පක්ෂ දේශපාලනය තුළ සිර නොවී ස්වාධීනව සිටිමින් රට වෙනුවෙන් නව දේශපාලන ක්රමයක් ඇතිකිරීම උදෙසා උරදී කටයුතු කරන බව හිටපු අමාත්ය අර්ජුන රණතුංග මහතා පවසයි.
ඒ මහතා මේ බව පැවසුවේ එක්සත් ජාතික පක්ෂයේ සාමාජිකත්වයෙන් ඉවත් වීමෙන් අනතුරුව ඊයේ (30) මල්වතු – අස්ගිරු මහනායක හිමිවරුන් බැහැදැක ආශිර්වාද ලබාගැනීමට ගිය අවස්ථාවේදීය.
වෙනම පක්ෂයක් ගොඩනැඟීමට හෝ පවතින පක්ෂයකට එකතු වීමට අදහසක් තමන්ට නොමැති බව පැවසූ ඒ මහතා වර්තමානයෙහි රටේ පවතින දේශපාලනයෙන් රටට වැඩක් වී නොමැති හෙයින් රටට වැඩදායක දේශපාලන ක්රමයක් නිර්මාණය කිරීම සඳහා මේ වනවිටත් තමන් පුද්ගලයින් සහ කණ්ඩායම් කිහිපයක් සමඟ සාකච්ඡා කරමින් සිටින බවත් සඳහන් කළේය.
