සටහන: සශිකලා මධුෂාණී
ලෝකය(අවුට්බවුන්ඩ් ටුඩේ) ඔක්තෝම්බර් මස 06: යේමනයේ හූති සංවිධානයෙන් එල්ල වන ප්‍රහාර හමුවේ සෞදි අරාබියේ ආරක්ෂාව ශක්තිමත් කිරීම සඳහා තුර්කිය සහ පාකිස්තානය සමඟ ඒකාබද්ධ ආරක්ෂක පියවර ක්‍රියාත්මක කිරීමට සෞදි අරාබිය එකඟ වී තිබේ.
සෞදි අරාබිය, තුර්කිය සහ පාකිස්තානය අතර ඇති කරගත් මක්කා ආරක්ෂක ගිවිසුම යටතේ, සාමාජික රටකට එල්ල වන ප්‍රහාරයකදී සාමූහික වැළැක්වීමේ පියවර ක්‍රියාත්මක කිරීමට රටවල් තුන එකඟ වී ඇති බව වාර්තා වේ. ඒ අනුව සෞදි අරාබියට අවශ්‍ය ආරක්ෂක සහ හමුදා සහාය ලබාදීම සම්බන්ධයෙන්ද අවධානය යොමු වී තිබේ.
මෙම තත්ත්වය අතරතුර, යේමනයේ ජාත්‍යන්තරව පිළිගත් රජයට සහාය දක්වන හමුදා, බාබ් අල්-මන්දෙබ් සමුද්‍ර සන්ධියට ආසන්න ධුබාබ් (Dhubab) දිස්ත්‍රික්කයේ විශාල ප්‍රදේශයක පාලනය අත්පත් කරගෙන ඇති බව හමුදා සහ රජයේ ආරංචි මාර්ග සඳහන් කරයි.
සෞදි අරාබියේ සහාය ලබන යේමන රජයේ හමුදා විසින් හූති සටන්කාමීන්ට එරෙහිව දියත් කළ නව හමුදා මෙහෙයුමකදී මෙම ප්‍රදේශ අත්පත් කරගෙන ඇති අතර, එම මෙහෙයුමට සෞදි නායකත්වයෙන් යුත් ගුවන් ප්‍රහාර සහායද ලැබුණු බව වාර්තා වේ.
හමුදා ආරංචි මාර්ග අනුව, රජයේ හමුදා ධුබාබ් දිස්ත්‍රික්කයේ උපායමාර්ගික ස්ථාන කිහිපයක් අත්පත් කරගෙන ඇති අතර, බාබ් අල්-මන්දෙබ් වෙත යන සැපයුම් මාර්ග සහ ප්‍රධාන මාර්ග කිහිපයක් කපා දැමීමටද සමත් වී තිබේ.
බාබ් අල්-මන්දෙබ් සමුද්‍ර සන්ධිය රතු මුහුද සහ ඒඩන් බොක්ක සම්බන්ධ කරන ප්‍රධාන ජාත්‍යන්තර නාවික මාර්ගයක් බැවින්, එම ප්‍රදේශයේ පාලනය සඳහා සිදුවන ගැටුම් ජාත්‍යන්තර නාවික හා වෙළෙඳ ප්‍රවාහනයටද බලපෑම් කළ හැකි බව විශ්ලේෂකයෝ පෙන්වා දෙති.
මෙම සිදුවීම් මාලාවත් සමඟ සෞදි අරාබිය, තුර්කිය සහ පාකිස්තානය අතර නව ආරක්ෂක එකඟතාව සහ යේමනයේ හූතිවරුන්ට එරෙහිව සිදුවන හමුදා මෙහෙයුම්, කලාපීය ආරක්ෂක තත්ත්වය කෙරෙහි වැඩි අවධානයක් යොමු කර ඇති කරුණු බවට පත්ව තිබේ.
