මේ දිනවල මැතිවරණය, ජනාධිපති අපේක්ෂවරුන් සහ ඔවුන්ට සහාය දක්වන්නන් සම්බන්ධව සමාජ මාධ්‍ය ජාලා පුරා පැතිර යන අවිශ්වාසය, අසතුට හා විවේචන මධ්‍යයේ, අපගේ ජාතියේ ප්‍රගතිය දකින්නට අපි නිතර අසමත් වෙමු. නමුත් මේ සෑම අඳුරු වලාකුළක් පිටුපසම රන්වන් ඉරක් ඇත. ඒ අපගේ ප්‍රජාතන්ත්‍රවාදයේ ක්‍රමික පරිණතභාවයයි.
පසුගිය මැතිවරණ සමයන් සිහිපත් කරන්න. අපේ රූපවාහිනී තිර පුරා ජ්‍යොතිෂ්‍යවේදීන් හා හස්තරේඛා ශාස්ත්‍රඥයින් පෙනී සිටියේ කෙසේද? ඔවුන්ගේ අනාවැකි රටේ ඉරණම තීරණය කරන බලවේග ලෙස සැලකුණු ආකාරය මතකද? නමුත් අද, එවැනි දෑ දුර්ලභ වී තිබීම අපගේ සමාජයේ විචාරශීලී චින්තනයේ ජයග්‍රහණයක් නොවේද?
මීට වසර කිහිපයකට පෙර, ආගමික නායකයින්ගේ දේශපාලන මාධ්‍ය ප්‍රකාශකවරුන්ව සිටි ආකාරය මතක ද? දේශපාලනඥයින් ආගම තම වාසියට යොදා ගැනීමට අවශ්‍ය ඕනෑම ආකාරයේ මැතිවරණ ව්‍යාපාරයක් කිරීමට සූදානම්ව සිටි බව ඔබට මතක ද? නමුත් මෙවර මැතිවරණයේදී එවැනි සිදුවීම් අඩු වී තිබීම ඔබත් නිරීක්ෂණය කළාද? මෙය අපගේ සමාජය ආගම හා රාජ්‍ය පාලනය අතර ඇති සීමාව වටහා ගැනීමේ සාක්ෂියක් නොවේද?
සමාජ මාධ්‍ය තුළ තවමත් අසමතුලිත බලයක් ක්‍රියාත්මක වන බව අපි දනිමු. නමුත් ඔබේ හැසිරීම දෙස බලන්න. ඔබ දැන් වැඩි වශයෙන් ප්‍රශ්න කරයි, විවේචනය කරයි, සංවාදයට එක්වෙයි. ඒ හේතුව මත එක් අපේක්ෂකයෙකු හෝ එක් දේශපාලන පක්ෂයක් සමාජ මාධ්‍ය තුල අසීමාන්තික ආධිපත්‍යය බලයක් පාලනය වී තුලනය වී ඇති බව ඔබ නිරීක්ෂණය කලාද? ඒ මෙය ඩිජිටල් යුගයේ සක්‍රීය පුරවැසිභාවයේ උදාවක් නොවේද?
කලින් මැතිවරණවලදී, කොපමණ දෙනෙක් නම් පක්ෂ ප්‍රකාශන පත්‍ර කියවූවාද? ආර්ථික ප්‍රතිපත්ති ගැන සොයා බැලුවාද? නමුත් අද, සෑම තැනකම මේවා ගැන සාකච්ඡා කෙරෙනු ඔබට ඇසෙනවා නොවේද? මේ වෙනස අපගේ දේශපාලන සංස්කෘතියේ ගැඹුරු වෙනසක් පෙන්නුම් නොකරයිද?
පෙර පැවති රූපවාහිනී විවාද මතකයට නගන්න. ඒවා බොහෝ විට පුද්ගලික ප්‍රහාර හා හිස් පොරොන්දුවලින් පිරී තිබුණි. නමුත් මෙවර, අප දුටුවේ වඩාත් සංයත, දැනුමෙන් පිරි සංවාද නොවේද? අඩුම තරමේ එසේ සංයතව හැසිරෙන ආකාරය පෙන්වා සිටීමට සියලු දේශපාලන පක්ෂයන්ට සිදු වී ඇති බව ඔබ දුටුවාද? එමෙන්ම රෑපවාහිනී සංවාද වැඩසටහන්වල ඉල්ලීම දේශපාලනය සහ ආර්ථිකය පිළිබදව යම් ගැඹුරකින් කතා කල හැකි දේශපාලඥයන් ට බව ඔබ දුටුවාද? මේ වෙනස අපගේ දේශපාලන සංවාදයේ ගුණාත්මක වර්ධනයක් නොපෙන්වයිද?
ඔබට සෑහීමකට පත්විය හැකි අපේක්ෂකයෙකු නොපෙනෙන්නට පුළුවන. නමුත් ඔබේ මේ අසතුට පවා අපගේ ප්‍රජාතන්ත්‍රවාදයේ ඉදිරි පියවරක්. ඔබ දැන් හුදෙක් පක්ෂයකට හෝ පුද්ගලයෙකුට නොව, ප්‍රතිපත්තිවලට හා දර්ශනයන්ට වටිනාකමක් දෙයි.
මතක තබා ගන්න, මේ සියලු වෙනස්කම් සිදු වූයේ අප නිසාය. අපගේ ඉල්ලීම් නිසාය. අපගේ විමසිලිමත්භාවය නිසාය. අපගේ ක්‍රියාකාරී සහභාගීත්වය නිසාය. මේ ජයග්‍රහණ වෙනුවෙන් ප්‍රධාන අපේක්ෂකයින්ටද ස්තූති කළ යුතුය. ඔවුන්ගේ හැසිරීම ද මෙම නව දේශපාලන සංස්කෘතියට දායක වී ඇත.
එබැවින්, අඳුර දෙස බලන අතරම මේ ආලෝකය දෙස ද බලන්න. අපගේ ප්‍රජාතන්ත්‍රවාදය කුඩා කුඩා පියවරෙන් ඉදිරියට යයි. එය ආපසු හැරී නොබලන ගමනකි. අපට අප ගැනම ආඩම්බර විය හැකි ගමනකි. අපගේ අනාගතය තීරණය කරන්නේ දේශපාලඥයන් නොව අප විසින්මය. අපගේ හැසිරීමෙන්, අපගේ තේරීම්වලින්, අපගේ නිරන්තර සම්බන්ධවීමෙන් අපගේ අනාගතය තීරණය වේ.මේ මැතිවරණය අවසන් වූ පසුවත්, අපගේ පුරවැසි වගකීම් ඉටු කරමින්, වඩා යහපත් ශ්‍රී ලංකාවක් වෙනුවෙන් අඛණ්ඩව කැප වෙමු.
නීතීඥ නාමිණී පණ්ඩිත.
