කොළඹ LNW:මරණ දඬුවම නියම කෙරුණු හිටපු පොලිස්පති පූජිත් ජයසුන්දර වෙනුවෙන් ශ්රේෂ්ඨාධිකරණය හමුවේ අභියාචනයක් ඉදිරිපත් කරන බව ඔහු වෙනුවෙන් පෙනී සිටි නීතිඥ රොෂාන් දෙහිවල මහතා පවසයි.
ඔහු මේ බව ප්රකාශ කළේ, වැලිකඩ බන්ධනාගාරයේ රඳවා සිටින හිටපු පොලිස්පතිවරයා හමුවීමට අද (01) ගිය අවස්ථාවේදීය.
මරණ දඬුවම නියම කෙරුණු දිනයේ සිට දින 28ක් ඇතුළත අදාළ අභියාචනය ගොනු කළ යුතු බැවින් කඩිනමින් ඊට අවශ්ය පියවර ගන්නා බවයි නීතිඥ රොෂාන් දෙහිවල මහතා ප්රකාශ කළේ.
එහිදී මාධ්යවේදීන් පූජිත් ජයසුන්දරගේ සෞඛ්ය තත්ත්වය සම්බන්ධයෙන් ප්රශ්න කළ අතර ඊට පිළිතුරු ලබාදෙමින් නීතිඥවරයා ප්රකාශ කළේ, ඔහු මේ වනවිට යහපත් සෞඛ්ය තත්ත්වයෙන් පසුවන බවයි.
පාස්කු ඉරු දින ත්රස්ත ප්රහාරයක් එල්ලවන බවට බුද්ධි තොරතුරු ලැබී තිබියදීත් එය වළක්වා නොගැනීමෙන්, රාජකාරිය පැහැරහැරීම සහ මිනීමැරීමට අනුබල දීමේ චෝදනාවලට වැරදිකරුවන් කරමින් හිටපු පොලිස්පති පූජිත් ජයසුන්දරට සහ හිටපු ආරක්ෂක ලේකම් හේමසිරි ප්රනාන්දු යන අයට කොළඹ ස්ථිර ත්රිපුද්ගල මහාධිකරණය විසින් මරණ දඬුවම නියම කෙරුණි.
