සටහන: සශිකලා මධුෂාණී
ලෝකය(අවුට්බවුන්ඩ් ටුඩේ) නොවැම්බර් 10: ඇමෙරිකානු ජනාධිපති ඩොනල්ඩ් ට්‍රම්ප් පවසන්නේ ලොව ප්‍රමුඛතම චිප් නිෂ්පාදන සමාගමක් වන එන්වීඩියා (NVIDIA) හි ප්‍රධාන විධායක නිලධාරී ජෙන්සන් හුවාං සම්බන්ධයෙන් FBI පරීක්ෂණයක් සිදුකරන බවයි.
චීන ඔත්තු සේවයට තොරතුරු ලබාදුන් බවට සැක කෙරෙන චීන ව්‍යාපාරික කාන්තාවක සමඟ හුවාං අනියම් සබඳතාවක් පවත්වා ඇති බවට මාධ්‍ය වාර්තා පළවීමත් සමඟ මෙම පරීක්ෂණය පිළිබඳ අවධානය යොමුව තිබේ.
ට්‍රම්ප් සඳහන් කර ඇත්තේ තමන් මේ සම්බන්ධයෙන් හුවාං සමඟ දුරකථනයෙන් කතා කළ බවත්, අදාළ කාන්තාව ඔත්තුකාරියක බව තමන් නොදැන සිටි බව හුවාං පැවසූ බවත්ය. එම ප්‍රකාශය තමන් විශ්වාස කරන බව ද ට්‍රම්ප් පවසා තිබේ.
මේ අතර, එන්වීඩියා සමාගමේ අධ්‍යක්ෂ මණ්ඩලය ද මෙම සිදුවීම සම්බන්ධයෙන් ස්වාධීන අභ්‍යන්තර පරීක්ෂණයක් ආරම්භ කර ඇති අතර සමාගමේ රහස්‍ය තොරතුරු හෝ ඇමෙරිකානු ජාතික ආරක්ෂාවට අදාළ තොරතුරු හෙළිවී ඇති බවට මේ දක්වා සාක්ෂි නොමැති බව සමාගම සඳහන් කර තිබේ.
කෙසේ වෙතත්, චීනය මෙම ඔත්තු බැලීමේ චෝදනා ප්‍රතික්ෂේප කරමින් ඒවා පදනම් විරහිත බව ප්‍රකාශ කර ඇති අතර මෙම සිදුවීම ලෝකයේ ප්‍රමුඛතම කෘත්‍රිම බුද්ධි චිප් නිෂ්පාදකයා වන එන්වීඩියා සමාගමේ අනාගතය මෙන්ම ඇමෙරිකානු ජාතික ආරක්ෂාව පිළිබඳව ද ප්‍රශ්න මතු කර තිබේ.
