සටහන – රෂිකා හෙන්නායක ජුනි 11 , කොළඹ (LNW):
අමාත්‍ය අලී සබ්රි මහතා හා රුසියා විදේශ කටයුතු අමාත්‍යවරයා අතර පැවති විශේෂ හමුවක් සිදු වී ඇති අතර, රුසියා හමුදාවට තවදුරටත් ශ්‍රී ලාංකිකයින් බඳවා ගැනීම සිදුනොකරන බවට රුසියා විදේශ කටයුතු අමාත්‍ය සර්ජි ලැව්රොව් අමාත්‍ය අලී සබ්රි මහතා වෙත පොරොන්දුවක් ලබාදී තිබෙන බව සඳහන් වේ.
2024 බ්‍රික්ස්, විදේශ කටයුතු අමාත්‍යවරුන්ගේ සැසියට සහභාගී විමට අමාත්‍ය අලී සබ්රි රුසියාවට ගොස් සිටින අතර එහිදි මෙම සාකච්ඡාව සිදුකෙරුණ බව වාර්තා වේ.
එරට ශ්‍රී ලංකා තානාපති කාර්යාලය නිවේදනය කරන්නේ, එහිදි දෙරට අතර සංචාරක, උසස් අධ්‍යාපන හා ආර්ථික සහයෝගීතාව ඇතුලු ද්විපාර්ශික සබදතා ඉහළ නැංවීම සම්බන්ධයෙන් සාකච්ඡා පැවැත්වුණු බවයි .
සාකච්ඡාව අතරතුරදි රුසියා හමුදාවට එක්ව සිටින ශ්‍රී ලාංකිකයින් සම්බන්ධයෙන් පැන නැගි ඇති ගැටලු පිළිබද අමාත්‍ය අලී සබ්රි මහතා රුසියා විදේශ කටයුතු අමාත්‍යවරයාව දැනුවත් කර තිබෙන අතර, එම ගැටලු නිරාකරණය කර ගැනීමට පූර්ණ සහයෝගය ලබාදෙන බව රුසියා විදේශ කටයුතු ආමත්‍යවරයා මෙහිද සදහන් කර ඇත.
එමෙන්ම මෙම මස 26 / 27 යන දෙදින තුළ දී රාජ්‍ය අමාත්‍ය තාරක බාලසූරිය මහතාගේ නායකත්වයෙන් විශේෂ දූත පිරිසකට රුසියාවේ ආරක්ෂක නියෝජ්‍ය අමාත්‍යවරයා සමග විශේෂ හමුවක් පැවැත්විමට ද එකගතාවය පළ වී තිබෙන බව සඳහන් වේ.එරට ශ්‍රී ලංකා තානාපති කාර්යාලය නිවේදනය කරන්නේ එහිදි අදාළ ගැටලුව සවිස්තරාත්මකව සමාලෝචනය කර සුදුසු ක්‍රියාමාර්ග ගැනීමට එකගතාවය පළ වු බවයි .
