කොළඹ LNW:එළඹෙන ජනාධිපතිවරණ ජන්ද විමසීම සම්බන්ධයෙන් පාර්ලිමේන්තු මන්ත්‍රීවරයාගේ ඔලුව දෙස බලා හෝ පළාත සභා මහ ඇමති, ඇමති, මන්ත්‍රීවරු දෙස බලා හෝ ප්‍රාදේශීය සභා සභාපති, උපසභාපති, මන්ත්‍රී දෙස බලා හෝ තීරණය කළ නොහැකි බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී තිස්ස කුට්ටිආරච්චි මහතා පැවසුවේය.
එම කොට්ඨාස තුනම පහුගිය කාලය තුළ අක්‍රීය වී තිබුණු බවයි මන්ත්‍රීවරයා සඳහන් කළේ.
පහුගිය අරගලයෙන් පසු පාර්ලිමේන්තු මන්ත්‍රීවරු ගමට නොගිය බවත්,පළාත් සභාවේ මහ ඇමති,ඇමතිවරු සහ මන්ත්‍රීවරු නොමැති බවත් ප්‍රාදේශීය සභා සභාපති, උපසභාපති, මන්ත්‍රීවරු නොමැති බවත් ඒ සියල්ල නාමික බවත් කුට්ටිආරච්චි මහතා කියා සිටියේය.
එම නිසා භූමියේ තත්ත්වය එම ඔළුගෙඩිවලින් මැනගත නොහැකි බවයි ඔහු පැවසුවේ.
මේ අතර මහින්දානන්ද අලුත්ගමගේ ඇතුළු කණ්ඩායම පොහොට්ටුවෙන් ඉවත් වී අලුත් පක්ෂයක් සාදා ගැනීමද ඉතා සාධාරණ බව මන්ත්‍රීවරයා සඳහන් කළේය.
ජනාධිපතිවරණයෙන් පසු පැවැත්වෙන මහමැතිවරණයේදී ඔවුන්ටද ජන්දය ඉල්ලීමට තැනක් තිබිය යුතු හෙයින් එලෙස අලුත් පක්ෂයක් සාදා ගන්නේ නම් ඊට උදව් කළ හැකි බවත් කුට්ටිආරච්චි මන්ත්‍රීවරයා වැඩිදුරටත් ප්‍රකාශ කළේ.
ආශිකා බ්‍රාහ්මණ
