අත්‍යවශ්‍ය සේවා ප්‍රකාශයට පත්කළ පමණින් රට තවදුරටත් පවත්වාගෙන යා නොහැකි බවත්, මේ වනවිට රටේ සියලු අංශ අඩාල වී ඇති බවත් ශ්‍රී ලංකා පරිපාලන සේවා සංගමය අවධාරණය කරනවා.
එම සංගමය ආණ්ඩුවෙන් ඉල්ලා සිටින්නේ වහාම ජාතික ආපදා තත්වයක් ප්‍රකාශයට පත්කළ යුතු බවයි. අත්‍යවශ්‍ය සේවා පවත්වාගෙන යාම සඳහා නිසි වැඩපිළිවෙලක් සකස් කළයුතු බවත් නිසි බළධාරියෙකු යටතේ එම වැඩපිළිවෙල ක්‍රියාත්මක වියයුතු බවත් පරිපාලන සේවා සංගමය වැඩිදුරටත් පෙන්වා දෙනවා.
අත්‍යවශ්‍ය සේවා පවත්වාගෙන යාම සඳහා රාජ්‍ය නිළධාරීන් ජීවිත අවදානමද නොසලකා සිය සේවය ලබාදෙන බව පෙන්වා දෙන එම සංගමය පවසන්නේ රාජ්‍ය නිළධාරීන්ට සිදුවන පීඩා සම්බන්ධයෙන් නිසි පරිදි නීතිය ක්‍රියාත්මක නොවන බවයි. දිවයින පුරා රාජ්‍ය නිළධාරීන් දේශපාලනඥයන්ගේ සහ වෙනත් පුද්ගලයන්ගේ තර්ජනවලට, පීඩාකිරීම්වලට ලක්වන බවත් ඊට වගකිවයුත්තන් අත්අඩංගුවට ගැනීමට මෙතෙක් ක්‍රියා කර නොමැති බවත් පරිපාලන සේවා සංගමය ප්‍රකාශ කරනවා.
මේ සඳහා නිසි වැඩළිවෙලක් සකස් නොකළහොත් රාජ්‍ය නිළධාරීන් කළකිරීමට හෝ බියට පත්ව සේවාවලින් ඉවත්ව යා හැකි බවත් එසේ වුවහොත් අත්‍යවශ්‍ය සේවා පවා සම්පූර්ණයෙන් ඇනහිටීමේ අවදානමක් මතුවන බවත් එම සංගමය වැඩිදුරටත් අවධාරණය කරයි.
හදිසි තත්වයක් ප්‍රකාශයට පත් කර අත්‍යවශ්‍ය සේවා පවත්වාගෙන යාම තවදුරටත් ප්‍රමාද කරන්නේ නම් දැඩි වෘත්තීය ක්‍රියාමාර්ග ගැනීම හැර වෙනත් විසඳුමක් නොමැති බවයි ශ්‍රී ලංකා පරිපාලන සේවා සංගමය පවසන්නේ.
UN
