දේශගුණික අවදානම් විශේෂඥයින් XDI විසින් අද(20) දිනයේ ප්‍රකාශයට පත් කරන ලද වාර්තාවට අනුව දේශගුණික විපර්යාසවලින් වඩාත් අවදානමට ලක්ව ඇති කලාපවලින් හතරෙන් තුනකට වඩා වැඩි ප්‍රමාණයක් චීනයේ ඇති බව හඳුනා ගැනේ.
නැගෙනහිර චීනයේ Jiangsu පළාත ලෝකයේ වඩාත්ම දේශගුණික අවදානමට ලක්විය හැකි කලාපය ලෙස ශ්‍රේණිගත කර ඇති අතර, Shandong, Hebei සහ Henanයන ප්‍රදේශයන් ඒ අතරින් විශේෂ වේ. XDI විසින් නිකුත් කළ වාර්තාවට අනුව චීනය ලෝකයේ වඩාත්ම අවදානම් කලාප 20න් 16කට නිවහන වේ.
XDI ප්‍රධාන විධායක රොහාන් හැම්ඩන් මේ සම්බන්ධයෙන් වාර්තාකරුවන්ට ප්‍රකාශ කර තිබුණේ ලෝකය පුරා කාලගුණික සිදුවීම්වල සැලකිය යුතු බලපෑම් අපට දැනටමත් දැනෙන අතර, ඒවා වැඩි වනු ඇති හෙයින් සෑම ආයෝජන තීරණයක්ම දේශගුණයට ඔරොත්තු දෙන ආකාරයෙන් සිදු කරන බවට වග බලා ගැනීමට අපේක්ෂා කරන බවත්ය.
ගෝලීය වශයෙන් භූමි ප්‍රදේශ 2,600ක් අළලා කරන ලද XDIහි විශ්ලේෂණයට අනුව චීනයට පසුව, එක්සත් ජනපදය වඩාත් අවදානම් සහිත ප්‍රදේශ වල නිවහන වේ.
ගෝලීය වශයෙන් 10 වන ස්ථානයේ සිටින ෆ්ලොරිඩා, එක්සත් ජනපදයේ වඩාත්ම තර්ජනයට ලක්ව ඇති ප්‍රාන්තය වන අතර, පසුව කැලිෆෝනියා සහ ටෙක්සාස් වේ.
ඉන්දියාවේ ප්‍රදේශ නවයක් ද ඉහළම අවදානම් කලාප 50 අතරට පත්ව ඇත. ආර්ජන්ටිනාවේ බුවනෝස් අයර්ස්, වියට්නාමයේ හෝ චි මිං නගරය සහ ඉන්දුනීසියාවේ ජකර්තා මුල් 100 හි අනෙකුත් ප්‍රධාන ආර්ථික මධ්‍යස්ථාන වේ. යුරෝපයේ, ජර්මනියේ පහළ සැක්සොනි කලාපය දේශගුණික විපර්යාසවලට වඩාත්ම අවදානමට ලක්විය හැකි කලාපයක් ලෙස හඳුනා ගෙන තිබේ. වැනිස් නගරය අඩංගු ඉතාලියේ වෙනෙටෝ කලාපය යුරෝපයේ සිව්වන වඩාත් අවදානම් කලාපය ලෙස ශ්‍රේණිගත කර ඇත.
පර්යේෂකයන් විසින් ප්‍රකාශ කර තිබුණේ, දේශගුණික විපර්යාස හේතුවෙන් ඇති විය හැකි දැවැන්ත ආර්ථික බිඳවැටීම් කාබන් විමෝචනය අඩු කිරීම සහ ආන්තික කාලගුණික සිදුවීම් වලට අනුවර්තනය වීමට රජයන්ගේ උත්සාහයන් වේගවත් කිරීමේ අවශ්‍යතාවය මෙම සොයාගැනීම් මගින් ඉස්මතු කරන බවයි.
සශිකලා මධුෂාණී_
