නිශ්මං රණසිංහ සැප්තැම්බර් 05, කොළඹ LNW:
යාපනය හාර්ට්ලි විද්‍යාලය නියෝජනය කරන දකුණත් පා දඟ පන්දු යවන්නා විග්නේෂ්වරන් ආකාශ් ශ්‍රී ලංකා අවුරුදු 19 න් පහළ කණ්ඩායම වෙනුවෙන් යළිත් කඩුලු අතරට එමින් බටහිර ඉන්දීය කොදෙව් අවුරුදු 19 න් පහළ කණ්ඩායමට එරෙහිව කඩුලු 8 ක ජයක් ලැබීම සඳහා මාවත සකසා දුන්නා.වමත් දඟ පන්දු යවන චාමික හීනටිගල ලකුණු 33 ට කඩුුලු 4 ක් දවා ගනිද්දී ආකාශ් පන්දු ඕවර් 8.2 ක් තුළ ලකුණු 19 ක් පමණක් ලබා දෙමින් කඩුලු 4 ක් දවා ගනිමින් කොදෙව් ක්‍රීඩකයින් අසරණ කරනු ලැබුවා.
ආකාශ් ගේ සහ චාමිකගේ පන්දු යැවීම ඉදිරියේ අසරණ වූ කොදෙව් තරුණයින් ලකුණු 138 ට දැවී ගියා.බිඳ වැටෙන කොදෙව් පිතිකරු බලකොටුව රැකගන්න හුදෙකලාව සටන් කළ අංක 3 පිතිකරු එරාෂින්හෝ ෆොන්ටේන් ලකුණු 51 ක් ලබා ගනිමින් ආකාශ් සහ චාමිකගේ අනතුරෙන් කණ්ඩායම ඈත් කරන්නනට දැරූ උත්සාහය නිෂ්පල වුණා.මේ වන විට තරගාවලියේ වැඩිම කඩුලුලාභියා වෙමින් ආකාශ් කඩුලු 11 ක් ලබා ගන්නට සමත් වී සිටිනවා.ඒ සඳහා ඔහු පන්දුවාර 28.2 ක් යවා ඇති අතර ලබා දී ඇත්තේ ලකුණු 82 ක් පමණයි.
ශ්‍රී ලංකා කණ්ඩායමේ හඹා යාමේදී ලකුණු 49 ක් වෙද්දී කඩුලු 2 ක් අහිමි කරගෙන සිටියත්,ආරම්භක පිතිකරු විරාන් චමුදිතට එකතු වූ තරගාවලියේ ශතකලාභි පිතිකරුවා කවීජ ගමගේ තවත් කඩුල්ලක් අහිමි වීමට ඉඩ ලබා දුන්නේ නැහැ.ඔවුන් දෙදෙනාගේ නොබිඳි සබඳතාවය ලකුණු 90 ක් වෙද්දී ශ්‍රී ලංකා ලකුණු පූවරුව කඩුලු 2 ට ලකුණු 139 ක් බවට පත් වුණා.වමත් පිතිකරු විරාන් නොදැවී ලකුණු 64 ක් රැස් කළ අතර දකුණත් පිතිකරු කවීජගේ පිත්තෙන් ලැබුණු දායකත්වය නොදැවී ලකුණු 29 ක් බවට පත් වුණා.
තරග තුනක් නිමාවන විට ශ්‍රී ලංකාව තරගවෙලියේ 2-1 ක් ලෙස පෙරමුණේ පසුවන අතර කණ්ඩායම් දෙක සිව්වන තරගය සඳහා සැප්තැම්බර් 7 වන දා මුණගැසීමට නියමිතයි.
