සටහන – රුවන් නෙළුගොල්ල
ජනාධිපති අනුර කුමාර දිසානායක මහතා පසුගිය 31 වනදා වැලිගමදී පැවැත්වූ මැතිවරණ ප්‍රචාරක රැළියකදී සිදුකළ ප්‍රකාශයකට එරෙහිව එක්සත් ජනරජ පෙරමුණ විසින් මැතිවරණ කොමිසමට පැමිණිල්ලක් ඉදිරිපත් කර තිබේ.
මධ්‍යම රජයෙන් ප්‍රතිපාදන එවනු ලබන්නේ වංචා නොකරන, දූෂණය නොකරන කණ්ඩායම් ජයග්‍රහණය කරන ප්‍රාදේශීය සභාවලට පමණක් බවත්, එවැනි කණ්ඩායම් ඇත්තේ එකක් පමණක් බවත් එය ජාතික ජන බලවේගය පමණක් බවටත් ජනාධිපති අනුර කුමාර දිසානායක මහතා අදාළ ප්‍රචාරක රැළියේදී පවසා ඇති අතර එම ප්‍රකාශය රටේ විධායක ජනාධිපතිවරයා විසින් ඍජුවම තම බලය පාවිච්චි කරමින්, මධ්‍යම රජයේ අනුග්‍රහය ලබාදීම හෝ නොදීම තීරණය කිරීම හරහා ඡන්දයට බලපෑම් කිරීමක් බවයි එක්සත් ජනරජ පෙරමුණේ උපසභාපති තීක්ෂණ ගම්මන්පිල මහතා අවධාරණය කළේ.
“අපි අද ඇවිල්ලා තියෙන්නේ අපේ රටේ විධායක ජනාධිපති, ඒ වගේම මාලිමාවේ නායකයා වන අනුර කුමාර දිසානායක මහත්තයා කරපු ප්‍රකාශයක් සම්බන්ධයෙන් මැතිවරණ කාර්යාලයට පැමිණිල්ලක් දාන්න. ඒ ප්‍රකාශය මොකක්ද කියලා කියනවා නම් ඔහු මාර්තු තිස් එක වැලිගමදී තමන්ගේ පක්ෂයේ පළාත් පාලන මැතිවරණය ඉලක්ක කරගෙන කරපු ජන රැළියක දී ප්‍රකාශ කරනවා මධ්‍යම රජයෙන් මේ පළාත් පාලන ආයතන වල, ඒ කියන්නේ සභාවල, යෝජනා වලට මුදල් දෙනවා නම් දෙන්නේ, දූෂණය, වංචාව නැති සභා නියෝජිතයන් ඉන්න ඒවාට විතරයි දෙන්නේ කියලා ඔහු කියනවා. ඒත් එක්ක ඔහු කියනවා, ඒ වගේ දූෂිතයන් නැති සභාවල් වෙන්නේ මාලිමා ආණ්ඩුවේ බලය ගන්න පළාත් පාලන ආයතන විතරක් කියලා. මේ රටේ ඡන්ද දායකයාට ඔහු දානවා පොඩි ව්‍යංගයෙන්, පොඩි සද්දයක්. ඒක තමයි, ගමේ ඡන්දේ මාලිමාවට දෙන්න; දීලා ඒ පළාත් පාලන ආයතන සඳහා මාලිමාවේ කට්ටිය යවන්න. එහෙම යැව්වේ නැත්නම් ඔය ගමේ වැඩ ටික කරගන්න බෑ කියන කාරණාව මේ රටේ ජනාධිපති, මාලිමාවේ නායකයා වෙච්ච අනුර කුමාර දිසානායක මහතා කියනවා.
