කොළඹ LNW:ඖෂධ ගෙන්වීමේදී සිදුවන වංචා වැලැක්වීම සඳහා ජාතික ඖෂධ නියාමන අධිකාරියෙන් නව ආරක්‍ෂිත වැඩපිලිවෙලක් හදුන්වා දී තිබෙන බව එහි සභාපති විශේෂඥ වෛද්‍ය ආනන්ද විජේවික්‍රම මහතා පවසයි.
විගණකාධිපති විසින් ඉරිදිපත් කර තිබෙන ගැටළු මේ වන විට විසඳා ඇති අතර ජාතික ඖෂධ නියාමන අධිකාරිය විසින් ගෙන එන ඖෂධ දැන් සෞඛ්‍යාරක්ෂිත බවයි විජේවික්‍රම මහටා සඳහන් කරන්නේ.
මේ අතර ඖෂධ මිල තවදුරටත් පාලනය කිරීමට කටයුතු යොදන අතර මේ වන විට අධිකරණය හමුවේ නඩුවක් විභාග වන බවත් එම කටයුත්ත අවසන් වූ පසු මිල පාලනය ගැන අවධානය යොමුකරන බවත් තෝරාගත් අත්‍යවශ්‍ය ඖෂධ 50ක මල අඩුකිරීමට කටයුතු කරන බවත් ඔහු අවධාරණය කරයි.
”ජාතික ඖෂධ අධිකාරිය දැන් ගෙනෙන ඖෂධ සෞඛ්‍ය ආරක්ෂිතයි. විගණකාධිපති ඉදිරිපත් කර තිබෙන ගැටලු මේ වෙද්දී අපි නිවැරදි කරලා තියෙන්නේ. එකතුවෙලා තිබුණ ලිපිගොණුවල කටයුතු කරමින් යනවා. තව මාස කිහිපයක් යද්දී ඉවරකරගන්න පුලුවන්. ඖෂධ ලියාපදිංචි සදහා දෙන ලේඛන පිළිබද තමයි පහුගිය කාලයේ ප්‍රශ්න සිදුවුණේ. අපි මේ නිසා රජයේ මුද්‍රණාලය සමඟ කතා කරලා ආරක්‍ෂිත ක්‍රමවේද අනුව ලිපියක් ඉදිරිපත් කරන්න කටයුතු කරනවා. ආරක්‍ෂිත ස්ටිකරයකුත් නිකුත් කරනවා. හදිසි ප්‍රසම්පාදනය නිසයි මේ ගැටලු ඇතිවෙලා තියෙන්නේ කියලා නිරීක්ෂණය වෙලා තියෙන්නේ. හදිසි ප්‍රසම්පාදන අපි නවත්වලා තියෙන්නේ. ලියාපදිංචි කර ගේන ඖෂධත් නැවත නැවත පරීක්ෂා කිරීම වැඩිකළ යුතුව තිබෙනවා. ඒ සදහා කාර්ය මණ්ඩලය අලුතින් බදවාගැනීම කරමින් ඉන්නවා.” යනුවෙන් විජේවික්‍රම මහතා වැඩිදුරටත් පවසයි.
අද (21) කොළඹදී පැවති මාධ්‍ය හමුවකදීයි ඔහු මෙම අදහස් දක්වා සිටියේ.
ආශිකා බ්‍රාහ්මණ
