සටහන – රුවන් නෙළුගොල්ල
2025 අයවැය සේවක වැටුප්, සංවර්ධන කටයුතු ඇතුළු සියලුම දේවල් ඇතුළත් කළ අයවැයක් බවත් විපක්ෂයට මේ ගැන කියන්නට දෙයක් නොමැති නිසා ඔවුන් මෙය ජාත්‍යන්තර මූල්‍ය අරමුදලේ අයවැයක් වශයෙන් හඳුන්වන බවත් වෙළඳ, වාණිජ හා ආහාර සුරක්ෂිතතා අමාත්‍ය වසන්ත සමරසිංහ පවසයි.
“මේක සියලු දේවල් ඇතුළත් කරපු අයවැයක්. ඒ නිසා මේ අයවැය පිළිබඳ රටේ ජනතාව ඉතිහාසයේ කවදාටත් වඩා සතුටුවෙන අයවැයක් වෙනවා මේක. විශ්‍රාමිකයින්ගේ, රාජ්‍ය සේවකයින්ගේ, පෞද්ගලික අංශයේ සේවකයින්ගේ, වතු සේවකයින් ඇතුළු සියලුම දෙනා. ඒ වගේම මේ රටේ සංවර්ධන කටයුතු උතුර, නැගෙනහිර, ජාති ආගම් කුලමල භේද නැතිව මේ සියල්ල ඉදිරිපත් කරලා තියෙනවා. දැන් ඉතින් කියන්න දෙයක් නැති නිසා IMF හරි මොනවාහරි කියයි. හැබැයි මේ අයවැය අපි කොහොමද ඉදිරිපත් කරලා තියෙන්නෙ කියලා අද ජනාධිපතිවරයා කතාව ඉදිරිපත් කරලා කිව්වා. ඒ නිසා විවාදයේදී බලාගන්න පුළුවන් ඕගොල්ලො ඔය කියන තවත් දේවල් තියෙනවාද කියලා”
වසන්ත සමරසිංහ අමාත්‍යවරයා මේ බව පැවසුවේ ඊයේ (පෙබරවාරි 17) ජනාධිපතිවරයා ඉදිරිපත් කළ අයවැය කතාවෙන් අනතුරුව තේ පැන් සංග්‍රහය සඳහා යන අවස්ථාවේදී මාධ්‍ය වෙත අදහස් දක්වමිනි.
