සටහන: සශිකලා මධුෂාණි
ජුලි 01; ලෝකය(අවුට්බවුන්ඩ් ටුඩේ): එක්සත් ජනපද ජනාධිපති ඩොනල්ඩ් ට්‍රම්ප් රාජ්‍ය වියදම් සිමා කිරීම සඳහා විදේශ මානුෂීය ආධාර කපා හැරීම හේතුවෙන් 2030වන විට මරණ මිලියන 14කින් ඉහල යා හැකි බව ලැන්සෙට් වෛද්‍ය සඟරාවේ ප්‍රකාශයට පත් කරන ලද අධ්‍යනයකින් හෙළි වී තිබේ.
ඒ අනුව පර්යේෂක කණ්ඩායම රටවල් 133ක පසුගිය දත්ත විශ්ලේෂණය කරමින් සඳහන් කර තිබුණේ USAID අරමුදල් හේතුවෙන් 2001 සහ 2021 අතර සංවර්ධනය වෙමින් පවතින රටවල මරණ මිලියන 91 ක් වළක්වා ඇති බවයි.
අවදානමට ලක්ව ඇති අයගෙන් තුනෙන් එකක් නොමේරූ ළදරුවන් මෙන්ම ළමුන් වන අතර එම සංඛ්‍යාවට වයස අවුරුදු පහට අඩු ළමුන් මිලියන 4.5 කට අධිකව නැතහොත් වසරකට ළමා මරණ 700,000 ක් පමණ ඇතුළත් වනු ඇත.
පසුගිය මාර්තු මාසයේදී USAID හි සියලුම වැඩසටහන් වලින් 80% කට වඩා අවලංගු කර ඇති බවට එක්සත් ජනපද රාජ්‍ය ලේකම් මාර්කෝ රුබියෝ නිවේදනය කළ අතර එය අවදානමට ලක්විය හැකි ජනගහනය අතර සෞඛ්‍ය ක්ෂේත්‍රයේ දශක දෙකක ප්‍රගතිය හදිසියේම නතර කිරීමට සහ ආපසු හැරවීමට පවා අවදානමක් ඇති කර ඇත.
