රෂිකා හෙන්නායක සැප්තැම්බර් 19, කොළඹ LNW :
ආණ්ඩුක්‍රම ව්‍යවස්ථාවේ 22 වන සංශෝධනය පිළිබඳ ශ්‍රේෂ්ඨාධිකරණයේ රහස්‍ය නිර්ණය, සැප්තැම්බර් 22 වන දින කථානායකවරයා විසින් පාර්ලිමේන්තුවට ඉදිරිපත් කිරීමට නියමිතය.
කථානායකවරයාට එම රහස්‍ය නිර්ණය සඳුදා (සැප්තැම්බර් 21) ලැබෙනු ඇතැයි අපේක්ෂා කෙරේ.
මේ අතර, ඉදිරි සතියේ පාර්ලිමේන්තු කටයුතු පිළිබඳව සාකච්ඡා කිරීම සඳහා පක්ෂ නායකයින්ගේ රැස්වීමක් සඳුදා පෙරවරු 9:00 ට පැවැත්වීමට නියමිතව ඇත.
මෙම රැස්වීම කථානායකවරයාගේ ප්‍රධානත්වයෙන් පැවැත්වේ.
ආණ්ඩුක්‍රම ව්‍යවස්ථාවේ 22 වන සංශෝධනය සහ අධිකරණ පනත සංශෝධනය කිරීමේ පනත් කෙටුම්පත 24 සහ 25 යන දිනවල විවාදයට ගැනීමට නියමිත බව පාලක පක්ෂය මීට පෙර ප්‍රකාශ කර තිබුණි.
අදාළ පනත් කෙටුම්පත්වලට එරෙහිව ඉදිරිපත් වූ පෙත්සම් විභාග කිරීමෙන් අනතුරුව, ශ්‍රේෂ්ඨාධිකරණයේ පංච පුද්ගල විනිසුරු මඩුල්ලක් විසින් සැප්තැම්බර් 2 වන දින නිවේදනය කළේ එම රහස්‍ය නිර්ණය කථානායකවරයා වෙත යොමු කරන බවයි.
