සටහන – නිශ්මං රණසිංහ
අප්‍රේල් 11, කොළඹ (LNW): චීනයේ ක්‍රියාත්මක නින්ග්බෝ බැංකු ආසියාතික බැඩිමින්ටන් සූරතාවලියේ ප්‍රධාන තරගකරුවන් 32 වටය නියෝජනය කළ ශ්‍රී ලංකාවේ විරේන් නෙත්තසිංහ පිරිමි කේවල තරගයේදී ද,රනිත්මා ලියනගේ කාන්තා කේවල තරගයේදී ද පරාජයට පත් වුණා.
ජාත්‍යන්තර ශ්‍රේණිගත කිරීම්වල 72 වන ස්ථානයේ සිටින විරේන් පරාජයට පත් වුණේ 83 වන තැන සිටින වියට්නාමයේ නුගුයෑන් හියි ඩෑන්ග් වෙතින්.එම තරගයේ ලකුණු සටහන දැක් වුණේ ලකුණු 21 – 12 සහ 21 – 18 ක් ලෙසයි.කාන්තා තරගයට රනිත්මා සුදුසුකම් ලබා ගත්තේ සුදුසුකම් ලබා ගැනීමේ ලීග් වටයේදී සිය කාණ්ඩයේ සෙසු ක්‍රීඩිකාවන් පරාජයට පත් කරමින්.ප්‍රධාන 32 ක්‍රීඩා කරන වටයේදී ඇයගේ ප්‍රතිවාදියා වූයේ ජාත්‍යන්තර ශ්‍රේණිගත කිරීම්වල හය වන තැන සිටින චීනයේ හී බෙන්ග් ජියාවෝ වන අතර එම තරගයේ දී චීන ක්‍රීඩිකාව ලකුණු 21 – 13 ක් සහ 21 – 09 ක් ලෙස තරගය ජය ගන්නට සමත් වුණා.
රනිත්මා සහ හී බෙන්ග් අතර තරගයට විනාඩි 32 ක් ගත වූ අතර විරෙන් සහ න්ගුයෑන් අතර තරගය විනාඩි 50 කාලයක් පැවත්වුණා.
