විදුලි බිල සහ ඉන්ධන මිල ගණන් අඩුකිරීමට අවස්ථාව තිබියදීත් රජය හිතාමතාම මේ මිල ගණන් ඉහළ මට්ටමක පවත්වාගෙන යාම තුළ, අධික වියදම් දරාගැනීමට නොහැකිව කර්මාන්තශාලා වැසී යාමේ අවදානමක් පවතින බව සමගි වෘත්තීය සමිති සන්ධානයේ කැඳවුම්කරු ආනන්ද පාලිත මහතා පවසයි.
“10% බද්ද තියෙනකොට – ඇඟළුම්වලට 6% – 16% අතර බද්ද තියෙනකොට – ඒත් කර්මාන්තශාලා ගණනාවක් වැහුණා. විදුලි බිල අඩුකරන්න තියෙද්දී ජනාධිපතිතුමා පළමුවෙන්ම ඒ වගකීම පැහැර හැරියා. ඔක්තෝබර් අඩුකළා නම් 33% කින්, අපි ජනවාරි 20% කින් අඩුකරනවා. මේ මාසෙත් ඉන්ධන මිල නිවැරදිව අඩු කරන්න කියලා මම කරුණු පෙන්නුවේ ඒකයි. එක නැවක් ස්පොට් ටෙන්ඩරයට ක්ෂණික මිලදීගැනීමට ගෙනල්ලා ඉන්ධන මිල වැඩි කළා. විදුලියයි ඉන්ධනයි වැඩිකිරීම මත 10% බද්ද තියෙද්දීත් ඇඟළුම්වලට 6% – 16% තියෙද්දීත් අපේ කර්මාන්තශාලා වැහුණා. වියදම වැඩියි කියලා අද බහුජාතික සමාගම් ඉවත් වෙනවා. ළංමැඩි න්‍යායට නිකම් හිටියා. ඉතා ක්ෂණිකව මාසයක් එකහමාරක් යනකොට රට තුළ නැගෙන්නේ රැකියා විරහිත අඳෝනා.
තෙල් සංස්ථාව රකිනවා කියලා ඇවිල්ලා 3750ක් එළියට දාන්න යන්නෙ. ලාල්කාන්ත ඇමතිවරයා කියනවා මොන උද්ඝෝෂණය කළත් මොන වැඩවර්ජනය කළත් විපක්ෂය මොන දැඟළිලි දැඟළුවත් අපි කරන දේ කරනවා කියලා. එහෙම නම් මේ යන්නේ වහල් යුගයකට, වැඩවසම් යුගයකට. සමස්ත විපක්ෂය සහ නායකයො පාරට බැසිය යුතුයි, සිවිල් සංවිධාන සහ වෘත්තීය සමිති එන්න ලෑස්තියි. විපක්ෂයට වගකීමක් තියෙනවා ප්‍රජාතන්ත්‍රවාදීව ජනතාව නැගිට්ටවන්න”
ආනන්ද පාලිත මහතා මේ බව පැවසුවේ ඊයේ (12) පැවති මාධ්‍ය හමුවක් අමතමිනි.
