සටහන – රුවන් නෙළුගොල්ල
තම පක්ෂයේ නායක සහෝදර සහෝදරියන් කියන කතා ප්‍රතිවාදීන් විසින් විකෘති කරමින් සිටින බව ජාතික ජන බලවේගයේ පාර්ලිමේන්තු මන්ත්‍රීනී හරිනි අමරසූරිය මහත්මිය පවසයි.
ප්‍රශ්නය – දැන් ඔබතුමියලාගෙ පක්ෂයේ නායකයො කියන දේවල්වලින් ඡන්ද කැඩෙනවා නේද ? බුදුන් වහන්සේ ධර්ම සංගායනාවට ආවා කියනවා, ගමේ අයට නඩු අහන්න දෙනවා කියනවා, මේ තත්වය පාලනය කරන්න වැඩපිළිවෙලක් නැද්ද ?
“මෙහෙමයි, අපේ සහෝදර සහෝදරියන් කියන කතා විකෘති කරන්නේ අපේ ප්‍රතිවාදීන්. ඔය වගේ දේවල් ඇත්තටම කියලා තියෙනවාද නැද්ද කියන එකත් හරියට හොයලා බලනවා නම් හොඳයි කියලා මම යෝජනා කරනවා. එහෙම දේවල් එහෙම කියලා නෑ. අපි හැමතිස්සෙම කතා කරලා තියෙන්නේ මේ රටේ සියලුම ආගම්වලට ගෞරවයක් දෙන විදියට දේශපාලනය කළ යුතුයි කියලා”
ප්‍රශ්නය – දැන් ඔබතුමියලා බුදු දහමෙන් ඈත්වෙලා, බුදු දහමට ලැදියාවක් නෑ කියලා සමාජයේ මතයක් තියෙනවා ?
“මම හිතන්නෙ සුදු ඇඳගෙන පිරිත් නූල් බැඳගෙන මේ රටේ බුද්ධාගම වෙනුවෙන් පෙනී හිටපු අය විශාල හානියක් මේ වෙනකොටත් බුද්ධාගමට කරලා තියෙනවා. අපි අපේ ආගම දේශපාලනයට පාවිච්චි කරන්නෙත් නෑ, කැමරාවක් ඉස්සරහා රඟපාන්න අපි ඒක පාවිච්චි කරන්නෙත් නෑ. ඒක අපේ ප්‍රතිපත්ති තුළ, අපේ දේශපාලන භාවිතාව තුළ, පුද්ගලිකව අපි හැසිරෙන විදිහ තුළ තමයි ඒක මනින්න වෙන්නෙ. අඩුම තරමේ හැම ආගමකම තියෙන මූලික මූලධර්ම ටික – හොරකම් කරන්න එපා කියන එක අපි බලමු. ඔය සුදු ඇඳගෙන පිරිත් නූල් බැඳගෙන ඉන්න අය අඩුම ගාණෙ ඒකවත් රකිනවාද ? නෑනෙ. ඉතින් බුද්ධාගම ගැන කතා කරන්න මොකක්ද ඒගොල්ලොන්ට තියෙන අයිතිය ?”
හරිනි අමරසූරිය මහත්මිය මේ බව පැවසුවේ ඊයේ (22) ගම්පහ ප්‍රදේශයේ පැවති ප්‍රචාරණ වැඩසටහනකින් අනතුරුව මාධ්‍ය වෙත අදහස් දක්වමිනි.
