රෂිකා හෙන්නායක ඔක්තෝබර් 30, කොළඹ (LNW):
දිවයින පුරා පිහිටි රෝහල්වලට අත්යාවශ්ය ඖෂධ 850 ක් අවශ්ය වුවත් මේ වනවිට ඖෂධ වර්ග 55ක හිඟයක් පවතින බව සෞඛ්ය අමාත්යංශයේ පැවති සාකඡාවකදී එහි නිලධාරින් පෙන්වා දී ඇති බව පැවසේ.
ඖෂධ හිඟයක් නිර්මාණය වීමට බලපා ඇත්තේ රාජ්ය ඖෂධ නීතිගත සංස්ථාව ලබාදී ඇති ටෙන්ඩර් නැවත කැඳවීම හේතුවෙන් සැපයුම්කරුවන්ට නිසිකලට ඖෂධ සැපයීමට නොහැකිවීම බව මෙහිදී හෙළිවී ඇති අතර, දේශීය ඖෂධ නිෂ්පාදකයන්ගෙන් ඖෂධ වර්ග 305ක් ලබා ගැනීම සඳහා ඇණවුම් භාරදීම ප්රමාද වීමද තවත් හේතුවක් බව සෞඛ්ය අමාත්යංශය පවසයි.
එම ඖෂධ ලබා ගැනීම සඳහා වු ප්රසම්පාදන කමිටු රැස්වීමද පැවැත්වුවද අවසන් තීරණයක් ගෙන නොමැති බව සඳහන් වේ. මේ හේතුන් මත ලබන වසරේ පළමු මාස හය තුළ ඖෂධ හිඟයක් ඇතිවිය හැකි බැවින් එය මඟ හරවා ගැනීමට කටයුතු කරන මෙන් සෞඛ්ය ලේකම්වරයා නිලධාරින්ට උපදෙස් ලබාදී ඇති බව පැවසේ.
මෙහිදී අනාවරණ වී ඇත්තේ, අක්ෂිකාච, සෝඩියම් බයි කාබනේට්, පෙනහළු ආබාධ, රෝගින්ට ලබාදෙන Amphotericin එන්නත්ද රෝහල් පද්ධතියේ නොමැති බවයි.
