අශෝක ජයතුංග
ඔක්තෝබර් 02 වොෂින්ටන් LNW :
පසුගියදා ඇමෙරිකාවේ කොලොබ්බියා විශ්ව විද්‍යාලයේ පැවැති 5 වන “කොපර්නිකස් ඔලිම්පියාඩ් ලෝක තරගාවලියේ” ගණිත අංශයේ පළමු කාණ්ඩයේ රන් පදක්කම ජයග්‍රහණය කිරීමට ඩියානා ලියෝනි පෙරේරා ලාංකික සිසුවිය සමත් වූවාය.
තවමත් දස හැවිරිදි ඇය කොළඔ විශාඛා විද්‍යාලයේ ශිෂ්‍යාවකි. දෙමව්පියන් සමග වොෂින්ටන් DC තානාපති කාර්යාලයට පැමිණි ඇයට තානාපති මහින්ද සමරසිංහ මහතා ඇතුළු නිළධාරීන් උණුසුම් සුබ පැතුම් එක් කළහ.
“ලාංකීය දරුවෙකු ලෙස ඔබ ලැබූ ජය රටම ලැබූ ජයක්. එම විශිෂ්ඨත්වයට සුබ පතනවා. එම අභිමානය ලබාගැනීමට ඔබකල කැපවීම අගයනවා.ඔබ සෙසු ලාංකික දරුවන්ටත් ආදර්ශයක්. අනාගයේදීත් මෙවැනි ජයග්‍රහණ ලබා ගැනීමට සුබ පතනවා” තානාපති සමරසිංහ මහතා පැවසීය.
පෙරේරා ශිෂ්‍යාව ග්‍රන්ථ කතුවරියක් හා අධ්‍යාපනික වීඩියෝ නිර්මාණය කරන බව ද එහිදී එළිවිය. ඇයගේම සමාගමක් හරහා ඒවා අලෙවි කරන අතර ක්‍රීඩාව හා වයලීන් වාදනයට ඇති ඇයගේ හැකියාවද එළිවිය.
කොපර්නිකස් ඔලිම්පියාඩ් යනු 03 සිට 12 දක්වා සිසු සිසුවියන්ට ගනිතය , විද්‍යාව, භෞතික විද්‍යාව ඇතුළු විෂයන් රැසකදී තම හැකියාව පෙන්වීමට ලැබෙන ජාත්‍යන්තර තරගාවලියකි. මෙවර රටවල් 52 ක තරගකරුවන් 92,400 ක් තරග වැදුන අතර ඉන් රටවල් 30 ක 936 ක් අවසන් තරගයට එක්වූ අතර ඩියානා ජයගත්තේ එහි ගනිත අංශය ය.
ඇයගේ දෙමව්පියන් වන ප්‍රසන්න හා ඉන්දිකා පෙරේරා යුවල හා තානාපති නිළධාරීන් ද මෙම අවස්ථාවට එක්වූහ.