මට ඔහුගෙන් එක දෙයක් අහන්න තියෙනවා. නිදහස්ව ඡන්දය ප්‍රකාශ කරන අයිතිය මේ මිනිස්සුන්ට තියෙන්න ඕනේ, මිනිස්සුන්ගේ ඡන්දයට, ඒ වගේ බලපෑම් කරන්න බෑ. විශේෂයෙන් මේ ජනාධිපතිවරයා විදිහට ඒ වගේ බලපෑම් කරන්න බෑ. ඔහු ජනාධිපති මුළු රටටම, පක්ෂයකට නෙමෙයි. එතකොට මේ බලපෑමක් කරන්න අවස්ථාවක් තිබ්බොත්, මේ මැතිවරණ ප්‍රතිඵලය වෙනස් වෙන්නත් පුළුවන්. මේ රටේ මහජනතාව තමන්ගේ ස්වාධීන අයිතීන් ඡන්දය ප්‍රකාශ කරලා තමයි මේ මාලිමා ආණ්ඩුව පත් වුණේ. අද ජනාධිපති අනුර කුමාර දිසානායක පත්වෙලා තියෙන්නේ ඒ වගේ මැතිවරණයක ප්‍රතිඵලයක් විදිහට. තුනෙන් දෙකේ පාර්ලිමේන්තු බලයක් තියෙන්නෙත් ඒ වගේ මැතිවරණයක ප්‍රතිඵලයක් විදිහට. හැබැයි අද මොහු කියනවා මාලිමාවට ඡන්දෙ දෙන්න. දුන්නොත් ගමේ වැඩ ටික කරන්න අපිට මුදල් දෙන්න පුළුවන්. එහෙම නොදී වෙන පක්ෂයක් වෙන කණ්ඩායමක් බලයට ආවොත් අපිට මුදල් දෙන්න දෙපාරක් හිතන්න වෙනවා කියලා පොඩි කතාවක් කියනවා. ව්‍යංගයෙන් මේ ඡන්ද දායකයාට, ගමේ ඡන්ද දායකයට බලපෑමක් එල්ල කරනවා. මෙන්න මේක වැරදියි.
අනිත් කාරණාව, මැතිවරණ කොමිසමට වගකීමක් තියෙනවා මේ මැතිවරණයට ඉදිරිපත් වෙන අපේක්ෂකයන්ගේ ගෞරවය රැකගන්න. මොකක්ද මේ ගෞරවය රැකගන්නවා කියලා කියන්නේ? තාම අපේක්ෂකයෝ, මන්ත්‍රීවරු කවුරුත් පත්වෙලා නෑ. මන්ත්‍රීවරු දැනට ඇත්තෙත් නෑ. මොකද මේ සීමා ඉක්මවලා ගිහිල්ලා තියෙන්නේ මේ පළාත් පාලන ආයතන වල. එතකොට මේ පත්වෙච්ච නැති කණ්ඩායමකට කොහොමද දූෂණය තියෙන කණ්ඩායමක් කියලා කියන්නේ? නැත්නම් මේ පත්වෙන මාලිමා ආණ්ඩුව දූෂණය කරන්නෑ කියලා දැන්ම කියන්නේ කොහොමද? නැත්නම් පත්වෙන්න ඉන්න අනෙකුත් කණ්ඩායම් වලට, පක්ෂ වලට දූෂිතයෝ කියලා කියන්නේ කොහොමද? දැන්ම? එහෙම කියන්න අයිතියකුත් නෑ. එතකොට අලුතෙන් මේ දේශපාලනයට එන මේ අලුත් නවකයන්ට, තරුණයන්ට, කාන්තාවන්ට, අලුතෙන් රට ගැන උනන්දුවක් තියෙන මිනිස්සුන්ට, දූෂිතයා කියන එක දැන්ම මේ රටේ ජනාධිපති අලවන්න පටන් අරන් තියෙනවා. ඒක හරි වැරදියි”
තීක්ෂණ ගම්මන්පිල මහතා මේ බව පැවසුවේ ඊයේ (අප්‍රේල් 02) දිනයේදී මැතිවරණ කොමිසමට ගොස් තම පැමිණිල්ල භාරදීමෙන් අනතුරුව මාධ්‍ය වෙත අදහස් දක්වමිනි.
