සටහන – රෂිකා හෙන්නායක
මැයි 07, කොළඹ (LNW): ශ්රී ලංකා නිදහස් පක්ෂයේ වැඩබලන සභාපතිවරයා ලෙස අධිකරණ අමාත්ය විජේදාස රාජපක්ෂ මහතා කටයුතු කිරීම වළක්වාලමින් පැනවූ වාරණය ක්රියාත්මකවීම අත්හිටුවීමේ අතුරු තහනම් නියෝගයක් නිකුත් කරන ලෙස ඉල්ලා ගොනුකළ පෙත්සම විභාගයට නොගෙනම නිශ්ප්රභ කිරීමට අභියාචනාධිකරණය අද නියෝග කළ බව පැවසේ.
විජේදාස රාජපක්ෂ මහතා ඉදිරිපත් කළ පෙත්සම සළකා බැලීමෙන් අනතුරුව අභියාචනාධිකරණ විනිසුරු ඩී එන් සමරකෝන් මහතා විසින් මෙම තීන්දුව ප්රකාශයට පත්කළ බව පැවසේ.
ඒ අනුව අදාළ ප්රතිශෝධන පෙත්සම විභාගයට ගැනීම සදහා නොතීසි නිකුත් කිරීමකින් තොරව නිශ්ප්රභ කරන බව අධිකරණය සදහන් කළ බව වාර්තා වේ.
අමාත්යවරුන් වන ලසන්ත අලගියවන්න / මහින්ද අමරවීර සහ පාර්ලිමේන්තු මන්ත්රී දුමින්ද දිසානායක යන මහත්වරුන් ඉදිරිපත් කළ පැමිණිල්ලකට අනුවයි කොළඹ දිසා අධිකරණය ශ්රී ලංකා නිදහස් පක්ෂයේ වැඩ බලන සභාපතිවරයා ලෙස අධිකරණ අමාත්ය විජේදාස රාජපක්ෂ මහතා පත්කිරීම සහ එම ධුරයේ කටයුතු කිරීම වළක්වාලමින් පසුගියදා වාරණ නියෝගයක් නිකුත් කළේය.
