රෂිකා හෙන්නායක අගෝස්තු 25 , කොළඹ LNW :
හෘද හා උරස් කුහර සැත්කමක් සඳහා දිනයක් ලැබෙන තුරු රෝගියෙකු සහ ඔවුන්ගේ පවුලේ සාමාජිකයන් ගත කරන “නොතිත් බලාපොරොත්තුවේ” කාලය කෙතරම් පීඩාකාරීද? මෙය පෞද්ගලික වේදනාවක් පමණක් නොව, අපගේ නිදහස් සෞඛ්‍ය පද්ධතිය මුහුණ දෙන බැරෑරුම් ප්‍රතිපත්තිමය අභියෝගයකි. මෙම අර්බුදයට පිළියම් ලෙස, රාජ්‍ය යටිතල පහසුකම් ප්‍රතිසංවිධානය කිරීම සහ උපායමාර්ගික මැදිහත්වීමක් හරහා එළඹුණු නව ත්‍රිපාර්ශ්වික අවබෝධතා ගිවිසුම, මෙරට නිදහස් සෞඛ්‍ය සේවයේ නව බලාපොරොත්තුවක් දල්වා තිබේ. මෙය පරිපාලනමය පියවරක් නොව, රාජ්‍ය සම්පත් කළමනාකරණය පිළිබඳ නව දැක්මක් සහිත විප්ලවීය ප්‍රවේශයකි.
සම්පත් හා විශේෂඥතාවයේ උපායමාර්ගික සහයෝගීතාව
මෙම ගිවිසුම යනු ප්‍රාග්ධන ආයෝජන සහ මානව ප්‍රාග්ධනය අතර පවතින අසමතුලිතතාවය මඟහරවා ගැනීමකි. වේරහැර පිහිටි KDU ශික්ෂණ රෝහල සතුව අතිනවීන ශල්‍යාගාර සහ උසස් වෛද්‍ය උපකරණ පවතී. එහෙත්, විශේෂඥ සායනික කාර්ය මණ්ඩලයේ සීමිත බව හේතුවෙන් එම මිල අධික සම්පත්වලින් මෙතෙක් උපරිම ප්‍රයෝජන ගැනීමට නොහැකි වී තිබුණි. අනෙක් අතට, කොළඹ ජාතික රෝහල (NHSL) සතුව අතිවිශිෂ්ට විශේෂඥ දැනුමක් සහිත වෛද්‍ය කණ්ඩායම් සිටියද, රෝගීන්ගේ අධික ඉල්ලුම හමුවේ ඔවුන්ගේ සේවාවන් සැපයීමට ඇති භෞතික ඉඩකඩ සීමිතය.
මෙම අසමතුලිතතාවය විසඳීම සඳහා ගිවිසුම මඟින් යෝජිත මූලික සංකල්පය මෙසේය,,,
"ජාතික රෝහලේ සේවාවන්හි දිගුවක් ලෙස KDU රෝහලේ පහසුකම් භාවිතා කිරීමට මෙමඟින් අවස්ථා සැලසේ. ඒ අනුව, ජාතික රෝහලේ විශේෂඥ වෛද්‍යවරුන් ඇතුළු කාර්ය මණ්ඩලයේ මැදිහත්වීමෙන්, පොරොත්තු ලේඛනවල සිටින රෝගීන් සඳහා KDU රෝහල් පරිශ්‍රයේදී හෘද හා උරස් කුහර සැත්කම් සිදුකිරීම සහ විශේෂඥ ප්‍රතිකාර ලබාදීම සිදුකෙරේ."
භෞතික සම්පත් එක් ස්ථානයකත්, විශේෂඥ දැනුම තවත් ස්ථානයකත් පවතින විට ඒවා මෙලෙස ඒකාබද්ධ කිරීම, රාජ්‍ය සම්පත් ප්‍රශස්තකරණය පිළිබඳ ඉතා විශිෂ්ට සහ ප්‍රායෝගික නිදසුනකි.
