ජනාධිපති ගෝඨාභය රාජපක්ෂ මහතා ධුරයෙන් ඉවත් වන්නේ නම් ආණ්ඩුවක් පිහිටුවීමට සූදානම් බව ඊයේ (11) උදෑසන නිවේදනය කළ සමගි ජන බලවේගය ඊයේ රාත්‍රිය වනවිට සිය ස්ථාවරය තරමක් ලිහිල් කරමින් යළිත් නිවේදනයක් නිකුත් කර තිබේ.
ඒ, නිශ්චිත අවම කාලසීමාවක් තුළ ජනාධිපතිවරයා ධුරයෙන් ඉවත්වීමට පොරොන්දු වන්නේ නම් ඔහු යටතේ ආණ්ඩුවක් පිහිටුවීමට සූදානම් බව පවසමිනි.
ඊයේ රාත්‍රියේ පැවති සජබ මන්ත්‍රී කණ්ඩායම් රැස්වීම දැඩි උණුසුම් ස්වභාවයක් ගෙන තිබුණු අතර ආණ්ඩුවක් පිහිටුවීමට කටයුතු නොකරන්නේ නම් තමන් පක්ෂයෙන් ඉවත් වන බව හරීන් ප්‍රනාන්දු මහතා ප්‍රකාශ කර තිබිණි. ඔහුත් සමග තවත් මන්ත්‍රීවරුන් කණ්ඩායමක්ම පක්ෂයෙන් ඉවත් වීමට සූදානමින් සිටියදී පක්ෂ මහලේකම් රංජිත් මද්දුම බණ්ඩාර මහතා විසින් මෙම අලුත් නිවේදනය නිකුත් කර ඇත.
RN
