ඉතිහාසයේ අදවන් දිනෙක; ලොවම මවිත කළ බොක්සිං සටන!

සටහන: සශිකලා මධුෂාණී
ලෝකය(අවුට්බවුන්ඩ් ටුඩේ) ඔක්තෝම්බර් මස 30 ; ප්‍රබල ජෝර්ජ් ෆෝර්මන් පරදා මුහම්මද් අලි ලෝක කිරුළ යළි දිනාගත් ඓතිහාසික දිනය අදයි !

ක්‍රීඩා ඉතිහාසයේ අමතක නොවන සටන් අතර සුවිශේෂී ස්ථානයක් හිමිකරගත් ‘Rumble in the Jungle’ නමින් ප්‍රසිද්ධ බොක්සිං තරගය පැවැත්වුණේ 1974 ඔක්තෝබර් 30 වැනිදාය. එනම් මීට වසර 52කට පෙරය .

එදින ලොව පුරා ක්‍රීඩා ලෝලීන්ගේ අවධානය දිනාගනිමින් මුහම්මද් අලි, ප්‍රබල ජෝර්ජ් ෆෝර්මන් පරාජය කරමින් නැවතත් ලෝක හෙවිවේට් බොක්සිං කිරුළ හිමිකර ගැනීමට සමත් විය.

1974 වසරේ ඔක්තෝබර් 30 වැනිදා අප්‍රිකාවේ එවකට සයිරේ රාජ්‍යය ලෙස හැඳින්වූ වර්තමාන කොංගෝ ප්‍රජාතන්ත්‍රවාදී ජනරජයේ කිංෂාසා නගරය මෙම ඓතිහාසික සටනේ වේදිකාව බවට පත්විය.

එවකට ලෝක හෙවිවේට් ශූරයා වූයේ ජෝර්ජ් ෆෝර්මන්ය. ඔහු සිය ප්‍රබල පහරවල් සහ අඛණ්ඩ ජයග්‍රහණ හේතුවෙන් බොක්සිං ලෝකයේ දැවැන්ත තරුවක් බවට පත්ව සිටියේය. අනෙක් පසින් සිටියේ අහිමි වූ ලෝක කිරුළ යළි ලබාගැනීමේ අරමුණින් සටන් වැදුණු මුහම්මද් අලිය.

තරගය ආරම්භයේදී ෆෝර්මන් සිය ශාරීරික ශක්තිය සහ ප්‍රබල පහරවල් භාවිත කරමින් අලීට දැඩි පීඩනයක් එල්ල කළේය. බොහෝ දෙනාගේ මතය වූයේ ෆෝර්මන්ට මෙම සටන ජයගැනීමට වැඩි අවස්ථාවක් තිබූ බවයි.

නමුත් අලි භාවිත කළේ වෙනස්ම උපක්‍රමයකි.

ඔහු බොක්සිං වළල්ලේ ලණුවලට පිටුපසින් රැඳී සිටිමින් ෆෝර්මන්ගේ පහරවල් ආරක්ෂා කරගනිමින් ඔහුගේ ශක්තිය ක්‍රමයෙන් ක්ෂය වනතුරු බලා සිටියේය. පසුව ‘Rope-a-Dope’ ලෙස ප්‍රසිද්ධියට පත් වූයේ මෙම සුවිශේෂී උපක්‍රමයයි.

වටයෙන් වටය ගතවෙද්දී ෆෝර්මන්ගේ ශක්තිය අඩුවන බව පෙනෙන්නට තිබිණි. අටවැනි වටයේදී සියල්ල වෙනස් වෙයි!

එම අවස්ථාවෙන් උපරිම ප්‍රයෝජන ගත් අලි අටවැනි වටයේදී ප්‍රබල ප්‍රතිප්‍රහාර මාලාවක් එල්ල කළේය. අලීගේ වේගවත් සහ නිවැරදි පහරවල් හමුවේ ෆෝර්මන්ට තවදුරටත් ආරක්ෂා වීමට නොහැකි විය. අවසානයේ ඔහු බොක්සිං වළල්ලේ බිම ඇද වැටුණු අතර, විනිසුරු ගණන් කිරීමෙන් පසු තරගය අලීගේ ජයග්‍රහණයෙන් අවසන් විය.

එය අටවැනි වටයේ අවසන් වීමට තත්පර දෙකක් පමණ ඉතිරිව තිබියදී සිදුවීම ද මෙම තරගයේ නාට්‍යමය බව තවත් වැඩි කළේය.

1967 වසරේදී වියට්නාම් යුද්ධය සඳහා ඇමරිකානු හමුදා සේවයට එක්වීම ප්‍රතික්ෂේප කිරීම හේතුවෙන් අලීගේ බොක්සිං බලපත්‍රය අහිමි වූ අතර ඔහුගේ ලෝක ශූරතා කිරුළ ද අහිමි විය. වසර කිහිපයක විරාමයකින් පසු නැවතත් බොක්සිං වළල්ලට පිවිසි ඔහු, 1974දී ෆෝර්මන් පරාජය කරමින් ලෝක හෙවිවේට් ශූරතාව දෙවැනි වරටත් දිනාගත්තේය.

තරගය නැරඹීම සඳහා 60,000කට ආසන්න ප්‍රේක්ෂක පිරිසක් එක්ව සිටි අතර, ‘Ali, bomaye!’ යන හඬින් කිංෂාසා නගරයම ගිගුම් දුන්නේය.

‘Rumble in the Jungle’ යනු බොක්සිං තරගයක් පමණක් නොව, අධිෂ්ඨානය, උපක්‍රමශීලී බව සහ අභියෝග හමුවේ නොසැලී සිටීම පිළිබඳ ලොවට පාඩමක් කියාදුන් සිදුවීමක් වන අතර ක්‍රීඩා ඉතිහාසයේ සදාකාලික මතකයකි.

එදා අලී ලබාගත් ජයග්‍රහණය ඔහුගේ ක්‍රීඩා දිවියේ පමණක් නොව ලෝක ක්‍රීඩා ඉතිහාසයේ ද සුවිශේෂී සන්ධිස්ථානයක් බවට පත්වූ අතර වසර 52ක් ගත වුවද ප්‍රබල ෆෝර්මන් පරාජය කරමින් අලි ලෝක කිරුළ යළි දිනාගත් ඒ අමතක නොවන රාත්‍රිය අදටත් ක්‍රීඩා ලෝලීන්ගේ මතකයේ ජීවමානව පවතී.