා අවශ්‍ය ලකුණු ලබා ගැනීමටද අවස්ථාව හිමි වේ.
මෙම ශූරතාවලිය පිළිබඳ අදහස් දක්වමින් ශ්‍රී ලංකා ස්කොෂ් සභාපති ගෘප් කැප්ටන් එරන්ද ගීගනගේ මහතා පැවසුවේ මෙවැනි ස්කොෂ් ශූරතාවලියක් ශ්‍රී ලංකාවේ පැවැත්වීම රටේ ස්කොෂ් ක්‍රීඩාවේ ප්‍රවර්ධනයට වැදගත් සන්ධිස්ථානයක් වන බවයි.
