කොළඹ LNW:එක්සත් ජාතික පක්ෂයෙන් සමඟි ජන බලවේගයට ගිය අයට පනවා තිබූ තහනම ඉවත් කරන බව එජාප නායක හිටපු ජනාධිපති රනිල් වික්‍රමසිංහ මහතා පවසා තිබේ.
එළඹෙන 06 වැනිදා පැවැත්වෙන එජාප සම්මේලනයට සහභාගී වීමේ අවස්ථාව එමඟින් උදා කර දීම එමඟින් අපේක්ෂා කරයි.
එළඹෙන සැප්තැම්බර් 6 වන දින පැවැත්වෙන එක්සත් ජාතික පක්ෂ වාර්ෂික සම්මේලනයට විපක්ෂ නායකයින්ට ආරාධනා කිරීමට නියමිත අතර හිටපු ජනාධිපතිවරුන් වන මහින්ද රාජපක්ෂ සහ මෛත්‍රීපාල සිරිසේන යන අයටද ආරාධනා කර ඇති බව සඳහන්.
හිටපු ජනාධිපති රනිල් වික්‍රමසිංහ මහතා අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන රක්ෂිත බන්ධනාගාර ගත කිරීමේ සිද්ධියත් සමඟ විපක්ෂයේ සියලුම කණ්ඩායම් පාහේ ඒකාරාශී වන ආකාරය දක්නට ලැබුණි.
විපක්ෂ නායක සජිත් ප්‍රේමදාස මහතාද රනිල් වික්‍රමසිංහ මහතාගේ සුවදුක් විමසීමට බන්ධනාගාරයට මෙන්ම කොළඹ ජාතික රෝහලටද ගියේය.
මේ අතර වික්‍රමසිංහ මහතා ඇප මත නිදහස් කරගැනීම වෙනුවෙන් විපක්ෂ නායක ලෙස සජිත් ප්‍රේමදාස මහතා විපක්ෂ කණ්ඩායම වෙත නායකත්වය දෙන ආකාරයද දක්නට ලැබුණි.
එම ඒකරාශී වීමත් සමඟ පොදු විපක්ෂයක් ලෙස කටයුතු කිරීම් වෙනුවෙන් අවධානය යොමුව ඇති අතර එක්සත් ජාතික පක්ෂයේ සමුළුව හරහා ඊට ශක්තිමත් පදනමක් සකස් කර ගැනීමට සූදානම් එන බවද වාර්තා වෙයි.
එහිදී විපක්ෂයේ සියලුම් කණ්ඩායම්වලට සහභාගී වීමට හැකිවන පරිදි සිරිකොත පක්ෂ මූලස්ථානයේදී පක්ෂ සම්මේලනය නොපවත්වා පොදු තැනක පැවැත්වීමටද අවධානය යොමුව ඇත.
අද (31) දින ඊට අදාළව සාකච්ජාවක් පවත්වා ඇති අතර එළඹෙන 03 වැනිදා පැවැත්වෙන එජාප කෘත්‍යාධිකාරී මණ්ඩල රැස්වීමේදී පක්ෂ සම්මේලනය නව මුහුණුවරකින් පැවැත්වීමට අදාළව දීර්ඝව සාකච්ජා කිරීමට නියමිත බව වාර්තා විය.
