කොටවිල පොලිස් ස්ථානයේ පාලන අංශයේ ස්ථානාධිපති, ප්‍රධාන පොලිස් පරීක්ෂක වරුණි බෝගහවත්ත මහත්මිය ලබන සිකුරාදා (06) දක්වා රක්ෂිත බන්ධනාගාරගත කිරීමට මාතර මහේස්ත්‍රාත් අධිකරණය විසින් නියම කර තිබේ.
ඒ, අපරාධ පරීක්ෂණ දෙපාර්තමේන්තුව විසින් අත් අඩංගුවට ගත් ඇයව ඊයේ (03) පස්වරුවේ මාතර මහේස්ත්‍රාත්වරයා හමුවට ඉදිරිපත් කිරීමෙන් අනතුරුව ය.
ඇයව අත් අඩංගුවට ගෙන තිබුණේ නවීන මෝටර් රථයක් මිලදී ගැනීමට සහ එහි කල්බදු වාරික ගෙවීමට මුදල් ලැබුණු ආකාරය තහවුරු කිරීමට නොහැකි වීම හේතුවෙනි.
මාතර සමූපකාර සංගමයේ රුපියල් කෝටි 1,000කට අධික මුදලක් වංචා කළ පුද්ගලයෙකු විසින් අදාළ මෝටර් රථය මිලදීගැනීම සඳහා සහ ලීසිං වාරික ගෙවීම සඳහා මුදල් ලබාදී ඇති බවට චෝදනා එල්ල වී තිබුණු අතර හොන්ඩා වෙසෙල් වර්ගයේ එම මෝටර් රථය ද මීට සති දෙකකට පමණ පෙර අපරාධ පරීක්ෂණ දෙපාර්තමේන්තුව භාරයට ගෙන තිබිණි.
