පේරාදෙණිය ශික්ෂණ රෝහලේ සියලු සැත්කම් සුපුරුදු පරිදි සිදුවන බව එම රෝහලේ අධ්‍යක්ෂ වෛද්‍ය අර්ජුන තිලකරත්න මහතා පවසයි.
ශල්‍යකර්ම සඳහා අවශ්‍ය සියලු ඖෂධ කඩිනමින් සපයන බවට සෞඛ්‍ය අමාත්‍යංශය දැනුම් දී ඇති බවත්, ඒ අනුව රෝහලේ පවතින ඖෂධ ප්‍රමාණයන් යොදාගනිමින් ශල්‍යකර්මයන් ආරම්භ කළ බවත් ඒ මහතා සඳහන් කළේය.
මීට දින දෙකකට ඉහත ලිපියක් නිකුත් කරමින් පේරාදෙණිය ශික්ෂණ රෝහලේ අධ්‍යක්ෂකවරයා පවසා සිටියේ නිර්වින්දනය සඳහා ලබා දෙන ඖෂධ ඇතුළු ඖෂධ කිහිපයක පවතින හිඟය හේතුවෙන් හදිසි ශල්‍යකර්ම සහ අත්‍යාවශ්‍ය සැත්කම් හැරුණු විට අනෙක් සියලු ශල්‍යකර්මයන් තාවකාලිකව නතර කළ බවයි.
මෙම පුවත මහත් ආන්දෝලනයක් ඇතිකළ අතර, සැත්කම් වලට භාජනය වීම සඳහා සූදානමින් සිටි පුද්ගලයන් බරපතල අපහසුතාවයකට පත්විය.
පේරාදෙණිය ශික්ෂණ රෝහලේ සාමාන්‍ය ශල්‍යකර්මයන් අත්හිටවූ බවට පළවූ පුවත සම්බන්ධයෙන් ඉන්දියානු විදේශ කටයුතු අමාත්‍යවරයා ද ප්‍රතිචාර දක්වා තිබූ අතර, මෙම ගැටළුව විසඳීමට ඉන්දියාවට මැදිහත් විය හැක්කේ කෙසේද යන්න පවා ඔහු ප්‍රශ්න කර සිටියේය.
සාමාන්‍ය සැත්කම් යළි යථා තත්ත්වයට පත්කිරීමට අවශ්‍ය ඖෂධ සහ ද්‍රව්‍ය වහාම සැපයීමට සෞඛ්‍ය අමාත්‍යංශය කටයුතු යොදා ඇත්තේ ඉන් අනතුරුවයි.
MIAP
