සටහන – රුවන් නෙළුගොල්ල
විනිසුරුවරුන්ගේ විශ්‍රාම යාමේ වයස් සීමාව වැඩිකිරීම මේ මොහොතේ අත්‍යාවශ්‍ය බව වෙළඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍ය වසන්ත සමරසිංහ මහතා පවසයි.
“22 වැනි ආණ්ඩුක්‍රම ව්‍යවස්ථා සංශෝධනය දැන් අපි පාර්ලිමේන්තුවට ඉදිරිපත් කරලා තියෙනවා. මේකත් අත්‍යාවශ්‍යයි මේ වෙලාවෙ. සාමාන්‍ය ඉඩම් නඩුවක් උසාවියට ගියොත් කොච්චර කල් යනවද ? ඇස් වහගෙන කිව්වහැකි අවුරුදු දහයෙන් එහා කියලා. නේද ? අධිකරණ පද්ධතිය තුළ ගොඩගැහිලා තියෙනවා නඩු. සමහර ක්ෂේත්‍රවල තියෙන ප්‍රශ්න විසඳන්න යනකොට අත්දැකීම් ඇති පළපුරුද්ද ඇති අය ක්ෂේත්‍රයේ ඉන්න ඕනෙ විතරක් නෙවෙයි, ඒ සමහර සංශෝධන නොකර මේ වැඩේ කරන්න බැහැ. ඔය විපක්ෂය පස් කන්න හදනවා. හැබැයි ඉතින් මොකක්ද ස්වාධීනත්වයට හානිවෙන විදිහ කියලා කියන්නෙ නැහැ. එක එක පුද්ගලයෝ බලන් නෙවෙයි මේක කරන්නෙ. වසර දෙකක සේවා කාලය වැඩිකිරීම විතරක් නෙවෙයි අපි අධිකරණ පද්ධතියේ විශාල වැඩ කොටසක් කරමින් තියෙන්නෙ”
වසන්ත සමරසිංහ අමාත්‍යවරයා මේ බව පැවසුවේ මොරවක්කෝරළේ සමූපකාරයේ නව පරිපාලන ගොඩනැගිල්ලට මුල් ගල්තැබීමේ උත්සවයට එක්වෙමිනි.
