රෂිකා හෙන්නායක සැප්තැම්බර් 30, කොළඹ LNW :
හිටපු ජනාධිපති රනිල් වික්‍රමසිංහ සහ හිටපු ජනාධිපති ලේකම් සමන් ඒකනායක යන මහත්වරුන්ට එරෙහිව ගොනු කර ඇති නඩුව නොවැම්බර් 11 වන දින නැවත කැඳවීමට කොළඹ කොටුව මහෙස්ත්‍රාත් අධිකරණය අද (30) නියෝග කළේය.
එදිනට නීතිපතිවරයාගේ උපදෙස් අධිකරණයට ඉදිරිපත් කිරීමට නියමිතව ඇත.
එංගලන්ත සංචාරයක් සඳහා රුපියල් මිලියන 16.6ක මහජන මුදලක් අවභාවිත කළ බවට එල්ල වී ඇති චෝදනා සම්බන්ධයෙන් මෙම නඩුව ගොනු කර තිබේ.
මෙම නඩුව අද (30) කොළඹ කොටුව මහෙස්ත්‍රාත් පාසන් අමරසේන මහතා ඉදිරියේ කැඳවන ලදී.
නීතිපතිවරයා වෙනුවෙන් පෙනී සිටි ජ්‍යෙෂ්ඨ රජයේ නීතිඥ සමාධාරි පියසේන මහත්මිය අධිකරණයට දැනුම් දුන්නේ, විමර්ශන කටයුතු අවසන් කර අදාළ ලිපිගොනු නීතිපතිවරයා වෙත යොමු කර ඇති බවයි.
නීතිපතිවරයාගේ ස්ථාවරය අධිකරණයට දැනුම් දීම සඳහා දිනයක් වෙන් කරන ලෙස ඇය ඉල්ලා සිටියාය.
ඉදිරිපත් වූ කරුණු සලකා බැලීමෙන් අනතුරුව, කොළඹ කොටුව මහෙස්ත්‍රාත්වරයා නඩුව නොවැම්බර් 11 වන දින නැවත කැඳවීමට නියෝග කළ අතර, එදිනට නීතිපතිවරයාගේ ස්ථාවරය අධිකරණයට දැනුම් දෙන ලෙස රජයේ නීතිඥවරියට උපදෙස් දුන්නේය.
