සටහන – රෂිකා හෙන්නායක
මැයි 23, කොළඹ (LNW): මෙරට සිදුවන මූල්‍ය වංචාවලින් සහ මූල්‍ය අපයෝජනවලින් ජනතාව ආරක්ෂා කර ගැනීමට නම් ජනතාවගේ මූල්‍ය සාක්ෂරතාව ඉහළ නැංවිය යුතු බව ශ්‍රී ලංකා මහ බැංකුවේ අධිපති, ආචාර්ය පී. නන්දලාල් වීරසිංහ මහතා ප්‍රකාශ කළේය.ඔහු මේ අදහස් පළ කළේ කොළඹ කොටුව මහ බැංකු මූලස්ථානයේ පැවති මෙරට මූල්‍ය සාක්ෂරතාව පිළිබඳව මාර්ගෝපදේශක සංග්‍රහය එළිදැක්වීමේ අවස්ථාවට ප්‍රධාන ආරාධිතයා ලෙස එක් වෙමිණි.
මහ බැංකු අධිපතිවරයා තවදුරටත් පැවසූවේ,
“මූල්‍ය සාක්ෂරතාවෙන් මූල්‍ය ආයතන නියාමනය කිරීම වෙනුවට එම ආයතනවලින් අවශ්‍ය සේවා විනිවිදභාවයෙන් යුතුව සහ කාර්යක්ෂමව ගැනීම සඳහා පාරිභෝගිකයන්ට අවස්ථාව සැලසෙනවා. මූල්‍ය සාක්ෂරතාවය රට පුරා ප්‍රවර්ධනයෙන් පාරිභෝගිකයන්ට තමන්ට තමන්ව මූල්‍ය වංචාවලින් සහ මූල්‍ය අපයෝජනවලින් ආරක්ෂා කරගැනීමට අවස්ථාව ලැබෙනවා.
මූල්‍ය සාක්ෂරතාව ප්‍රවර්ධනය කිරීමෙන් ජනතාවට අනාගතය වෙනුවෙන් ඉතිරි කිරීමටත්, නව ආයෝජන අවස්ථාවලට ප්‍රවේශවීමටත්, ඔවුන්ගේ මූල්‍ය කටයුතු යහපත්ව කළමනාකරණය කරගැනීමටත් හැකියාව ලැබෙනවා. මේ මාර්ගෝපදේශ සංග්‍රහයෙන් ප්‍රතිපත්ති සම්පාදකයන්ට මඟපෙන්වීමක් දෙනවා. එපමණක් නොවෙයි අපේ රටේ ජනතාවට යහපත් සහ මූල්‍ය වශයෙන් ශක්තිමත් අනාගතයකට මඟපෙන්වා දෙනවා. මූල්‍ය සඳහා වන ප්‍රවේශය වැඩි දියුණු කිරීම සඳහා එක්සත් ජාතීන්ගේ සංවර්ධන වැඩසටහන ශ්‍රී ලංකා රජය සමඟ තවදුරටත් එක්ව කටයුතු කිරීමට සූදානම්. මම ඒ බව අවධාරණය කරන්න කැමතියි.” ලෙසයි.
