සටහන: සශිකලා මධුෂාණි,
ජුනි 28, ලෝකය (අවුට්බවුන්ඩ් ටුඩේ) : ඊශ්‍රායලය විසින් අල්ලාගෙන සිටින ගෝලාන් කඳුකරයේ මජ්දාල් ෂැම්ස් හි ඩ්රූස් ගම්මානයේ පාපන්දු පිටියකට ඉරානයේ පිටුබලය ලබන ලෙබනන්හි හිස්බුල්ලා සංවිධාන එල්ල කරන ලද රොකට් ප්‍රහාරයක් හේතුවෙන් ළමුන් ඇතුළු 12 දෙනෙකු මියගොස් 13 දෙනෙකු තුවාල ලබා ඇති බව වාර්තා වේ.
ගාසා තීරයේ ගැටුම ආරම්භයේ සිට ඊශ්‍රායලයේ හෝ ඊශ්‍රායලයට ඈඳාගත් ප්‍රදේශ වලට හිස්බුල්ලා සංවිධානය ප්‍රහාර දියත් කළ අතර මෙම ප්‍රහාරය සම්බන්ධයෙන් විශේෂ ප්‍රකාශයක් නිකුත් කරමින් ඊශ්‍රායල් අගමැති බෙන්ජමින් නෙතන්යාහු සඳහන් කර තිබුණේ, මෙම ප්‍රහාරය දියත් කළ හිස්බුල්ලා සංවිධානය මෙතෙක් නොගෙවූ ආකාරයේ විශාල මිලක් ගෙවනු ඇති බවටයි.
ඒ අනුව, නෙතන්යාහුගේ අන්ත දක්ෂිණාංශික සභාග සගයා වන මුදල් ඇමති Bezalel Smotrich, X හි සඳහනක් එකතු කරමින් කියා තිබුණේ, “දරුවන්ගේ මරණය සඳහා, නස්රල්ලා ඔහුගේ හිසෙන් ගෙවිය යුතුය. ලෙබනනය සියල්ලම ගෙවිය යුතු බවයි”
කෙසේ නමුත් හිස්බුල්ලා සංවිධානය ඊශ්‍රායලයේ චෝදනාවන් තරයේම ප්‍රතික්ෂේප කර ඇති අතර මෙම ප්‍රහාරය සම්බන්ධයෙන් එක්සත් ජනපදය සඳහන් කර තිබුණේ, මෙම ප්‍රහාරය බිහිසුණු ප්‍රහාරයක් ලෙස හෙළා දකින බවත්, ඊශ්‍රායලයේ ආරක්ෂාව සඳහා එක්සත් ජනපදයේ සහය අඛණ්ඩව ලබා දෙන බවත්ය.
