කොළඹ LNW:ආරක්ෂාව අවශ්‍ය බවට ඉල්ලීම් කර ඇති පාර්ලිමේන්තු මන්ත්‍රීවරුන්ගේ ඉල්ලීම් සලකා බැලීම සඳහා ජාතික ආරක්ෂක කවුන්සිලයට යොමුකිරීමට කටයුතු කරන බව වැඩබලන පොලිස්පති ප්‍රියන්ත වීරසූරිය මහතා පවසයි.
කෙසේවෙතත් දැනට ආරක්ෂාව සම්බන්ධ අවසන් තක්සේරු වාර්තා ලැබී ඇති මන්ත්‍රීවරුන්ට අවශ්‍ය ආරක්ෂාව ලබාදීමට කටයුතු කර තිබෙන බවයි වැඩබලන පොලිස්පතිවරයා සඳහන් කරන්නේ.
කථානායක වෛද්‍ය ජගත් වික්‍රමරත්න මහතාගේ ප්‍රධානත්වයෙන් ඇමති ආරක්ෂක කොට්ඨාස අධ්‍යක්ෂවරයා ඇතුළු අදාළ නිලධාරීන්ගේ සහභාගීත්වයෙන් පාර්ලිමේන්තු පරිශ්‍රයේ පැවති සාකච්ඡාවකට එක්වෙමින් වැඩබලන පොලිස්පති ප්‍රියන්ත වීරසූරිය මහතා මෙම අදහස් පළකර තිබුණි.
රටේ පවතින ආරක්ෂක තත්ත්වය මත මන්ත්‍රීවරුන්ගේ ආරක්ෂාවට තර්ජනයක් මතුව තිබෙන බව පසුගියදා විපක්ෂයේ පාර්ශව විසින් කථානායකවරයා දැනුවත් කිරීමටද කටයුතු කළේය.
ඒ අනුව කථානායකවරයා මන්ත්‍රීවරුන්ගේ ආරක්ෂාව සම්බන්ධයෙන් සිදුකරන තක්සේරු වාර්තාවල ප්‍රගතිය තමන් වෙත දන්වන්න ලෙස වැඩබලන පොලිස්පතිවරයාට උපදෙස් ලබා දී තිබුණි.
රටේ පවතින ආරක්ෂක තත්ත්වය පිළිබඳව ද දැනුවත් කරමින් වැඩබලන පොලිස්පතිවරයා පෙන්වා දී තිබුණේ මෑත කාලයේ සිදුවූ මනුෂ්‍ය ඝාතන රැසක් අපරාධ කල්ලි සහ මත්කුඩු ජාවාරම්කරුවන් අතර සිදුවන ගැටුම්වල ප්‍රතිඵල බැවින් එම අපරාධ සඳහා ප්‍රදේශීය දේශපාලනඥයන් සම්බන්ධ බවට හඳුනාගෙන ඇති බවයි.
එහිදී විරුද්ධ පාර්ශ්වයේ පක්ෂ නායකයින් විසින් තම පාර්ශ්වයේ මන්ත්‍රීවරුන්ට ආරක්ෂාව ලබාගැනීම සම්බන්ධයෙන් මතුව තිබෙන අවශ්‍යතාවය සම්බන්ධයෙන් කරුණු ඉදිරිපත් කර ඇති අතර වෛද්‍ය රාමනාදන් අර්ච්චුනා මන්ත්‍රීවරයා අදහස් දක්වමින් පවසා ඇත්තේ තමන්ට අවශ්‍ය ආරක්ෂාව ලබාදීම සඳහා පහසුකම් නොමැති නම් තම ආරක්ෂාව සලසා ගැනීම සඳහා ගිනිඅවි ලබා දෙන ලෙසයි.
ඊට ප්‍රතිචාර දක්වමින් විපක්ෂ නායක සජිත් ප්‍රේමදාස මහතා පවසා ඇත්තේ ඉහළ ප්‍රජාතන්ත්‍රවාදී ලක්ෂණ පවතින රටක ආරක්ෂාව වෙනුවෙන් ගිනිඅවි ලබා දීම සිදු නොවිය යුතු බවයි.
අදාළ බලධාරීන් විසින් ඒ ඒ පුද්ගලයන්ගේ ආරක්ෂාව තහවුරු කිරීමට කටයුතු කළයුතු බව විපක්ෂනායකවරයා එහිදී අවධාරණය කර ඇත.
