රටක් වශයෙන් ඒකීයව කටයුතු කිරීම අගය කළ යුතු බව අමෙරිකානු තානාපතිනිය ජූලි චන්ග් ප්‍රකාශ කරයි. ශ්‍රී ලංකාවේ මූල්‍ය ස්ථාවරත්වය ඇති කරගැනීම වෙනුවෙන් රජය විසින් ගෙන ඇති පියවර හා සිදු කර ඇති අපහසු ප්‍රතිසංස්කරණයන් සම්බන්ධයෙන් අදහස් දක්වමින් ප්‍රකාශ කර ඇත්තේ, සියළු රටවල සහයෝගයෙන් ජාත්යන්තර මූල්‍ය අරමුදලේ සහාය ලැබීම කඩිනම් වනු ඇති බවයි.
අමෙරිකානු තානාපතිනිය හා මුදල් රාජ්‍ය අමාත්‍ය ශෙහාන් සේමසිංහ මහතා සමග පැවති හමුවකදී මේ බව ප්‍රකාශ කර ඇත. එහිදී අදහස් දක්වමින් අමෙරිකානු තානාපතිනිය පවසා ඇත්තේ රජයේ වැඩ පිළිවෙල සම්බන්ධයෙන් අනෙකුත් රටවල් වල විශ්වසනීයත්වය තවදුරටත් තහවුරු වෙමින් පවතින බවය.
අවශ්‍ය සෑම සහයෝගයක්ම අමෙරිකානු රජය විසින් තවදුරටත් ලබා දෙන බවත්, ජාත්යන්තර ණය හිමියන්ගේ සුබවාදී තීරණ හමුවේ ශ්‍රී ලංකාව වඩාත් ස්ථීරසාර ආර්ථිකයක් ඉතාම ඉක්මනින් ළඟා කරගනු ඇති බව තානාපතිනිය මෙහිදී ප්‍රකාශ කර ඇත.
රෂිකා හෙන්නායක
