සටහන – රෂිකා හෙන්නායක
මැයි 29, කොළඹ (LNW): බැංකුවක් බිඳ රන් භාණ්ඩ හා මුදල් සොරා ගැනීමේ සිද්ධියේ සැකකරුවන් දෙදෙනකු අත්අඩංගුවට ගෙන තිබෙන බව සඳහන් වේ. ජාඇල ප්‍රදේශයට අදාළ බැංකුවක් බව වාර්තා වේ.
මෙම බැංකුව බිඳ රුපියල් කෝටි දෙකකට ආසන්න වටිනාකමකින් යුතු රන් භාණ්ඩ හා මුදල් සොරාගෙන ගොස් තිබුණේ පසුගිය 25 වනදායි.
මෙහි ප්‍රධාන සැකකරු කොල්ලුපිටිය ප්‍රදේශයේදී පසුගිය 26 වනදා අත්අඩංගුවට ගෙන තිබුණ අතර , සොරකම් කළ රන් වළලු 49 ක්, මුදු 81 ක් , අත්පලදනා 24 ක්, රන් දම්වැල් 79 ක්, පෙන්ඩන්ට් 26 ක් , කරමාල 09 ක් ඇතුළු උපකරණ සොයා ගැනුණේ ඔහුගෙන් කළ ප්‍රශ්න කිරීමේදී බව වාර්තා වේ.
ඔහුගෙන් තවදුරටත් සිදු කළ ප්‍රශ්නකිරීම්වලදී හෙලි වූ තොරතුරු මත තවත් සැකකරුවන් දෙදෙනෙකු අත්අඩංගුවට ගැනීමට හැකි වී තිබෙන බවද පැවසේ.
පොලීසිය පවසන්නේ , ඔවුන් පානදුර හා බොරලැස්ගමුව ප්‍රදේශවල පදිංචිකරුවන් බවයි.
