ජනතාව විසින් ඉතාම සාමකාමීව මාසයකට අධික කාලයක් තිස්සේ ගෝල්ෆේස් පිටියෙහි පවත්වාගෙන ගිය විරෝධතාවට පසුගිය මැයි 09 වනදා ප්‍රහාරයක් එල්ල කරන ලද්දේ ඒ වනවිට අග්‍රාමාත්‍ය මහින්ද රාජපක්ෂ මහතාගේ ආධාරකරුවන් පිරිසක් විසින් වන අතර අතර ඊට නායකත්වය දෙමින් මෙහෙයවන ලද්දේත් ශ්‍රී ලංකා පොදුජන පෙරමුණේ නායකයින් පිරිසක් විසිනි.
මෙම ප්‍රහාරයෙන් පසු මේ වනවිට දින 08ක් ගතවී ඇතත් තවමත් ඒ සම්බන්ධයෙන් අත් අඩංගුවට ගෙන ඇත්තේ එක් පුද්ගලයෙකු පමණි. ඔහුත් මොරටුව නගරසභාවේ සුළු සේවකයෙකි.
ඊට ප්‍රතිපක්ෂව මෙම ප්‍රහාරයෙන් පසු කෝපයට පත්ව ප්‍රතිප්‍රහාර එල්ල කළ පුද්ගලයින් 400 කට ආසන්න පිරිසක් මේ වනවිටත් අත් අඩංගුවට ගෙන තිබේ.
මෙම ප්‍රහාරය මෙහයවූවන්ට සහ ප්‍රහාරය එල්ල කළ මැරයින්ට එරෙහිව නීතිය ක්‍රියාත්මක කරන ලෙස සමාජයෙන් ද දැඩි බලපෑමක් එල්ල වෙමින් පවතී. එම තත්වය තුළ නව අග්‍රාමාත්‍ය රනිල් වික්‍රමසිංහ මහතා මේ සම්බන්ධයෙන් සොයාබැලීම සිය පක්ෂයේ නියෝජ්‍ය නායක රුවන් විජේවර්ධන මහතාට පවරා ඇත.
අප වෙත වාර්තා වන අන්දමට රුවන් විජේවර්ධන මහතාත් දිනපතා මේ සම්බන්ධයෙන් විමසීම් කළත් එයින් ප්‍රතිඵලයක් ලැබී නොමැත.
මීට අදාළ පුද්ගලයින් අත් අඩංගුවට ගැනීමට නොදී වළක්වාගෙන සිටින බලවතෙකු මෙතැන සිටින අතර ප්‍රශ්නය වන්නේ ඔහු කවුරුන්ද යන්න ය. නව ආණ්ඩුවේ ආයුෂ කොතෙක්ද යන්න තීරණය වන්නේ මේ අත් අඩංගුවට ගැනීම් වළක්වන පුද්ගලයාව පාලනය කරගැනීම මත වීමටත් බොහෝදුරට ඉඩ ඇති බවයි ආරංචිමාර්ග සඳහන් කළේ. මන්දයත් රටේ නීතිය ක්‍රියාත්මක වන ආකාරය විහිළු සහගත බව මෙම සිදුවීම හරහා රටේ සියලුම ජනතාව හමුවේ නිර්ලජ්ජිත ලෙස අනාවරණය වෙමින් පවතින බැවිනි.
RN
