ගත වූ පැය 12ක කාලයක් ඇතුළත දිවයිනේ ප්‍රදේශ කිහිපයකින් වෙඩිතැබීමේ සිද්ධි 04ක් වාර්තා වී තිබේ.
ඊයේ (05) මධ්‍යම රාත්‍රිය ආසන්නයේ කොළඹ ග්‍රෑන්ඩ්පාස් ප්‍රදේශයේ මහවත්ත ඔරලෝසු කණුව අසලදී යතුරුපැදියකින් පැමිණි නාඳුනන පුද්ගලයින් දෙදෙනෙකු විසින් වෙඩිතැබීමක් සිදුකර පළාගොස් තිබුණු අතර එහිදී වෙඩිවැදුණු පුද්ගලයා කොළඹ ජාතික රෝහලට ඇතුළත් කිරීමෙන් අනතුරුව මියගොස් තිබිණි. මෙසේ මියගොස් තිබුණේ කැළණිය ප්‍රදේශයේ පදිංචි 26 හැවිරිදි තරුණයෙකි.
අද (06) අලුයම 01.40 ට පමණ මරදාන ප්‍රදේශයේ පංචිකාවත්ත මාර්ගයේ පිහිටි පෞද්ගලික බැංකුවක් ඉදිරිපිට අද (6) අලුයම 1.40ට පමණ තවත් වෙඩිතැබීමක් සිදුව තිබූ අතර එහිදී තුවාල ලැබූ පුද්ගලයෙකු කොළඹ ජාතික රෝහලේ දැඩි සත්කාර ඒකකයට ඇතුළත් කර සිටී.
මේ අතර අද (06) අලුයම 1.38ට පමණ යතුරුපැදියකින් පැමිණි පුද්ගලයින් දෙදෙනෙකු විසින් මීගමුව, කුට්ටුදූව ප්‍රදේශයේ නිවසකට වෙඩිතබා පලාගොස් ඇත. මෙම වෙඩිතැබීමෙන් කිසිවෙක්ට හෝ තුවාල සිදුව නොමැති බව සඳහන්.
එමෙන්ම පානදුර, අලුබෝමුල්ල සඳගලවත්ත ප්‍රදේශයේ වෙළෙඳසැලකට ද අද (06) පෙරවරුවේ වෙඩිතැබීමක් සිදුව තිබේ. නාදුනන පුද්ගලයන් දෙදෙනෙකු පැමිණ මිලිමීටර 9 වර්ගයේ පිස්තෝල ගිනිඅවියකින් මෙම වෙඩිතැබීම සිදුකර පළාගොස් ඇති අතර වෙඩිතැබීම සිදුවන අවස්ථාවේ කාන්තාවක් එහි සිට ඇති නමුත් ඇය වෙඩි ප්‍රහාරයෙන් බේරී පළාගොස් ඇත. වෙළඳසැලේ තිබූ ශීතකරණයකට වෙඩිවැදීමෙන් හානි සිදුව ඇත.
