සටහන – රුවන් නෙළුගොල්ල
කටුනායක බණ්ඩාරනායක ජාත්‍යන්තර ගුවන් තොටුපොලේදී රඳවාගත් ඩ්‍රෝන යානා 39 සහ මයික්‍රෆෝන් 16 සම්බන්ධයෙන් කරුණු පැහැදිලිකිරීමක් සමගි ජන බලවේගයේ පාර්ලිමේන්තු මන්ත්‍රී නලින් බණ්ඩාර මහතා විසින් සිදුකර තිබේ.
එම ඩ්‍රෝන යානා සහ මයික්‍රෆෝන සිංගප්පූරුවේ සිට රැගෙන ආවේ පවුලේ ව්‍යාපාරයක් සඳහා බව පැවසූ මන්ත්‍රීවරයා ඒ සඳහා විදුලි සංදේශ නියාමන කොමිසමේ (TRC) සහ සිවිල් ගුවන් සේවා අධිකාරියේ (CAA) අනුමැතිය ලබාගෙන තිබුණු නමුත් ආරක්ෂක අමාත්යාංශයේ (MoD) නිසි අනුමැතියක් ලබාගෙන නොතිබීමෙන් ගැටලුවක් මතුවුණු බවයි සඳහන් කළේ.
එමෙන්ම තමන් මෙම භාණ්ඩ නිෂ්කාශනය නොකර රැගෙන ආ බවට හෝ හොරබඩු රැගෙන ආ බවට පැතිර යන ප්‍රචාර සාවද්‍ය බවත් මන්ත්‍රීවරයා වැඩිදුරටත් සඳහන් කළේය.
“අපේ පවුලේ ව්‍යාපාරයක් තියෙනවා පුතා සහ බිරිඳ අධ්‍යක්ෂක ධූරය දරණ, කැමරා ඩ්‍රෝන් මේවා රෙන්ට් කිරීම විකිණිම හා සම්බන්ධව. මේ ව්‍යාපාරය පුතා විසින්ම ආරම්භ කරන ලද ව්‍යාපාරයක්. ඉතින් මේකට ඩ්‍රෝන් සහ මයික්‍රොෆෝන් වගයක් අරන් ආවා, එනකොට කටුනායක ගුවන්තොටුපොළ හරහා. ඒකට අවශ්‍ය TRC අනුමැතිය පුතාගේ සමාගම සතුව තියෙනවා. ඒ වගේම CIVIL AVIATION OF SRI LANDA අනුමැතියත් තියෙනවා. මෙතන එකම ප්‍රශ්නය වුණේ MoD එකේ නිසි අනුමැතියක් තිබුණේ නැහැ”
“මෙහිදී වැරදි මතයක් තියෙනවා අපි නිෂ්කාශනය නොකර ආවා වගේ මතයක් තියෙනවා. හොරබඩු ගෙනාවා වගේ කතාවක්. නිෂ්කාශනය කරපුවාම තමයි මේ නෝටීස් එක දෙන්නේ. නිෂ්කාශනය නොකර අපි මොනවා හරි භාණ්ඩයක් ගෙනාවනම් ඒ ගොල්ලෝ කෙලින්ම ඒවා රඳවා තබා ගන්නවා”
නලින් බණ්ඩාර මන්ත්‍රීවරයා මේ බව පැවසුවේ ඊයේ (09) පැවති මාධ්‍ය හමුවක් අමතමිනි.
