රාජ්‍ය අමාත්‍ය චාමර සම්පත් දසනායක මහතා ඊයේ (17) පෙරවරුවේ එප්පාවල පොස්පේට් සමාගමේ නිරීක්ෂණ චාරිකාවක නිරත වූ අතර එහිදී උණුසුම් තත්වයක් උද්ගත වී තිබිණි.
ඒ, එම ආයතනයෙහි ප්‍රශ්නකාරී ගනුදෙනු කිහිපයක් සම්බන්ධයෙන් සේවකයින් විසින් පෙන්වා දීමෙන් අනතුරුව ඒ පිළිබඳව නිලධාරියකුගෙන් ප්‍රශ්න කිරීමට යාමේදී ය.
එම සමාගමේ යන්ත්‍රවලට නොගැලපෙන අමතර කොටස් ගෙන්වීමෙන් රුපියල් ලක්ෂ 50කට අධික පාඩුවක් සිදුව ඇතැයි සේවකයින් විසින් අමාත්‍යවරයාට පෙන්වා දී තිබුණු අතර ඊට අදාළ නිලධාරියාගෙන් ඒ පිළිබඳ ප්‍රශ්න කිරීමේදී ඔහු පැවසුවේ ගෙන්වා ඇති අමතර කොටස් යන්ත්‍රවලට සවිකිරීමට නොහැකිය යන්න සත්‍යයක් වන නමුත් එහි වගකීම තමන්ට භාරගැනීමට නොහැකි බවත් තමන් කිසිදු වංචාවක් කර නොමැති බවත් ය.
මේ සම්බන්ධයෙන් අමාත්‍යවරයා සහ නිලධාරියා අතර වචන හුවමාරුවක් සිදුවෙද්දී සේවකයින් පිරිසක් අදාළ නිලධාරියාට පහරදීමට උත්සාහ කරනු ද දක්නට ලැබිණි.
RN
