සටහන – රෂිකා හෙන්නායක
මාර්තු 07 , කොළඹ (LNW): වසර 63කට පසු ෂෙල් සමාගම යළි මෙරට බලශක්ති ක්ෂේත්‍රයට එක්වන බව පැවසේ.
මෙරට කටයුතු කළ ෂෙල් ඉන්ධන සමාගම 1961 දී රජයට පවරා ගත් අතර , පසුව එම සමාගම ඔවුන්ගේ ආසියාවේ මෙහෙයුම් කටයුතු ශ්‍රී ලංකාවෙන් ඉවත් කර සිංගප්පුරුවේ ආරම්භ කළේය.
අද වන විට එය සිංගප්පුරුවේ දැවැන්ත සමාගමක් බවට පත්ව තිබෙන අතර, ඒ අනුව සිංගප්පුරුවට බලශක්ති ක්ෂේත්‍රයේ බලවතෙකු බවට පත්වීමට හැකිවිය.
කෙසේ වුවද ෂෙල් සමාගමේ ප්‍රථම ඉන්ධන නෞකාව යළි ලබන 19 වනදා කොළඹ වරායට ඇතුලු වීමට නියමිතයි.
රජයේ බලශක්ති හා ආර්ථික ප්‍රතිසංස්කරණ වැඩපිළිවෙල යටතේ මෙම සමාගමට ඉන්ධන ආනයනය ගබඩා කිරීම හා බෙදා හැරීම සඳ හා අවසර ලබාදී තිබෙන අතර , ඒ වෙනුවෙන් රජය ඉන්ධන පිරවුම්හල 150ක් වෙන්කර ඇති බවයි වාර්තා වන්නේ. නව පිරවුම්හල ආරම්භ කිරීමට බලපත්‍ර 50ක් ද වෙන්කර ඇති බව වාර්තා වේ.
