හිටපු ජනාධිපති රනිල් වික්‍රමසිංහ මහතා හෙට (22) දිනයේදී අපරාධ පරීක්ෂණ දෙපාර්තමේන්තුව හමුවට පැමිණෙන බව දැනුම් දී තිබේ.
ඒ, ප්‍රකාශයක් ලබාගැනීම සඳහා පැමිණෙන ලෙස එම දෙපාර්තමේන්තුව විසින් කරන ලද කැඳවීමක් අනුව ය.
අපරාධ පරීක්ෂණ දෙපාර්තමේන්තුවට ප්‍රකාශය ලබාදීමෙන් අනතුරුව කොළඹ මල්පාරේ පිහිටි තම කාර්යාලයේදී මාධ්‍ය හමුවක් පැවැත්වීමට ද ඒ මහතා කටයුතු සූදානම් කර ඇති බව සඳහන්.
එම මාධ්‍ය හමුවෙන් පසුව ඒ මහතා නේපාලයේ සහ ඉන්දියාවේ සංචාරයක් සඳහා පිටව යාමට නියමිත බවයි ආරංචිමාර්ග සඳහන් කළේ.
රනිල් වික්‍රමසිංහ මහතාව හෙට දිනයේදී අත් අඩංගුවට ගෙන රක්ෂිත බන්ධනාගාරගත කෙරෙනු ඇති බවට ආණ්ඩුවට හිතවත් යූටියුබ් නාලිකා හිමිකරුවකු වන සුදත්ත තිලකසිරි විසින් පවසා ඇත්තේ හුදෙක් ඔහුගේ යූටියුබ් නාලිකාවේ නැරඹුම් වාර සංඛ්‍යාව වැඩිකර ගැනීමේ අරමුණින් ටික්ටොක් හරහා සිදුකෙරෙන ප්‍රචාරක කටයුත්තක් වශයෙන් මිස ඊට කිසිදු පදනමක් නොමැති බවත් ආරංචිමාර්ග පැවසීය.
රනිල් වික්‍රමසිංහ මහතාව අපරාධ පරීක්ෂණ දෙපාර්තමේන්තුව හමුවට කැඳවා ඇත්තේ ඒ මහතා ජනාධිපති ධුරයේ සිටියදී රජයේ මුදල් අවභාවිතා කරමින් ලන්ඩනයේ සංචාරයක නිරත වී ඇති බවට එල්ල වී ඇති චෝදනාවක් අනුව සිදුකෙරෙන විමර්ශනයකට අදාළව ය.