අමාත්‍යාංශ තුනක ඒකාබද්ධ ප්‍රයත්නය: ආයතනික බාධක බිඳ දැමීම
බොහෝ විට රජයේ ආයතන එකිනෙකින් වෙන්ව හුදකලාව කටයුතු කිරීම නිසා පොදු ජනතාවට ලැබිය යුතු සේවාවන් ප්‍රමාද වේ. එහෙත් මෙම වැඩපිළිවෙළ හරහා ආරක්ෂක අමාත්‍යාංශය, සෞඛ්‍ය හා ජනමාධ්‍ය අමාත්‍යාංශය සහ කොතලාවල ආරක්ෂක විශ්වවිද්‍යාලය (KDU) යන ආයතන තුන ඒකාබද්ධ වී තිබේ. සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා විසින් ඉදිරිපත් කළ අමාත්‍ය මණ්ඩල යෝජනාවකට අනුව මෙම උපායමාර්ගික එකඟතාවය නිර්මාණය විය.
මෙම ඓතිහාසික ගිවිසුම සඳහා බලධාරීන් තිදෙනෙකු අත්සන් තබා ඇත…
- එයාර් වයිස් මාර්ෂල් සම්පත් තුයියකොන්තා මහතා – ලේකම්, ආරක්ෂක අමාත්‍යාංශය.
- විශේෂඥ වෛද්‍ය අනිල් ජාසිංහ මහතා – ලේකම්, සෞඛ්‍ය හා ජනමාධ්‍ය අමාත්‍යාංශය.
- රියර් අද්මිරාල් එච්. ජී. යු ධම්මික කුමාර මහතා – උපකුලපති, ජෙනරාල් ශ්‍රීමත් ජෝන් කොතලාවල ආරක්ෂක විශ්වවිද්‍යාලය.
මෙවැනි සහයෝගීතාවයකින් පෙනී යන්නේ ආයතනික රතු පටි සහ පරිපාලනමය සීමා මායිම් ඉවත් කර ජනතාවට සේවය කිරීමට පවතින සැබෑ කැපවීමයි.
හෘද හා උරස් කුහර සැත්කම් ප්‍රමුඛතාව සහ සන්ධිස්ථානයක අගය
මෙම ක්‍රියාවලියේ සෘජු ප්‍රතිලාභය හිමිවන්නේ කොළඹ ජාතික රෝහලේ හෘද හා උරස් කුහර ඒකකයේ සැත්කම් සඳහා දිගුකාලීනව පොරොත්තු ලේඛනවල රැඳී සිටින රෝගීන්ටය. හෘද සැත්කමක් යනු කාලය සමඟ කරන සටනකි; සෑම ප්‍රමාවීමක්ම මරණය සමඟ කරන ගනුදෙනුවකි.
මෙම මැදිහත්වීම නිදහස් සෞඛ්‍ය සේවයේ වැදගත් “සන්ධිස්ථානයක්” (Milestone) ලෙස හැඳින්විය හැක්කේ මන්ද? මෙහි වටිනාකම සැත්කම් ප්‍රමාණය ඉහළ දැමීම පමණක් නොවේ. මෙය අමාත්‍යාංශ දෙකක් අතර ඇති වූ ව්‍යුහගත ඒකාබද්ධතාවයකි (Structural Integration). අධික පිරිවැයක් දරා අලුතින් උපකරණ මිලදී ගන්නා තෙක් බලා නොසිට, දැනට පවතින සම්පත් හවුලේ පරිහරණය කිරීම (Asset Sharing) හරහා රජයේ මුදල් බිලියන ගණනක් ඉතිරි කර ගැනීමටත්, එමඟින් ක්ෂණිකව සේවාව ලබාදීමටත් හැකි වීම මෙහි ඇති සුවිශේෂීත්වයයි.
රාජ්‍ය අංශයේ සම්පත් ඒකාබද්ධ කිරීම තුළින් ජනතාවට වඩාත් කාර්යක්ෂම සේවාවක් ලබාදිය හැකි බවට මෙම ත්‍රිපාර්ශ්වික ගිවිසුම මඟ පෙන්වයි. මෙහිදී අප උගත යුතු ලොකුම පාඩම නම්, රජයක් යටතේ පවතින විවිධ අංශ මෙලෙස සහයෝගයෙන් කටයුතු කරන්නේ නම්, සෞඛ්‍ය ක්ෂේත්‍රයේ පමණක් නොව රටේ අනෙකුත් පොදු සේවාවන්හි පවතින බරපතල ගැටලු පවා විසඳීම අපහසු නොවනු ඇත.
